ໃນວັນທີ 04 ສິງຫາ 2013 ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມັນຕີ ຜູ້ຊີ້ນໍາວຽກງານເສດຖະກິດ ພ້ອມຄະນະ ໄດ້ລົງເຄື່ອນໄຫວຢ້ຽມຢາມພື້ນຖານການຜະລິດຢູ່ ແຂວງ ຈໍາປາສັກ ເຊິ່ງນໍາພາທາງໂດຍ ທ່ານ ສອນໄຊ ສີພັນດອນ ເຈົ້າແຂວງໆ ຈໍາປາສັກ ພ້ອມພະແນກການ, ອໍານາດການປົກຄ້ອງທ່ອງຖິ່ນ ແລະ ຊາວກະສິກອນໃຫ້ການຕ້ອນຮັບ.
ທ່ານ ຮອງນາຍົກລັດຖະມົນຕີ ແລະ ຄະນະເດີນທາງໄປຢຽມຊົມແມ່ນໂຄງການພັດທະນາຊົນລະກະເສດ ທີ່ບ້ານ ໜອງບົວທອງ ເມືອງ ມຸນລະປະໂມກ ທີ່ຈັດຕັ້ງປະຕິບັດໂດຍ ບໍລິສັດ ປາວິນາ ພັດທະນາ ກະສິກໍາ ຈໍາກັດ ເຊິ່ງມີເນື້ອທີ່ກວມເອົາເຖິງ 10 ພັນເຮັກຕາ ໃນນັ້ນເປັນເນື້ອທີ່ສົ່ງເສີມປະຊາຊົນໃນຂົງເຂດເມືອງດັ່ງກ່າວ 5 ພັນເຮັກຕາ ຊຶ່ງຄາດຜົນຜະລິດປີນີ້ ຈະໄດ້ປະມານ 2.500 ໂຕນ.
ໃນສົກປີ 2011-2012 ສາມາດບຸກເບີກເນື້ອທີ່ໄດ້ 587 ເຮັກຕາ ຜະລິດຕົວຈິງໄດ້ 400 ເຮັກຕາ ໄດ້ຜົນຜະລິດ 1.200 ກ່ວາໂຕນ ໂດຍໄດ້ສົ່ງຂາຍ ແລະ ປ້ອນໂຮງງານເບຍ. ນອກຈາກນັ້ນ, ຍັງໄດ້ສົ່ງເສີມປະຊາຊົນຢູ່ບັນດາເມືອງອ້ອມຂ້າງ ໂດຍຕອບສະໜອງແນວພັນ ແລະ ປຸ໋ຍສີວະພາບເປັນຕົ້ນ ບ້ານ ກະຕຶບ ເມືອງ ຈໍາປາສັກ, 2 ບ້ານຂອງເມືອງໂຂງໃນເນື້ອທີ່ລວມ 150 ກ່ວາເຮັກຕາ ໄດ້ຜົນຜະລິດ 450 ກວ່າໂຕນ. ສໍາລັບ ປີ 2013 ການຜະລິດເຂົ້າລະດູຝົນ ຈະໃຫ້ໄດ້ 500 ເຮັກຕາ ໃນນັ້ັ້ນ ຜະລິດເປັນແນວພັນ 200 ເຮັກຕາ ຄາດວ່າຜົນຜະລິດຈະໄດ້ 2.500 ໂຕນ ພ້ອມນີ້ກໍ່ຈະຂະຫຍາຍເນື້ອທີ່ສົ່ງເສີມປະຊາຊົນໃນ 10 ເມືອງຂອງ ແຂວງ ຈໍາປາສັກ
ໂອກາດນີີ້ ທ່ານ ສົມສະຫວາດ ເລັ່ງສະຫວັດ ກໍ່ເນັ້ນໃຫ້ ບໍລິສັດ ປາວິນາ ເບິ່ງຄືນ ດ້ານການໄລ່ລຽງເສດຖະກິດ ລະຫ່ວາງຜົນໄດ້ຮັບກັບການລົງທຶນ ສົມທຽບກັບການຜະລິດໃນແຕ່ລະທ້ອງຖິ່ນ ໃນປະເທດອ້ອມຂ້າງ ໂດຍສະເພາະໃນເງື່ອນໄຂໃໝ່ ຂອງການເຊື່ອມໂຍງທີມີການແຂ່ງຂັນກັນສູງ, ການເຮັດຊົນລະປະທານ ກໍ່ໃຫ້ເບິ່ງສະພາບພື້ນທີ່ຕົວຈິງ ເພື່ອເຮັດໃຫ້ການສະໜອງນໍ້າມີປະສິດຕິພາບສູງສຸດ ແລະ ສອດຄ່ອງກັບສະພາບດິນ. ພ້ອມນັ້ນ, ທ່ານຍັງເນັ້ນໜັກໃຫ້ກະຊວງທີ່ກ່ຽວຂ້ອງ ແລະ ທ້ອງຖິ່ນ ຕ້ອງໄດ້ໃກ້ຊິດຕິດແທດກັບໂຄງການ ເພື່ອໃຫ້ກາຍເປັນໂຄງງການພັດທະນາແບບຢືນຍົງຢ່າງແທ້ຈິງ.
