ຂໍ້ມູນຂອງກະຊວງແຜນການ ແລະ ການລົງທຶນ ໃຫ້ຮູ້ວ່າ: ໃນສົກປີຜ່ານມາ, ວຽກງານການຄ້າແມ່ນມີຫລາຍດ້ານທີ່ພົ້ນເດັ່ນເປັນຕົ້ນແມ່ນການຜະລິດອຸດສາຫະກໍາປຸງແຕ່ງ ແລະ ຫັດຖະກໍາແມ່ນສືບຕໍ່ຂະຫຍາຍຕົວ ໂດຍມີມູນຄ່າລວມທັງຫມົດ 5.031 ຕື້ກີບ ເກີນແຜນ 14,14% ແລະ ເພີ່ມຂຶ້ນ 29,12% ທຽບໃສ່ປີຜ່ານມາ, ໃນນັ້ນ ອຸດສາຫະກໍາປຸງແຕ່ງມີ 3.379,20 ຕື້ກີບ ກວມເອົາ 96% ແລະ ຫັດຖະກໍາມີ 140,80 ຕື້ກີບ ກວມ 4% ຂອງ ມູນຄ່າການຜະລິດອຸດສາຫະກຳປຸງແຕ່ງ ແລະ ຫັດຖະກໍາ. ມາຮອດປະຈຸບັນ ໃນທົ່ວປະເທດມີທັງຫມົດ 60 ເຂດອຸດສາຫະກໍາ, ມີເນື້ອທີ່ 18.927,14 ເຮັກຕາ ແລະ ມີໂຮງງານທັງຫມົດ 196 ໂຮງງານ.
ສ່ວນການລົງທຶນຢູ່ໃນນິຄົມອຸດສາຫະກໍາ ແລະ ການຄ້າວຽງຈັນ-ໂນນທອງ ປະຈຸບັນມີນັກລົງທຶນຕ່າງປະເທດຈັບຈອງ ແລະ ລົງທະບຽນທັງຫມົດ 17 ບໍລິສັດ, ສ່ວນຫລາຍແມ່ນມາຈາກຈີນ, ຍີ່ປຸ່ນ ແລະ ໄທ ລວມມີທຶນຈົດທະບຽນຫລາຍກວ່າ 30,06 ລ້ານໂດລາສະຫະລັດ ໂດຍທຶນດັ່ງກ່າວແມ່ນໃຊ້ເຂົ້າໃນການກໍ່ສ້າງໂຮງງານຜະລິດເຄື່ອງເອເລັກໂຕຣນິກ, ເຄື່ອງໄຟຟ້າ, ອຸປະກອນການຮັບໃຊ້ການຜະລິດອຸດສາຫະກໍາ ແລະ ການບໍລິການ. ນອກນັ້ນ ດ້ານນິຄົມອຸດສາຫະກໍານະຄອນຫລວງວຽງຈັນຫລັກ 21 ປະຈຸບັນນີ້ ມີນັກລົງທຶນຕ່າງປະເທດຈັບຈອງ ແລະ ໄດ້ແບ່ງໃຫ້ໂຄງການສຳຫລວດເພື່ອສ້າງເປັນເຂດປຸງແຕ່ງ ເພື່ອສົ່ງອອກໃນເນື້ອທີ່ 140 ເຮັກຕາ ແລະ ເຫັນວ່າມີນັກລົງທຶນເຂົ້າໄປສ້າງຕັ້ງໂຮງງານ ແລະ ດໍາເນີນການຜະລິດແລ້ວ 31 ໂຮງງານ.
ປະຈຸບັນນີ້ມີຈຳນວນໂຮງງານອຸດສາຫະກໍາປຸງແຕ່ງ ແລະ ຫັດຖະກໍາທັງຫມົດ 38.126 ຫົວຫນ່ວຍ, ໃນນັ້ນ ມີໂຮງງານອຸດສາຫະກໍາປຸງແຕ່ງທີ່ເປັນທ່າແຮງດ້ານເສດຖະກິດຕົ້ນຕໍໂຮງງານເບຍລາວ, ແປ້ງມັນຕົ້ນ, ຢາສູບ, ຢາງພາລາ ແລະ ໂຮງງານປຸງແຕ່ງຈາກພືດກະສິກໍາຈໍານວນຫນຶ່ງ.
ສະເພາະປີ 2012-2013 ມີໂຮງງານອຸດສາຫະກໍາປຸງແຕ່ງເພີ່ມຂຶ້ນ 1.263 ຫົວຫນ່ວຍ ໃນນີ້ລວມມີໂຮງງານຂະຫນາດນ້ອຍແບບຄອບຄົວຕົ້ນຕໍແມ່ນໂຮງສີເຂົ້າ, ໂຮງງານນ້ໍາກ້ອນ, ໂຮງງານເສັ້ນຫມີ່-ເສັ້ນເຝີ, ໂຮງງານດິນບ໋ອກດິນຈີ່ ແລະ ອື່ນໆ.
