ເນື່ອງໃນໂອກາດດັ່ງກ່າວ ທ່ານລັດຖະມົນຕີວ່າການ ໄດ້ເນັ້ນໜັກ 3 ບັນຫາເພື່ອໃຫ້ແຕ່ລະແຂວງເອົາໃຈໃສ່ເພື່ອ ກະກຽມຄວາມພ້ອມ ໃນການປະຕິບັດແນວທາງເຊື່ອມໂຍງເສດຖະກິດກັບພາກພື້ນ ແລະສາກົນ ໂດຍສະເພາະ ບັນດາແຂວງສ່ວນໃຫຍ່ ຍັງຄົງມີການດຳເນີນ ການຄ້າແບບບໍ່ເປັນທາງການຕາມເຂດຊາຍແດນ ແຕ່ໃນປະຈຸບັນມີຄວາມກົດດັນໃຫ້ພວກເຮົາຕ້ອງປັບປຸງຕົນເອງທັງໃນມະຫາພາກ ແລະ ທຸລະກິດ. ນີ້ຮຽກຮ້ອງໃຫ້ພາກລັດຕ້ອງໄດ້ເອົາໃຈໃສ່ຢ່າງແຂງແຮງຕື່ມໃນການພັດທະນາ ແລະສົ່ງເສີມການຜະລິດ-ການຄ້າ. ອີກບັນຫາໜຶ່ງທີ່ສໍາຄັນແມ່ນການຄຸ້ມຄອງຕະຫຼາດ ແລະລາຄາ ທີ່ຈະຕ້ອງໄດ້ເອົາໃຈໃສ່ ເນື່ອງຈາກຕະຫຼາດຂອງພວກ ເຮົາເຊື່ອມ ໂຍງປະເທດໃກ້ຄຽງ. ໃນນີ້ກົມກ່ຽວຂ້ອງຂອງກະຊວງ ອຄ ຄື: ກົມການນຳເຂົ້າ ແລະສົ່ງອອກ, ກົມສົ່ງເສີມ ແລະພັດທະນາສິນຄ້າ ແລະກົມການຄ້າພາຍໃນ ກໍໄດ້ເຂົ້າຮ່ວມ ພ້ອມທັງປະກອບຄໍາເຫັນດ້ານວິຊາການຕໍ່ກອງປະຊຸມ.
ໃນກອງປະຊຸມຄັ້ງນີ້, ບັນດາຫົວໜ້າພະແນກ ອຄ ຂອງ 8 ແຂວງ ຄື: ຊຽງຂວາງ, ຫຼວງພະບາງ, ໄຊຍະບູລີ, ຜົ້ງສາລີ, ຫົວພັນ, ບໍ່ແກ້ວ, ຫຼວງນໍ້າທາ ແລະ ອຸດົມໄຊ ຕ່າງກໍໄດ້ລາຍງານຜົນສຳເລັດກໍຄືຂໍ້ສະດວກໃນການປະຕິບັດວຽກງານຂອງຂະແໜງ ອຄ. ເຖິງຢ່າງໃດກໍຕາມກອງ ປະຊຸມໄດ້ເນັ້ນໜັກບັນຫາທ້າທາຍທີ່ຈະຕ້ອງຮ່ວມກັນແກ້ໄຂບົນພື້ນຖານການຖອດຖອນບົດຮຽນໃນກອງປະຊຸມຄັ້ງນີ້ ໂດຍສຳຄັນ ປະກອບດ້ວຍ: ການເຜີຍແຜ່ ແລະຍົກລະດັບຄວາມຮູ້ກ່ຽວກັບການເຊື່ອມໂຍງເສດຖະກິດກັບພາກພື້ນ ແລະສາກົນ, ການກີດ ກັ້ນດ້ານການເຂົ້າຕະຫຼາດສິນຄ້າກະສິກຳໂດຍປະເທດໄກ້ຄຽງ, ການສົ່ງເສີມການຜະລິດ ແລະທຸລະກິດຂະໜາດນ້ອຍ ແລະກາງ, ການສົ່ງເສີມແລະຄຸ້ມຄອງສະມາຄົມທຸລະກິດ, ການຄຸ້ມຄອງຕະຫຼາດ ແລະລາຄາ, ການສ້າງຕັ້ງເຂດນິຄົມອຸດສາຫະກຳ ຕະຫຼອດເຖິງການແກ້ໄຂບັນຫາຊາວຕ່າງປະເທດໃນຂະແໜງຂາຍຍ່ອຍ ແລະເຮັດການຜະລິດກະສິກຳ ແລະໂຮງງານທີ່ສ້າງຜົນເສຍຕໍ່ຊຸມຊົນ ແລະສິ່ງແວດລ້ອມ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.