ເຂົ້າກິນເປັນສິນຄ້າ ປະເພດສະບຽງອາຫານ ທີ່ຢູ່ພາຍໃຕ້ການຄຸ້ມຄອງຂອງຂະແໜງການທີ່ກ່ຽວຂ້ອງ ເປັນຕົ້ນແມ່ນ ກະຊວງອຸດສາຫະກຳ ແລະ ການຄ້າ (ອຄ) ແລະ ກະຊວງກະສິກຳ ແລະ ປ່າໄມ້ (ກປ).
ການສົ່ງອອກເຂົ້າກິນ ຢູ່ ສປປ ລາວ ແມ່ນຖືກຄຸ້ມຄອງດ້ວຍບາງລະບຽບການຄື: ດຳລັດວ່າດ້ວຍການນຳເຂົ້າ ແລະ ສົ່ງອອກ ເລກທີ 114/ລບ, ແຈ້ງການຂອງລັດຖະມົນຕີວ່າການກະຊວງ ອຄ ເລກທີ 0076/ອຄ.ກຂອ, ຂໍ້ຕົກລົງຂອງລັດຖະມົນຕີວ່າການກະຊວງ ອຄ ເລກທີ 0452/ອຄ.ກຂອ. ນອກຈາກນັ້ນ, ກໍ່ມີລະບຽບການທີ່ກ່ຽວກັບການດຸ່ນດ່ຽງໂດຍພາກສ່ວນຢູ່ສູນກາງ ກໍ່ຄື ກະຊວງ ອຄ ແລະ ກປ ເປັນຜູ້ອອກລະບຽບການຄຸ້ມຄອງ ສ່ວນຜູ້ຈັດຕັ້ງປະຕິບັດຕົວຈິງແມ່ນຂັ້ນທ້ອງຖິ່ນ (ແຂວງ) ເຊິ່ງປະກອບມີ ພະແນກ ອຄ ແຂວງ, ພະແນກ ກປ ແຂວງ ແລະ ສະພາການຄ້າ ແລະ ອຸດສາຫະກຳແຂວງ.
ເພື່ອຮັບປະກັນດ້ານສະບຽງອາຫານພາຍໃນແຂວງ, ພະແນກ ກປ ແຂວງ ຈະເປັນຜູ້ດຸ່ນດ່ຽງເຂົ້າກິນພາຍໃນແຂວງຂອງຕົນ ດ້ວຍການກຳນົດໂກຕ້າ ໂດຍຖືເອົາ 350 ກິໂລ/ຄົນ/ປີ ເປັນພື້ນຖານຄິດໄລ່, ແລະ ພາຍຫຼັງ ຫັກອັດຕາການປຽກຊຸ່ມ ແລະ ເຂົ້າແຮອອກ, ຖ້າເຂົ້າເຫຼືອກິນ ແມ່ນແຈ້ງໃຫ້ພະແນກ ອຄ ພິຈາລະນາສົ່ງອອກ.
ຂັ້ນຕອນການສົ່ງອອກເຂົ້າກິນ ມີລາຍລະອຽດດັ່ງນີ້:
- ຜູ້ສົ່ງອອກຕ້ອງໄປຂໍໂກຕ້າ ແລະ ໃບຢັ້ງຢືນສຸຂານາໄມພືດ (Phyto) ຈາກພະແນກ ກປ ແຂວງ, ຂະແໜງ ກປ ຈະສົ່ງພະນັກງານລົງກວດກາ ແລະ ເກັບຕົວຢ່າງຂຶ້ນມາ ເພື່ອອະນຸມັດໂກຕ້າ ແລະ ອອກໃບຢັ້ງຢືນສຸຂານາໄມພືດ.
