ປັດຈຸບັນ ສປປ ລາວ ໄດ້ເຂົ້າເປັນສະມາຊິກຂອງອົງການການຄ້າໂລກຢ່າງສົມບູນ ແລະ ກຳລັງກະກຽມດ້ານຕ່າງໆ ທີ່ຈຳເປັນໃນການເຂົ້າສູ່ປະຊາຄົມເສດຖະກິດອາຊຽນ (AEC) ໃນປີ 2015 ທີ່ຈະມາເຖິງນີ້ ລັດຖະບານເຫັນວ່າມີຄວາມຈຳເປັນຢ່າງຍິ່ງ ທີ່ຈະຕ້ອງໄດ້ເສີມສ້າງຂີດຄວາມສາມາດ ຂອງທຸກພາກສ່ວນເສດຖະກິດຢູ່ພາຍໃນ ບວກກັບການຍາດແຍ່ງການສະໜັບສະໜູນຊ່ວຍເຫຼືອຂອງສາກົນ ເພື່ອຂຸດຄົ້ນຄວາມອາດສາມາດບົ່ມຊ້ອນ ແລະ ທ່າແຮງຂອງຊາດໃຫ້ເກີດປະໂຫຍດສູງສຸດ ແນໃສ່ຊຸກຍູ້ການພັດທະນາເສດຖະກິດ-ສັງຄົມ ໃຫ້ຂະຫຍາຍຕົວຢ່າງແຂງແຮງ ມີສະຖຽນລະພາບ ແລະ ສາມາດບັນລຸຕົວເລກຄາດໝາຍທີ່ວາງໄວ້ ທັງເຂົ້າຮ່ວມການເຊື່ອມໂຍງກັບພາກພື້ນ ແລະ ສາກົນເປັນຢ່າງດີ.
ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳວຽກງານເສດຖະກິດ ໄດ້ກ່າວ ໃນກອງປະຊຸມທຸລະກິດລາວ ຄັ້ງທີ 8 ວ່າ: ເພື່ອຈັດຕັ້ງປະຕິບັດຕາມແນວທາງດັ່ງກ່າວ ໃຫ້ປະກົດຜົນເປັນຈິງນັ້ນ ລັດຖະບານມີຄວາມໝາຍໝັ້ນອັນເດັດດ່ຽວ ໃນການສືບຕໍ່ດຳເນີນແນວທາງປ່ຽນແປງໃໝ່ທາງດ້ານເສດຖະກິດ ຕາມກົນໄກຕະຫຼາດ ໂດຍສົ່ງເສີມທຸກພາກສ່ວນເສດຖະກິດ ໃຫ້ແຂ່ງຂັນກັນຢ່າງສະເໝີພາບຕໍ່ໜ້າກົດໝາຍ ເພື່ອປະກອບສ່ວນສຳຄັນເຂົ້າໃນການຫັນປະເທດຊາດ ກ້າວໄປສູ່ອຸດສາຫະກຳ ທັນສະໄໝຢ່າງບໍ່ຢຸດຢັ້ງ. ຜ່ານມາ ລັດຖະບານໄດ້ໃຊ້ທຸກຄວາມພະຍາຍາມ ເພື່ອປັບປຸງບັນດານິຕິກຳ, ກົນໄກການຄຸ້ມຄອງການແບ່ງຄວາມຮັບຜິດຊອບ ແລະ ສິດຄຸ້ມຄອງລະຫວ່າງສູນກາງ ແລະ ທ້ອງຖິ່ນ ຕາມນະໂຍບາຍ 3 ສ້າງ ເພື່ອສ້າງເງື່ອນໄຂອຳນວຍ ດຶງດູດການລົງທຶນໃຫ້ຫຼາຍຂຶ້ນກວ່າເກົ່າ. ພ້ອມນີ້ ລັດຖະບານຍັງໄດ້ສືບຕໍ່ຂະບວນປັບປຸງລະບົບກົນໄກ ການບໍລິການຜ່ານປະຕູດຽວຢ່າງຈິງຈັງ ຫຼຸດຂັ້ນຕອນທີ່ບໍ່ຈຳເປັນ ແລະ ຂໍ້ຈຳກັດຕ່າງໆລົງ ອັນພົ້ນເດັ່ນແມ່ນການປັບປຸງ ແລະ ດັດແກ້ກົດໝາຍແຮງງານ ສ້າງກົດໝາຍປະກັນສັງຄົມ ກົດໝາຍອຸດສາຫະກຳປຸງແຕ່ງ ກົດໝາຍຄຸ້ມຄອງຜູ້ບໍລິໂພກ ແລະ ກົດໝາຍອື່ນໆ, ປັບປຸງກົນໄກການຫັນເອົາຊັບສິນເປັນທຶນ ໃຫ້ເກີດປະສິດທິຜົນຫຼາຍຂຶ້ນ ແລະ ສະດວກຂຶ້ນກວ່າເກົ່າ ພ້ອມທັງກວດກາຄືນບາງນິຕິກຳ ທີ່ເຫັນວ່າຍັງບໍ່ທັນສອດຄ່ອງ ເພື່ອອຳນວຍຄວາມສະດວກແກ່ການດຳເນີນທຸລະກິດ ຂອງຜູ້ລົງທຶນທັງພາຍໃນ ແລະ ຕ່າງປະເທດ.
ທ່ານ ດຣ. ສະໜັ່ນ ຈຸນລະມະນີ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດ ໄດ້ກ່າວວ່າ: ໂດຍອີງຕາມມະຕິ 5 ຂອງກົມການເມືອງສູນກາງພັກວ່າດ້ວຍການປັບປຸງ ແລະ ສ້າງວິສາຫະກິດໃຫ້ເຂັ້ມແຂງ ກຽມພ້ອມໃນການແຂ່ງຂັນ ແລະ ສິ່ງທ້າທາຍໄລຍະການເຊື່ອມໂຍງເສດຖະກິດໃນພາກພື້ນ ແລະ ສາກົນນັ້ນ ແມ່ນມີຄວາມຈຳເປັນຢ່າງຍິ່ງ ທີ່ຈະຕ້ອງມີການປັບປຸງບັນດານິຕິກຳ ແລະ ລະບຽບການທີ່ຍັງບໍ່ທັນເອື້ອຍອຳນວຍ ໃຫ້ແກ່ການເຄື່ອນໄຫວ ແລະ ດຳເນີນທຸລະກິດ.
ແຫລ່ງຂໍ້ມູນ: ໜັງສືພິມວຽງຈັນໃຫມ່
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.