ທ່ານ ຮອງນາຍົກລັດຖະມົນຕີ ຍັງໄດ້ລົງງຢ້ຽມຢາມ ສະມາຄົມຜູ້ຜະລິດກາເຟ ເຂດພູພຽງບໍລິເວນ ເຊິ່ງເປັນສະມາຄົມໃຫ້ບໍລິການແກ່ປະຊາຊົນ ໂດຍບໍ່ຫວັງຜົນກໍາໄລ ກໍ່ຄືການຄ້າເປັນທໍາ ເພື່ອສົ່ງອອກໄປຕ່າງປະເທດ ໂດຍໄດ້ຮັບການສ້າງຕັ້ງຢ່າງເປັນທາງການໃນປີ 2009. ປະຈຸບັນ, ສະມາຄົມມີສະມາຊິກຫລາຍກວ່າ 2.700 ຄົນ ກວມເອົາ 56 ກຸ່ມຜະລິດນອນຢູ່ໃນ 3 ເມືອງຂອງ 3 ແຂວງໃນຂອບເຂດພູພຽງບໍລິເວນ. ໃນສົກປີ 2012-2013 ສະມາຄົມສາມາດສົ່ງອອກ ກາເຟຄຸນນະພາບ ໄດ້ເຖິງ 50 ຕູ້ຄອນເທັນເນີ ຫຼື ເກືອບ 1.000 ໂຕນ ແລະ ມີຕົວເລກທຸລະກິດເພີ່ມຂຶ້ນເປັນ 4 ລ້ານ ໂດລາສະຫະລັດ.
ພ້ອມນັ້ນ ທ່ານ ຮອງນາຍົກລັດຖະມົນຕີ ກໍ່ໄດ້ສະແດງຄວາມຊົມເຊີຍຕໍ່ ການພັດທະນາໃຫ້ແກ່ການບໍລິການແກ່ປະຊາຊົນ. ໃນນັ້ນ, ກໍ່ມີບາງບັນຫາຈະຕ້ອງໄດ້ເອົາໃຈໃສ່ເປັນຕົ້ນໃຫ້ເບິ່ງຄືນດ້ານການຄຸ້ມຄອງຂອງລັດ ເພື່ອໃຫ້ມີຄວາມສອດຄ່ອງ ແລະ ສາມາດເຄື່ອນໄຫວ ໄປຕາມແນວທາງນະໂຍບາຍຂອງພັກ-ລັດວາງອອກ ພ້ອມກັນຄົ້ນຄວ້າຕື່ມດ້ານລະບຽບ ກົດໝາຍທີ່ພົວພັນ ເພື່ອເຮັດໃຫ້ສະມາຄົມມີການເຄື່ອນໄຫວທີ່ຄ່ອງຕົວຂຶ້ນ ແລະ ສາມາດສົ່ງເສີມປະຊາຊົນຜະລິດເປັນສິນຄ້າສົ່ງອອກໄດ້ຢ່າງແທ້ຈິງ. ເບື້ອງທ້ອງຖິ່ນກໍ່ຕ້ອງເຂົ້າໃຈຕື່ມດ້ານພາລະບົດບາດຂອງຕົນ ໃນການໃຫ້ບໍລິການແກ່ປະຊາຊົນ ເພື່ອຊ່ວຍຍົກລະດັບຊີວິການເປັນຢູ່ຂອງປະຊາຊົນໃຫ້ດີຂຶ້ນເປັນກ້າວໆ.
ຫຼັງຈາກນັ້ນ, ທ່ານ ຮອງນາຍົກລັດຖະມັນຕີ ແລະ ຄະນະກໍ່ໄດ້ໄປຢ້ຽມຊົມສູນການຮ່ວມມືດ້ານກະສິກໍາ ລາວ-ຈີນ ທີ່ເມືອງ ປາກຊ່ອງ. ສູນດັ່ງກ່າວ ໄດ້ຈັດຕັ້ງປະຕິບັດຕາມບົດບັນທຶກຄວາມເຂົ້າໃຈ ລະຫວ່າງກົມປູກຝັງ, ກະຊວງກະສິກໍາປ່າໄມ້ຂອງລາວ ແລະ ພະແນກ ກະສິກໍາ ແຂວງ ກວາງຊີ ສປ ຈີນ ໃນວັນທີ 08 ມັງກອນ 2012 ໃນເນື້ອທີ່ 60 ເຮັກຕາ ເຊິ່ງແນໃສ່ສ້າງເປັນສວນສາທິດ-ທົດສອບແນວພັນ, ເຕັກນິກ-ເຕັກໂນໂລຊີ ໃນການຜະລິດພືດຜັກ, ຝຶກອົບຮົມໃຫ້ແກ່ນັກຮຽນ, ພະນັກງານວິຊາການ ຕະຫຼອດຮອດຊາວກະສິກອນ ໃນເຂດພູພຽງບໍລິເວນ ແລະ ແຂວງ ອ້ອມຂ້າງ.
