ກອງປະຊຸມຄັ້ງທີ 01 ຂອງໜ່ວຍງານທົບທວນຄືນມາດຕະການທາງດ້ານການຄ້າທີບໍ່ແມ່ນພາສີ ໄດ້ໄຂຂື້ນເປັນຄັ້ງທຳອິດ ເພື່ອເປີດເວທີແລກ ປ່ຽນລະຫວ່າງຈຸດປະສານງານຂອງວຽກ NTMs ທີ່ໄດ້ແຕ່ງຕັ້ງຈາກຂະແໜງການທີ່ກ່ຽວຂ້ອງ. ພ້ອມກັນນັ້ນ, ຍັງມີການນຳສະ ເໜີແນວ ຄວາມຄິດຂອງມາດຕະການທາງດ້ານການຄ້າທີ່ບໍ່ແມ່ນພາສີ ເພື່ອສ້າງຄວາມເຂົ້າໃຈ ແລະ ເປັນເອກະພາບກັນຕໍ່ແນວຄວາມຄິດດັ່ງກ່າວ, ພ້ອມນັ້ນ ຍັງມີການນຳສະເໜີຈຸດປະສົງ ແລະ ລະດັບຄາດໝາຍຂອງໂຄງການທົບທວນ ແລະ ປັບປຸງມາດຕະການທາງດ້ານການຄ້າທີ່ບໍ່ແມ່ນພາສີ ແລະ ນຳສະເໜີຕາມຕາຕະລາງສັງລວມຂໍ້ມູນກ່ຽວກັບມາດຕະການ NTMs ເພື່ອອະທິບາຍຄືນວິທີຕື່ມຂໍ້ມູນໃສ່ໃນຕາຕະລາງ.
ທ່ານ ນາງ ບານສະຕິ ເທບພະວົງ ໄດ້ມີຄຳເຫັນວ່າ ພາຍຫຼັງທີ່ ສປປ ລາວ ໄດ້ເຂົ້າເປັນສາມະຊິກອົງການການຄ້າໂລກຢ່າງສົມບູນໃນຕົ້ນປີ 2013 ເປັນຕົ້ນມາ ສປປ ລາວ ກໍມີພັນທະໃນການລົບລ້າງບັນດາມາດຕະການທີ່ບໍ່ຈຳເປັນທີ່ສ້າງຂໍ້ຈຳກັດທາງດ້ານການຄ້າເທື່ອລະກ້າວ. ສະນັ້ນ, ສປປ ລາວ ຕ້ອງໄດ້ຈັດແຈງບັນດາມາດຕະການທາງດ້ານການຄ້າທີ່ບໍ່ແມ່ນພາສີໃຫ້ມີຄວາມງ່າຍດາຍ ແລະ ສອດຄ່ອງກັບລະ ບຽບການ ຂອງສາກົນ. ເຊິ່ງໃນທາງກົງກັນຂ້າມ ກໍ່ຈະປະກອບສ່ວນປັບປຸງສະພາບແວດລ້ອມທາງດ້ານການຄ້າຂອງ ສປປ ລາວ ໃຫ້ເອື້ອອຳນວຍ ຕໍ່ຜູ້ດຳເນີນທຸລະກິດການຄ້າໃຫ້ຫຼາຍຂື້ນ. ການທົບທວນຄືນກ່ຽວກັບ ມາດຕະການທາງດ້ານການຄ້າທີ່ບໍ່ແມ່ນພາສີ ຖືເປັນວຽກບູລິມະສິດໜຶ່ງຂອງລັດຖະບານທີ່ຕ້ອງໄດ້ເອົາໃຈໃສ່ຕໍ່ວຽກງານດັ່ກ່າວ ຍ້ອນວ່າວຽກງານນີ້ແມ່ນວຽກງານໜຶ່ງທີ່ຕິດພັນກັບຫຼາຍຂະແໜງການ ສະນັ້ນ, ຈຶ່ງຮຽກຮ້ອງໃຫ້ຂະແໜງການທີ່ກ່ຽວຂ້ອງ ທີ່ເຮັດວຽກປິ່ນອ້ອມກັບວຽກງານອໍານວຍຄວາມສະດວກທາງດ້ານການຄ້າ ມີການປະສານງານຮ່ວມມືກັນຢ່າງຫ້າວຫັນ ແລະ ກົມກຽວ ເພື່ອພ້ອມກັນຄົ້ນຄວ້າວິໄຈບັນດາມາດຕະການ, ນິຕິກຳທີ່ແຕ່ລະຂະແໜງການວາງອອກໃຫ້ສາມາດບັນລຸຕາມຈຸດປະສົງທີ່ກ່າວມາຂ້າງເທິງ ເພື່ອຮັບປະກັນມາດຕະການທີ່ຖືກນຳໃຊ້ຢູ່ນັ້ນ ບໍ່ໃຫ້ກາຍເປັນສິ່ງກີດຂວາງທາງດ້ານການຄ້າທີ່ບໍ່ຈຳເປັນ ແລະ ກໍ່ເພື່ອສ້າງສິ່ງອຳນວຍຄວາມສະດວກໃຫ້ແກ່ການເຄື່ອນຍ້າຍສິນຄ້າໃຫ້ສາມາດດຳເນີນໄປໄດ້ຢ່າງສະດວກ ສະບາຍ, ວ່ອງໄວ ແລະ ສອດຄ່ອງກັບລະບຽບສາກົນ.
ກອງປະຊຸມສຳມະນາໃນຄັ້ງນີ້ ໄດ້ດຳເນີນໄປດ້ວຍບັນຍາກາດອັນດີ ຊຶ່ງໄດ້ມີການແລກປ່ຽນຄຳຄິດຄຳເຫັນຢ່າງກົງໄປກົງມາ, ບັນດາຜູ້ເຂົ້າຮ່ວມໄດ້ໃຫ້ຄວາມສົນໃຈ ແລະ ສະໜັບສະໜູນເອົາໃຈໃສ່ຕໍ່ວຽກງານດັ່ງກ່າວ ເພື່ອໃຫ້ວຽກງານນີ້ມີປະສິດທິຜົນ, ຖືກເປົ້າໝາຍ ແລະ ໄປໃນລວງດຽວກັນ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.