ປະເທດສະມາຊິກທີ່ເຂົ້າຮ່ວມໂຄງການທົດລອງທີ II ຂອງອາຊຽນ ກ່ຽວກັບການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງນີ້ ຈະໄດ້ຈັດຕັ້ງປະຕິບັດລະບົບການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງພາຍໃຕ້ຂອບການຄ້າເສລີອາຊຽນ ເພື່ອເຮັດໃຫ້ການຈັດຕັ້ງປະຕິບັດນີ້ດຳເນີນໄປຢ່າງມີປະສິດທິຜົນ ແລະ ຮັບປະກັນຄວາມຖືກຕ້ອງສອດຄ່ອງກັບຂັ້ນຕອນ-ລະບຽບການພາຍໃນ ແລະ ສາກົນ, ກະຊວງການເງິນ ຈຶ່ງອອກຂໍ້ຕົກລົງ ວ່າດ້ວຍ ການຈັດຕັ້ງປະຕິບັດໂຄງການທົດລອງທີ II ຂອງອາຊຽນ ກ່ຽວກັບ ການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ສະບັບເລກທີ 2962/ກງ, ລົງວັນທີ 09/10/2013 ເພື່ອເປັນການຄຸ້ມຄອງການນຳເຂົ້າສິນຄ້າ ທີ່ມີການຢັ້ງຢືນແຫຼ່ງກຳເນີດສິນຄ້າຈາກປະເທດສະມາຊິກເຂົ້າໄດ້ຮ່ວມໂຄງການດັ່ງກ່າວ. ສະນັ້ນ, ເຈົ້າໜ້າທີ່ພາສີຕ້ອງອຳນວຍຄວາມສະດວກ ໃຫ້ແກ່ສິນຄ້າທີ່ນຳເຂົ້າຕາມໂຄງການທົດລອງທີ II ຂອງອາຊຽນ ກ່ຽວກັບ ການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ຄືກັນກັບການອຳນວຍຄວາມສະດວກໃຫ້ແກ່ສິນຄ້າທີ່ນຳເຂົ້າໃນຂອບການຄ້າດ້ານຜະລິດຕະພັນອາຊຽນ. ຊຶ່ງຫຼັກການໃນການຮັບຮອງໃບຢັ້ງຢືນແຫຼ່ງກຳເນີດສິນຄ້າດ້ວຍຕົນເອງ ປະກອບມີ: 1)ຕ້ອງລະບຸລາຍລະອຽດຂອງສິນຄ້າຢ່າງພຽງພໍ ເພື່ອສາມາດກຳນົດກ່ຽວກັບແຫຼ່ງກຳເນີດສິນຄ້າ; 2)ຕ້ອງຖືກລົງລາຍເຊັນ ພ້ອມລະບຸຊື່ຂອງຜູ້ສົ່ງອອກທີ່ໄດ້ສິດໃນການຢັ້ງຢືນແຫຼ່ງກຳເນີດສິນຄ້າ; 3)ວັນທີ, ເດືອນ, ປີ ທີ່ລະບຸໃນໃບແຈ້ງລາຄາແຫຼ່ງກຳເນີດສິນຄ້າ ຈະຖືເປັນມື້ທີ່ອອກໃບແຈ້ງລາຄາແຫຼ່ງກຳເນີດສິນຄ້າດັ່ງກ່າວ; 4)ບັນຊີລາຍຊື່, ແບບຢ່າງລາຍເຊັນ ແລະ ກາຈ້ຳຂອງຜູ້ສົ່ງອອກທີ່ໄດ້ສິດໃນການຢັ້ງຢືນຕ້ອງສະໜອງໃຫ້ແກ່ບັນດາປະເທດສະມາຊິກທີ່ເຂົ້າຮ່ວມໂຄງການ ໂດຍຜ່ານກອງເລຂາອາຊຽນ; ແລະ 5)ຕ້ອງມີເນື້ອໃນເອກະພາບ ລະບຸໄວ້ດ້ານລຸ່ມຂອງໃບແຈ້ງລາຄາແຫຼ່ງກຳ ເນີດສິນຄ້າທຸກສະບັບ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.