ກອງປະຊຸມດັ່ງກ່າວ ໂດຍເປັນປະທານຮ່ວມຂອງທ່ານ ສຈ.ດຣ. ເອກສະຫວ່າງ ວົງວິຈິດ ລັດຖະມົນຕີວ່າການ ກະຊວງສາທາລະນະສຸກ ທ່ານ ລິວຢູນກົວ ຜູ້ຕາງໜ້າອົງການອະນາໄມໂລກ ປະຈຳ ສປປ ລາວ ໂດຍມີຜູ້ເຂົ້າຮ່ວມຈາກບັນດາກະຊວງ ພາກສ່ວນທຸລະກິດທີ່ກ່ຽວຂ້ອງເຂົ້າຮ່ວມ.
ກົດໝາຍວ່າດ້ວຍອາຫານ ສະບັບປັບປຸງ ສະບັບເລກທີ 06/ ສພຊ ລົງວັນທີ 24 ກໍລະກົດ 2013 ໄດ້ຖືກຮັບຮອງຈາກສະພາແຫ່ງຊາດ ແລະ ປະກາດໃຊ້ໂດຍດຳລັດຂອງທ່ານປະທານປະເທດ ສະບັບເລກທີ 172/ ປປທ, ລົງວັນທີ 20 ສິງຫາ 2013. ກົດໝາຍວ່າດ້ວຍອາຫານສະບັບເດີມ (2004) ປະກອບມີ 8 ພາກ, 54 ມາດຕາ, ສ່ວນກົດໝາຍວ່າດ້ວຍອາຫານສະບັບປັບປຸງໃໝ່ ປະກອບມີ 10 ພາກ, 6 ໜວດ, 85 ມາດຕາ (ເອົາເຂົ້າໃໝ່ 49 ມາດຕາ ປັບປຸງ 32 ມາດຕາ, ເນື້ອໄນເກົ່າ 4 ມາດຕາ), ໃນນັ້ນ ໃນພາກທີ 3, ມາດຕາທີ 34, ມາດຕາທີ 35, ແລະ ມາດຕາທີ 36 ໄດ້ລະບຸລະອຽດກ່ຽວກັບການສົ່ງອອກອາຫານ,ການນຳເຂົ້າອາຫານ ແລະ ການສົ່ງຜ່ານອາຫານວ່າມີລະບຽບ, ຂັ້ນຕອນການປະຕິບັດຄືແນວໃດ.
ກົດໝາຍສະບັບປັບປຸງ ຈະສາມາດນຳໃຊ້ເປັນບ່ອນອີງດ້ານນິຕິກຳທີ່ຮັດກຸມກວ່າເກົ່າ ໃນການຈັດຕັ້ງປະຕິບັດຄຸ້ມຄອງ- ກວດກາ ທີ່ເປັນເອກະພາບໃນທົ່ວປະເທດ ແລະ ກວມລວມເອົາການຄຸ້ມຄອງທຸກຫົວໜ່ວຍທຸລະກິດອາຫານ ທີ່ເຄື່ອນໄຫວໃນ ສປປ ລາວ ເພື່ອຮັບປະກັນຄຸນນະພາບ ແລະ ຄວາມປອດໄພຂອງອາຫານ ໂດຍມີການແບ່ງຂັ້ນການຄຸ້ມຄອງແຕ່ລະຂັ້ນ ນັບແຕ່ສູນກາງຈົນຮອດທ້ອງຖິ່ນຢ່າງຈະແຈ້ງ ມີການກຳນົດການປະສານງານລະຫວ່າງພາກສ່ວນທີ່ກ່ຽວຂ້ອງ ກ່ຽວກັບການຄຸ້ມຄອງທຸລະກິດອາຫານ ຫຼຸດຜ່ອນຂັ້ນຕອນທີ່ຊ້ຳຊ້ອນ ແລະ ປະຕິບັດລະບົບປະຕູດຽວ ແລະ ການປະສານງານທີ່ກົມກຽວ ເພື່ອຈຸດປະສົງປົກປ້ອງສຸຂະພາບຂອງຜູ້ບໍລິໂພກ ມີຄວາມສອດຄ່ອງກັບສະພາບຄວາມເປັນຈິງຂອງ ສປປ ລາວ ພ້ອມທັງສອດຄ່ອງກັບຫຼັກການຂອງສາກົນ ແລະ ພາກພື້ນອີກດ້ວຍ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.