ການຄ້າລະຫວ່າງແຂວງສາລະວັນ ຂອງ ສປປ ລາວ ກັບ ຈັງຫວັດອຸບົນຣາດຊະທານີ, ປະເທດໄທ ໄດ້ມີການຂະຫຍາຍຕົວສູງ.

ການພົວພັນຊື້-ຂາຍລະຫວ່າງແຂວງສາລະວັນ ຂອງ ສປປລາວ ກັບ ຈັງຫວັດອຸບົນຣາດຊະທານີຂອງໄທ ຕາມປົກກະຕິແລ້ວແມ່ນຂະ ຫຍາຍຕົວໃນລະດັບທີ່ໜ້າເພິ່ງພໍໃຈ. ລະຫວ່າງແຂວງສາລະວັນ ແລະ ຈັງຫວັດອຸບົນຣາດຊະທານີ ມີດ່ານຊື້ - ຂາຍ ເປັນດ່ານລະດັບຊາດ 01 ຈຸດ ແລະ 05 ຈຸດ ເປັນດ່ານປະເພນີ ຈຶ່ງເຮັດໃຫ້ການພົວພັນຄ້າຂາຍມີຄວາມສະດວກສະບາຍ.

ຈາກການລາຍງານຂອງພະແນກອຸດສາຫະກຳ ແລະ ການຄ້າ ແຂວງສາລະວັນ ໄດ້ຊາບວ່າ: ໃນໄລຍະຜ່ານມາ ແຂວງສາລະວັນ ຂອງ ສປປ ລາວ ແລະ ຈັງຫວັດອຸບົນຣາດຊະທານີຂອງໄທ ໄດ້ພົວພັນຮ່ວມມືຮອບດ້ານ ບໍ່ວ່າຈະເປັນດ້ານການຄ້າ, ວັດທະນະທຳ, ການບໍລິການທ່ອງທ່ຽວ, ການລົງທຶນ ແລະ ອື່ນໆ ເຊິ່ງປະກອບສ່ວນໃນການຊຸກຍູ້ເສດຖະກິດ-ສັງຄົມ ຂອງແຂວງສາລະວັນ ໃຫ້ຂະຫຍາຍຕົວ ໃນລະດັບດີພໍສົມຄວນ, ເວົ້າສະເພາະ ພາກທຸລະກິດ ກໍຄືຜູ້ປະກອບການຢູ່ແຂວງສາລະວັນ ແລະ ຈັງຫວັດອຸບົນຣາດຊະທານີ ໄດ້ພົວພັນຊື້ຂາຍຮ່ວມກັນຢ່າງພົດຝື້ນຊຶ່ງສະແດງອອກ ໃນປີທີ່ຜ່ານມາ 2013 ມູນຄ່າການສົ່ງອອກບັນລຸໄດ້: 4,509,496.25 ໂດລາສະຫະລັດ ແລະ ມູນຄ່າການນຳເຂົ້າບັນລຸ: 1,483,870.46 ໂດລາສະຫະລັດ, ເຫັນໄດ້ວ່າມູນຄ່າການສົ່ງອອກສູງກວ່າມູນຄ່າການນຳເຂົ້າເຖິງ 203.9%. ປະເພດສິນຄ້າສົ່ງອອກຫຼັກ ປະກອບມີ: ມັນຕົ້ນແຫ້ງ, ສາລີອົບແຫ້ງ ແລະ ອື່ນໆ ຊຶ່ງສ່ວນໃຫຍ່ແມ່ນສິນຄ້າກະສິກຳ. ສະນັ້ນ, ການຂາດພື້ນຖານໂຄງລ່າງໃນການກວດສິນຄ້າກະສິກຳເພື່ອຢັ້ງຢືນສຸຂານາໄມ ແລະ ສຸຂານາໄມພືດ ຈຶ່ງສ້າງຂໍ້ຈຳກັດ ແລະ ຄວາມຫຍຸ້ງຍາກໃຫ້ແກ່ການສົ່ງອອກຂອງແຂວງສາລະວັນບໍ່ໜ້ອຍ ເພາະໃນສະພາບຕົວຈິງແຂວງສາລະວັນ ຍັງບໍ່ມີຫ້ອງກວດສັດຕູພືດ ສະນັ້ນ, ເພື່ອປະກອບເອກະສານຢັ້ງຢືນສຸຂານາໄມ ແລະ ສຸຂານາໄມພືດ ຕ້ອງໄດ້ໄປປະກອບເອກະສານຢູ່ແຂວງຈຳປາສັກ, ຊຶ່ງແກ່ຍາວເວລາ ແລະ ເຮັດໃຫ້ຜູ້ປະກອບການຕ້ອງມີຄ່າຊິ້ນເປືອງຕື່ມອີກ.