- ພາຍຫຼັງໄດ້ຮັບອະນຸຍາດຈາກຂະແໜງ ກປ ແລ້ວ ແມ່ນໄປຫາພະແນກ ອຄ ແຂວງ ເພື່ອຂໍໃບອະນຸຍາດສົ່ງອອກ (ຕາມແຈ້ງການ ເລກທີ 0076/ອຄ.ກຂອ). ການອອກໃບອະນຸຍາດສົ່ງອອກ ແມ່ນອອກໃຫ້ທັນທີ ຖ້າຜູ້ສົ່ງອອກປະກອບເອກະສານຖືກຕ້ອງ ແລະ ຄົບຖ້ວນ. ພະແນກ ອຄ ແຂວງ ຈະເປັນຜູ້ອອກໃບຢັ້ງຢືນແຫຼ່ງກຳເນີດສິນຄ້າໃຫ້ເລີຍ ໃນກໍລະນີທີ່ສົ່ງອອກໄປປະເທດທີ່ນຳໃຊ້ ຟອມ A, D, AI, APTA, DFTP ແລະ ຟອມ S.
- ສຳລັບ ໃບຢັ້ງຢືນແຫຼ່ງກຳເນີດສິນຄ້າ ທີ່ສົ່ງອອກໄປບາງປະເທດໂດຍນຳໃຊ້ ຟອມ E, SPT, AK, CO KOREA, AANZ ແລະ ຟອມ AJ ແມ່ນສະພາການຄ້າ ແລະ ອຸດສາຫະກຳ ແຂວງ/ນະຄອນຫຼວງ ເປັນຜູ້ອອກໃຫ້.
ຄ່າທຳນຽມທີ່ເກັບໃນການສົ່ງອອກເຂົ້າກິນ ມີດັ່ງນີ້:
ຄ່າທຳນຽມຕ່າງໆ ທີ່ກ່ຽວຂ້ອງກັບ ການສົ່ງອອກ ເຂົ້າກິນ ໃຫ້ປະຕິບັດຕາມ ລັດຖະບັນຢັດ ຂອງປະທານປະເທດ ວ່າດ້ວຍການເກັບຄ່າທຳນຽມ ສະບັບເລກທີ 03/ປປທ, ເຊິ່ງໄດ້ລະບຸດັ່ງນີ້:
ຄ່າອອກໃບຢັ້ງຢືນສຸຂານາໄມພືດ ຈາກ ພະແນກກະສິກຳ ແລະ ປ່າໄມ້:
- ເອກະສານຢັ້ງຢືນປອດສັດຕູພືດ (Phytosanitary Certificate): 15.000 ກີບ
- ຈຳນວນຜະລິດຕະພັນ 5 – 10 ໂຕນ ເກັບຄ່າທຳນຽມ 40.000 ກີບ
- ຈຳນວນຜະລິດຕະພັນ 11 – 100 ໂຕນ ເກັບຄ່າທຳນຽມ 65.000 ກີບ
- ຈຳນວນຜະລິດຕະພັນ 101 ໂຕນຂຶ້ນໄປ ເກັບຄ່າທຳນຽມ 90.000 ກີບ
ຄ່າອອກໃບອະນຸຍາດສົ່ງອອກຈາກ ພະແນກອຸດສາຫະກຳ ແລະ ການຄ້າແຂວງ:
- ອອກໃບອະນຸຍາດສົ່ງອອກ 10.000 ກີບ/ຄັ້ງ.
ຄ່າອອກໃບຢັ້ງຢືນແຫຼ່ງກຳເນີດສິນຄ້າ ຈາກສະພາການຄ້າ ແລະ ອຸດສາຫະກຳແຂວງ:
- ຄ່າແບບຟອມໃບຢັ້ງຢືນແຫຼ່ງກຳເນີດສິນຄ້າ (CO): 10.000 ກີບ/ຊຸດ
- ມູນຄ່າສົ່ງອອກ ນອ້ຍກວ່າ 10.000 $ ເກັບຄ່າທຳນຽມ 40.000 ກີບ
- ມູນຄ່າສົ່ງອອກ 10.001 $ ຫາ 30.000 $ ເກັບຄ່າທຳນຽມ 60.000 ກີບ
- ມູນຄ່າສົ່ງອອກ 30.001 $ ຫາ 60.000 $ ເກັບຄ່າທຳນຽມ 80.000 ກີບ
- ມູນຄ່າສົ່ງອອກ 60.001 $ ຂື້ນໄປ ເກັບຄ່າທຳນຽມ 100.000 ກີບ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.