ປັດຈຸບັນ ກິດຈະກໍາຫຼັກ ແມ່ນການຜະລິດພືດຜັກໃນເຮືອນຮົ່ມ ແລະ ກາງແຈ້ງແບບກະສິກໍາອິນຊີ ແລະ ປອດສານພິດ ໂດຍສົ່ງຊ້ຽວຊານຈີນມາປະຈໍາຢູ່ສູນແຫ່ງນີ້. ໃນໄລະຍະທີ່ຜ່ານມາ ໄດ້ຝຶກອົບຮົມໃຫ້ແກ່ພະນັກງານວິຊາການ, ນັກສຶກສາ ແລະ ຊາວກະສິກອນແລ້ວ 150 ຄົນ, ໃຫ້ທຶນນັກສຶກສາ 2 ຄົນໄປຮຽນທີ່ ແຂວງ ກວາງຊີ, ແລະ ໄດ້ນໍາເຂົ້າແນວຜັກ 198 ແນວພັນ, ທົດສອບແລ້ວ 96 ແນວພັນ. ສໍາລັບເປົ້າໝາຍໃນຕໍ່ໜ້າ ແມ່ນຈະສຸມໃສ່ຄັດເລືອກແນວພັນທີ່ດີ ໃຫ້ແກ່ປະຊາຊົນນໍາໃຊ້ 35 ຊະນິດ, ຍົກປະສິດທິພາບຂອງຜົນຜະລິດໃຫ້ໄດ້ 20 % ແລະ ຝຶກອົບຮົມ ພະນັກງານວິຊາການ, ນັກສຶກສາ ແລະ ຊາວກະສິກອນໃຫ້ໄດ້ 700 ຄົນ ລວມເຖິງແຂວງ ແລະ ປະເທດອ້ອມຂ້າງໃນຖານະ 1 ໃນ 20 ກ່ວາສູນຮ່ວມມືໃນບັນດາປະເທດອາຊຽນ.
ທ່ານ ຮອງນາຍົກລັດຖະມົນຕີ ກໍ່ໄດ້ສະແດງຄວາມຊົມເຊີຍຕໍ່ຜົນງານຮ່ວມມື ລະຫວ່າງ ແຂວງ ກວາງຊີ ກັບ ແຂວງ ຈໍາປາສັກ ກໍ່ຄື 2 ກະຊວງກະສິກໍາ ລາວ-ຈີນ ອັນເປັນການປະກອບສ່ວນຍົກລະດັບການເປັນຄູ່ຮ່ວມມືຍຸດທະສາດຮອບດ້ານລາວ-ຈີນ ໃນໄລຍະໃໝ່.
ໃນຕອນທ້າຍ ທ່ານ ຍັງໄດ້ເນັ້ນຕື່ມໃນການເອົາໃຈໃສ່ເຮັດໃຫ້ສູນແຫ່ງນີ້ ເປັນບ່ອນຜະລິດເມັດພັນທີ່ດີ, ທັງເປັນແບບຢ່າງໃນການເຜີຍແຜ່ເຕັກນິກ ແລະ ຝຶກອົບຮົບຊາວກະສິກອນຢ່າງແທ້ຈິງ ແລະ ຫວັງຢ່າງຍິ່ງວ່າ ສູນດັ່ງກ່າວ ກໍ່ຄື ແຂວງ ກວາງຊີ ຈະເສີມຂະຫຍາຍການຮ່ວມມືກັບລາວ ເພື່ອຕອບສະໜອງໃຫ້ແກ່ການຜະລິດຂອງລາວ ໂດຍສະເພາະການຜະລິດເປັນສິນຄ້າ ເພື່ອສົ່ງອອກໄປຈີນ ແລະ ປະເທດອື່ນໆ ປະກອບສ່ວນວຽກງານລຶບລ້າງຄວາມທຸກຍາກ ແລະ ຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນເປັນກ້າວໆ.
ແຫລ່ງຂໍ້ມູນ : ໜັງສືພິມ ເສດຖະກິດ - ການຄ້າ, ສະບັບ ວັນທີ 7 ສິງຫາ 2013
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.