ເພື່ອສ້າງເງື່ອນໄຂ ແລະ ໂອກາດໃນການເຮັດທຸລະກິດຂອງຜູ້ປະກອບການຝ່າຍລາວ, ແຂວງສາລະວັນຈຶ່ງໄດ້ຄົ້ນຄວ້າຊອກຫາວິທີທີ່ຈະ ຊ່ວຍໃຫ້ຜູ້ປະກອບການຂອງລາວໄດ້ຮັບຜົນປະໂຫຍດຢ່າງໜ້າພໍໃຈ ເຮັດໃຫ້ກົນໄກການຮ່ວມມືທາງເສດຖະກິດ-ສັງຄົມ ລະຫວ່າງແຂວງສາລະວັນ ຂອງ ສປປ ລາວ ແລະ ຈັງຫວັດອຸບົນຣາດຊະທານີຂອງໄທ ນັບມື້ນັບຫຼາຍຂື້ນ ເຊັ່ນ:

ການສົ່ງສິນຄ້າອອກໄປປະເທດໄທແມ່ນມີຄວາມສະດວກ, ຄ່ອງຕົວຂຶ້ນກວ່າເກົ່າ ເພາະການນຳລະດັບຂັ້ນກະຊວງກໍ່ຄືທ້ອງຖິ່ນຂອງປະເທດໄດ້ມີການປະສານຮ່ວມມື ກັນລະອຽດພໍສົມຄວນ;
ຈັດກອງປະຊຸມໃຫ້ພົບປະແລກປ່ຽນ ຈັບຄູ່ທຸລະກິດ ລະຫວ່າງຜູ້ປະກອບການຝ່າຍລາວ ແລະ ໄທ ເຊິ່ງແຂກຈາກຝ່າຍໄທພ້ອມທັງຜູ້ປະກອບການຂອງໄທ ຈຳນວນ 96 ທ່ານ ໄດ້ເຂົ້າຮ່ວມ;
ຈັດຕັ້ງປະຕິບັດສັນຍາສັນຍາຜູກພັນສອງສົ້ນ ຊຶ່ງທີ່ຜ່ານມາແຂວງສາລະວັນໄດ້ເຊັນສັນຍາຜູກພັນສອງສົ້ນ (Contract farming) ກັບ ຈັງຫວັດອຸບົນຣາດຊະທານີຂອງໄທ 11 ສັນຍາ, ເຮັດໃຫ້ແຂວງສາລະວັນມີຄູ່ຮ່ວມທຸລະກິດຫຼາຍຂຶ້ນ (ລະຫວ່າງຜູ້ປະກອບ ການຝ່າຍລາວ ແລະ ຜູ້ປະກອບການໄທ)

ການລົງທຶນຂອງນັກທຸລະກິດໄທ ສ່ວນໃຫ່ຍແມ່ນລົງທຶນໂດຍກົງເຂົ້າໃນຂົງເຂດວຽກງານກະສິກຳ ເພາະວ່າຂະແໜງການນີ້ເປັນພື້ນ ຖານເສດຖະກິດຂອງລາວ ແລະ ໄທ. ນອກຈາກນັ້ນ, ຍັງມີບັນດານັກທຸລະກິດທີ່ມີການຮ່ວມມືໃນຂົງເຂດອື່ນໆອີກດ້ວຍ.

ເພື່ອສືບຕໍ່ປັບປຸງ ແລະ ພັດທະນາການຮ່ວມມືດ້ານການຄ້າລະຫວ່າງ ແຂວງສາລະວັນ ຂອງ ສປປ ລາວ ແລະ ຈັງຫວັດອຸບົນຣາດຊະທານີຂອງໄທ ຈຳເປັນຕ້ອງໄດ້ເອົາໃຈໃສ່ສ້າງຂີດຄວາມສາມາດໃຫ້ແກ່ພະນັກງານການຄ້າແຂວງໃນຫົວຂໍ້: ຝຶກອົບຮົມ ແລະ ແລກປ່ຽນ ຖອດຖອນບົດຮຽນກ່ຽວກັບການຄ້າຊາຍແດນຂອງ ສປປ ລາວ ແລະ ໄທ, ຝຶກອົບຮົມແປຮູບສິນຄ້າການກະເສດ, ຄຸ້ມຄອງລາຄາສິນຄ້າ ແລະ ການປຸງແຕ່ງຜະລິດຕະພັນກະສິກຳ; ແລະ ຊຸກຍູ້ການດຶງດູດການລົງທຶນຈາກພາກເອກະຊົນທັງ ລາວ ແລະ ໄທ ໃຫ້ໄດ້ຮັບຜົນປະໂຫຍດຢ່າງສົມເຫດສົມຜົນ.

ແຫຼ່ງຂໍ້ມູນ: ພະແນກອຸດສາຫະກຳ ແລະ ການຄ້າ ແຂວງສາລະວັນ

ທ່ານຄິດວ່າຂໍ້ມູນນີ້ມີປະໂຫຍດບໍ່?
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.

Your opinion matters!

ຂອບໃຈ ສຳລັບຄຳຄິດເຫັນຂອງທ່ານ.