ເພື່ອຮັກສາ ບາງປະເພດທຸລະກິດທີ່ມີຄວາມສຳຄັນ ແລະ ຈຳເປັນ ສຳລັບປະຊາຊົນລາວບັນດາເຜົ່າ ໃນການປະກອບທຸລະກິດ ສ້າງວຽກເຮັດງານທຳ ສ້າງລາຍໄດ້ໃຫ້ມີຄວາມໝັ້ນຄົງ ແກ້ໄຂຊີວິດການເປັນຢູ່ໃຫ້ດີຂຶ້ນ, ເພື່ອໃຫ້ປະຊາຊົນບັນດາເຜົ່າ ແລະ ນັກລົງທຶນ (ພາຍໃນ/ຕ່າງປະເທດ) ມີຄວາມສະດວກໃນການພິຈາລະນາ ກ່ອນການປະກອບທຸລະກິດໃດໜຶ່ງຢູ່ໃນ ສປປ ລາວ ວ່າ ມີທຸລະກິດ ປະເພດໃດ ແລະ ມີເງື່ອນໄຂ ຂໍ້ກໍານົດສະເພາະແນວໃດ, ກະຊວງອຸດສາຫະກຳ ແລະ ການຄ້າ (ບົນພື້ນຖານການຄົ້ນຄວ້າ ສະເໜີ ຂອງບັນດາຂະແໜງການທີ່ກ່ຽວຂ້ອງ) ໄດ້ອອກແຈ້ງການສຳລັບ ບັນຊີປະເພດທຸລະກິດສະຫງວນໄວ້ສຳຫລັບພົນລະເມືອງລາວ, ບັນຊີທຸລະກິດມີເງື່ອນໄຂ ສຳລັບຜູ້ລົງທຶນຕ່າງປະເທດ ແລະ ບັນຊີປະເພດທຸລະກິດເກືອດຫ້າມດັ່ງລະອຽດລຸ່ມນີ້
ປະເພດທຸລະກິດສະຫງວນໄວ້ ສຳລັບຜົນລະເມືອງລາວ ແມ່ນປະເພດທຸລະກິດ ທີ່ເປັນມູນເຊື້ອອັນຍາວນານຂອງປະຊາຊົນບັນດາເຜົ່າ, ທຸລະກິດທີ່ເປັນເອກະລັກຂອງຊາດ ໃຫ້ຢູ່ຄູ່ຄົນລາວ ສ້າງວຽກເຮັດງານທຳ ສ້າງລາຍໄດ້ ແລະ ແກ້ໄຂຊີວິດການເປັນຢູ່ຂອງປະຊາຊົນບັນດາເຜົ່າ. ລາຍການປະເພດທຸລະກິດສະຫງວນໄວ້ ສຳລັບພົນລະເມືອງລາວ ກຳນົດໃນບັນຊີ ຄໍ 02-2015.
ປະເພດທຸລະກິດມີເງື່ອນໄຂສຳລັບຜູ້ລົງທຶນຕ່າງປະເທດ ແມ່ນທຸລະກິດບໍ່ຫ້າມຜູ້ລົງທຶນຕ່າງປະເທດ ແຕ່ມີເງື່ອນໄຂ ຂໍ້ຈຳກັດບາງປະການ ເຊັ່ນ: ກຳນົດທຶນຈົດທະບຽນຕໍ່າສຸດ, ສູງສຸດ ຫລື ກຳນົດອັດຕາສ່ວນຮຸ້ນ ຂອງຜູ້ລົງທຶນຕ່າງປະເທດໃນວິສາຫະກິດ ຫລື ເງື່ອນໄຂຂໍ້ຈຳກັດອື່ນໆ. ລາຍການປະເພດທຸລະກິດມີເງື່ອນໄຂ ສຳລັບຜູ້ລົງທຶນຕ່າງປະເທດ ກຳນົດໃນບັນຊີ ງໍ 02-2015.
3. ແຈ້ງການ ກ່ຽວກັບ ບັນຊີປະເພດທຸລະກິດເກືອດຫ້າມ ສະບັບເລກທີ 1592/ອຄ.ທຄວ, ລົງວັນທີ 26 ສິງຫາ 2013
ປະເພດທຸລະກິດເກືອດຫ້າມ ແມ່ນປະເພດທຸລະກິດ ທີ່ບໍ່ອະນຸຍາດໃຫ້ສ້າງຕັ້ງ ແລະ ເຄື່ອນໄຫວດຳເນີນທຸລະກິດຢູ່ ສປປ ລາວ. ລາຍການປະເພດທຸລະກິດເກືອດຫ້າມ ກຳນົດໃນບັນຊີ ຂໍ 01-2013.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.