ໃນວັນທີ 30 ກັນຍາ 2013, ກອງປະຊຸມເພື່ອປຶກສາຫາລືກ່ຽວກັບອຸປະສັກຕໍ່ການເຄື່ອນຍ້າຍໄມ້ ແລະ ສົ່ງອອກຜະລິດຕະພັນໄມ້ ໄດ້ຈັດຂື້ນທີ່ ຫ້ອງປະຊຸມ ຂອງ ໂຮງແຮມໂຊກບຸນມາ, ເມືອງປາກຊັນ, ແຂວງບໍລິຄຳໄຊ ພາຍໃຕ້ການເປັນປະທານຂອງ ທ່ານ ນາງ ບານສະຕິ ເທບພະວົງ, ຮັກສາການ ຫົວໜ້າກົມການນຳເຂົ້າ ແລະ ສົ່ງອອກ ຮ່ວມກັບ ທ່ານ ສິງຄຳ ສຸວັນຄຳ, ຮອງຫົວໜ້າຫ້ອງວ່າການປົກຄອງແຂວງ ບໍລິຄຳໄຊ ແລະ ທ່ານ ສະຫງວນ ສະຫວ່າງ ຫົວໜ້າພະແນກອຸດສາຫະກຳ ແລະ ການຄ້າ ແຂວງ ບໍລິຄຳໄຊ ໂດຍມີຜູ້ເຂົ້າຮ່ວມຈາກ ຂະແໜງກະສິກຳ ແລະ ປ່າໄມ້, ຂະແໜງການເງິນຂອງແຂວງ ພ້ອມດ້ວຍນັກທຸລະກິດໄມ້ຈຳນວນໜຶ່ງ ຈາກ ນະຄອນຫລວງວຽງຈັນ, ແຂວງໄຊຍະບູລີ, ຊຽງຂວາງ, ບໍລິຄຳໄຊ, ຄຳມ່ວນ, ສະຫວັນນະເຂດ, ຈຳປາສັກ ແລະ ອັດຕະປື. ຈຸດປະສົງແມ່ນເພື່ອທົບທວນຄືນ ແລະ ຮັບຟັງບັນດາຄຳຄິດຄຳເຫັນ ຕໍ່ກັບສະພາບການ ຈັດຕັ້ງປະຕິບັັດບັນດາລະບຽບການຄຸ້ມຄອງການເຄື່ອນຍ້າຍ ສົ່ງອອກໄມ້ ແລະ ຜະລິດຕະພັນໄມ້ ວ່າມີຄວາມຫຍຸ້ງຍາກຄືແນວໃດ.
ກອງປະຊຸມຄັ້ງນີ້ມີຄວາມສຳຄັນເປັນຢ່າງຍິ່ງເພາະມັນແມ່ນການປຶກສາຫາລືເພື່ອຊອກຮູ້ບັນຫາຕ່າງໆ ທີ່ເປັນອຸປະສັກ ຕໍ່ການສົ່ງອອກຜະລິດຕະພັນໄມ້ ເພື່ອເອົາຂໍ້ມູນເຫຼົ່ານັ້ນມານຳໃຊ້ ໃນການປັບປຸງວຽກງານ ຄຸ້ມຄອງໄມ້ໃນທົ່ວປະເທດ ໃຫ້ມີປະສິດທິຜົນ, ອີກທັງຮັບປະກັນການປະຕິບັດນະໂຍບາຍ ປົກປັກຮັກສາປ່າໄມ້ ແລະ ຊີວະນາໆພັນໃຫ້ມີຄວາມຍືນຍົງ. ກອງປະຊຸມໄດ້ດຳເນີນໄປຢ່າງມີບັນຍາກາດຟົດຟື້ນ ແລະ ມີການປະກອບຄຳຄິດຄຳເຫັນກັນ ຢ່າງກົງໄປກົງມາ ຈາກຜູ້ເຂົ້າຮ່ວມທັງພາກລັດ ແລະ ທຸລະກິດ.
ຜົນຂອງກອງປະຊຸມປຶກສາຫາລືໃນຄັ້ງນີ້ສ່ວນໃຫຍ່ເຫັນດີ ໃຫ້ມີການປັບປຸງ ລະບຽບການທີ່ບໍ່ສອດຄ່ອງ ແລະ ກົມກຽວກັນ ເຊິ່ງຄະນະຮັບຜິດຊອບກອງປະຊຸມ ຈະໄດ້ນໍາໄປຜັນຂະຫຍາຍ ແລະ ປຶກສາຫາລືເພີ້ມເຕີມ ກັບຂະແໜງການກ່ຽວຂ້ອງ ໃນຂັ້ນສູນກາງເພື່ອພິຈາລະນາປັບປຸງນິຕິກຳ, ລະບຽບການ ແລະ ວາງນະໂຍບາຍຄຸ້ມຄອງທຸລະກິດໄມ້ຂອງ ສປປ ລາວ ອອກມາໃຫ້ສອດຄ່ອງກັບສະພາບຄວາມເປັນຈິງ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.