ສ່ວນຫັດຖະກໍາເປັນຕົ້ນແມ່ນຫັດຖະກໍາຕ່ໍາຫູກ, ຕ່ໍາແຜ່ນ, ຍ້ອມສີທໍາມະຊາດ, ຈັກສານ ແລະ ແກະສະຫລັກໄມ້ ເຫັນວ່າມີການຂະຫຍາຍຕົວຢ່າງຕໍ່ເນື່ອງ ເຊິ່ງໄດ້ກາຍເປັນຜົນດີຕໍ່ການສ້າງວຽກເຮັດງານທໍາ ແລະ ສ້າງລາຍໄດ້ໃຫ້ແກ່ຄອບຄົວໃຫ້ສາມາດຫລຸດຜ່ອນຄວາມທຸກຍາກລົງເທື່ອລະກ້າວ ແລະ ອັນພົ້ນເດັ່ນອີກອັນຫນຶ່ງໃນສົກປີຜ່ານມານີ້ແມ່ນມີໂຮງງານອຸດສາຫະກຳເບົາ ແລະ ໂຮງງານປຸງແຕ່ງຂະຫນາດກາງ-ໃຫຍ່ ເພີ່ມຂຶ້ນ 6 ແຫ່ງ ເຊິ່ງປະກອບມີໂຮງງານປຸງແຕ່ງກາເຟສຳເລັດຮູບຂອງກຸ່ມບໍລິສັດດາວເຮືອງຈໍາກັດ, ໂຮງງານນໍ້າຕານ, ໂຮງງານພະລັງງານຄວາມຮ້ອນ, ໂຮງງານປຸງແຕ່ງຢາງພາລາຂອງກຸ່ມບໍລິສັດຮວ່າງແອງຢາລາຍ ແຂວງອັດຕະປື, ໂຮງງານຜະລິດກ້ອງຖ່າຍຮູບນີຄອນ ແລະ ໂຮງງານປະກອບລົດຮຸນໄດຄົບຊຸດ ຢູ່ແຂວງສະຫວັນນະເຂດ.
ຢ່າງໃດກໍ່ຕາມມູນຄ່າການຄ້າຍັງບໍ່ສາມາດປະຕິບັດໄດ້ເທົ່າທີ່ຄວນ ໂດຍສະເພາະມູນຄ່າການສົ່ງອອກປະຕິບັດໄດ້ 1.898,38 ລ້ານໂດລາສະຫະລັດ ຫລຸດແຜນການ 7,84% ທຽບໃສ່ໄລຍະດຽວຂອງປີຜ່ານມາ ເພີ່ມຂຶ້ນ 18,49%, ສ່ວນມູນຄ່າຂອງການນໍາເຂົ້າປະຕິບັດໄດ້ 2.813,93 ລ້ານໂດລາລື່ນແຜນການ 21,85% ເພີ່ມຂຶ້ນ 3,45% ເມື່ອທຽບໃສ່ໄລຍະດຽວຂອງປີຜ່ານມາຈິ່ງເຮັດໃຫ້ ລາວຂາດດຸນການຄ້າເຖິງ 915,55 ລ້ານໂດລາສະຫະລັດ.
ສາເຫດພາໃຫ້ການນໍາເຂົ້າສິນຄ້າເພີ່ມຂຶ້ນແມ່ນເນື່ອງມາຈາກຄວາມຕ້ອງການວັດສະດຸ, ອຸປະກອນ ແລະ ເຄື່ອງມືຮັບໃຊ້ການຜະລິດ ແລະ ການກໍ່ສ້າງພື້ນຖານໂຄງລ່າງ ເປັນຕົ້ນແມ່ນບັນດາໂຄງການລົງທຶນຕ່າງໆລ້ວນແຕ່ຕ້ອງການນຳເຂົ້າສິນຄ້າ ເພື່ອຮັບໃຊ້ໂຄງການລົງທຶນພາຍໃນຕົ້ນຕໍແມ່ນນໍາເຂົ້າພາຫະນະ, ນ້ໍາມັນເຊື້ອໄຟ, ອາຍແກັສ, ເຄື່ອງກົນຈັກຮັບໃຊ້ການຜະລິດ, ອຸປະກອນກໍ່ສ້າງ ແລະ ອື່ນໆ.
ແຫລ່ງຂໍ້ມູນ:
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.