ໃນວັນທີ 26 ກັນຍາ 2013 ທີ່ຜ່ານມາ ທີ່ນະຄອນຫຼວງ ປັກກິ່ງ, ສປ ຈີນ, ລັດຖະບານ ແຫ່ງ ສປປ ລາວ ແລະ ສປ ຈີນ ໄດ້ຮ່ວມລົງນາມເຊັນບົດບັນທຶກ ຂໍ້ກຳນົດເງື່ອນໄຂດ້ານສຸຂານາໄມພືດ ກ່ຽວກັບ ການນຳເຂົ້າຂອງ ສປ ຈີນ ຈາກ ສປປ ລາວ ຊຶ່ງມີ 3 ປະເພດ ພືດ ຄື: ມັນຕົ້ນແຫ້ງ, ກ້ວຍ ແລະ ໝາກໂມ ຊຶ່ງເປັນຜົນສຳເລັດໃນເບື້ອງຕົ້ນ ຂອງການກະກຽມຜະລິດຕະພັນກະສິກຳ ແລະ ປ່າໄມ້ ຂອງລາວ ເພື່ອສົ່ງອອກໄປຍັງ ສປ ຈີນ. ເຖິງຢ່າງໃດກໍ່ຕາມ ສປປ ລາວ ຍັງມີທ່າແຮງດ້ານກະສິກຳອີກຫຼາຍໆຜະລິດຕະພັນຕາມທີ່ຕ້ອງການສົ່ງອອກໄປຍັງຕະຫຼາດຈີນ, ສະນັ້ນ ໂດຍອີງໃສ່ການພົວພັນຄູ່ຮ່ວມມືຍຸດທະສາດຮອບດ້ານ ລະຫວ່າງ ສປປ ລາວ ແລະ ສປ ຈີນ ລັດຖະບານລາວຈຶ່ງເລັງເຫັນຄວາມເປັນໄປໄດ້ ທີ່ຈະຂະຫຍາຍບົດບັນທຶກຂໍ້ກຳນົດເງື່ອນໄຂດ້ານສຸຂານາໄມພືດສຳລັບສິນຄ້າປະເພດກະສິກຳຂອງລາວ ທີຈະສົ່ງອອກໄປຍັງ ສປ ຈີນ, ໃນວັນທີ 11 ຕຸລາ 2013 ກະຊວງກະສິກຳ ແລະ ປ່າໄມ້ ເຮັດໜັງສືສະເໜີເຖິງ ຫ້ອງການທີ່ປຶກສາທຸດ ເສດຖະກິດ-ການຄ້າ ຂອງ ສປ ຈີນ ທີ່ປະຈຳຢູ່ ສປປ ລາວ ເພື່ອໃຫ້ຊ່ວຍປະສານໄປທາງອົງການ AQSIQ (General Administration of Quality Supervision, Inspection and Quarantine) ຂອງ ສປ ຈີນ ກ່ຽວກັບ ການເຊັນບົດບັນທຶກຂໍ້ກຳນົດເງື່ອນໄຂດ້ານສຸຂານາໄມພືດກ່ຽວກັບການສົ່ງອອກ ເຂົ້າສານ ຂອງ ສປປ ລາວ ໄປຍັງ ສປ ຈີນ ຕື່ມ ເພາະເຂົ້າສານເປັນປະລິດຕະພັນຕົ້ນຕໍ່ຂອງຊາວກະສິກອນລາວ ແລະ ເປັນປັດໃຈສຳຄັນທີ່ສາມາດສ້າງລາຍຮັບໃຫ້ປະຊາຊົນລາວ ແລະ ທີ່ສຳຄັນ ສປປ ລາວ ແມ່ນມີຄວາມພ້ອມທີ່ຈະເຊັນບົດບັນທຶກດັ່ງກ່າວ ທີ່ໄດ້ຜ່ານການຄົ້ນຄວ້າທາງດ້ານວິຊາການ ແລະ ໄດ້ຮັບການເຫັນດີເປັນເອກະພາບຈາກຂັ້ນເທິງຂອງ ສປປ ລາວ. ຖ້າຫາກວ່າ ບົດບັນທຶກດັ່ງກ່າວໄດ້ຮັບການລົງນາມ ກໍ່ຈະເປັນຜົນດີແກ່ ສປປ ລາວ ໃນການເປີດຕະຫຼາດສົ່ງອອກເຂົ້າສານ ໄປ ສປ ຈີນ ໂດຍມີການກຳນົດເງື່ອນໄຂຈະແຈ້ງ ແລະ ຊັດເຈນ ເພື່ອອຳນວຍຄວາມສະດວກແກ່ການສົ່ງອອກ ຂອງ ສປປ ລາວ. ແຕ່ເຖິງຢ່າງໃດກໍ່ຕາມ ຜູ້ຜະລິດຂອງລາວກໍ່ຕ້ອງຮັບປະກັນວ່າເຂົ້າສານຂອງ ສປປ ລາວ ເຫັນໄດ້ເຖິງຄຸນນະພາບ ແລະ ປະລິມານຂອງການສົ່ງອອກ ເພາະສິ່ງເຫຼົ່ານັ້ນຈະເປັນອັນຕັດສິນຊີ້ຂາດ.
ທ່ານສາມາດດາວໂຫລດເອກະສານລາຍລະອຽດໄດ້ຂ້າງລຸ່ມນີ້:
PDFກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.