ລະບົບແຈ້ງພາສີອັດຕະໂນມັດ ແມ່ນນອນໃນໂຄງການອໍານວຍຄວາມສະດວກທາງດ້ານພາສີ ແລະ ການຄ້າ (CTFP). ໂຄງການນີ້ປະກອບດ້ວຍ 2 ອົງປະກອບຕົ້ນຕໍຄື: (1) ປັບປຸງປະສິດທິຜົນ (ສຸມໃສ່ການຫັນວຽກງານພາສີເປັນອັດຕະໂນມັດ ໂດຍນໍາໃຊ້ເຕັກໂນໂລຊີຂໍ້ມູນຂ່າວສານ ແລະ ການສື່ສານ); (2) ປັບປຸງປະສິດທິພາບ (ສຸມໃສ່ການປັບປຸງພາສີໃຫ້ທັນສະໄໝດ້ວຍການປັບປຸງນິຕິກໍາ, ລະບຽບການພາສີ ແລະ ພັດທະນາຂີດຄວາມສາມາດດ້ານວິຊາ ສະເພາະຂອງພະນັກງານ ແລະ ເຈົ້າໜ້າທີ່ພາສີ ໃຫ້ທຽບເທົ່າກັບສາກົນ).
ຈຸດປະສົງຂອງການນຳໃຊ້ລະບົບດັ່ງກ່າວເພື່ອເພີ່ມທະວີການອຳນວຍຄວາມສະດວກທາງດ້ານພາສີ ແລະ ການຄ້າ ໂດຍຍົກລະດັບປະສິດ ທິພາບ ແລະ ປະສິດທິຜົນຂອງວຽກງານການຄຸ້ມຄອງ ແລະ ບໍລິການດ້ານພາສີ ດ້ວຍການຄັດຈ້ອນຂັ້ນຕອນດ້ານພາສີໃຫ້ງ່າຍຂຶ້ນ, ລົບລ້າງຂັ້ນຕອນທີ່ຊໍ້າຊ້ອນ-ບໍ່ຈຳເປັນ, ຫຼຸດຜ່ອນຄ່າໃຊ້ຈ່າຍ ແລະ ເວລາໃນການແຈ້ງພາສີ, ຍົກສູງຄວາມຮັບຜິດຊອບ ແລະ ເພີ່ມທະວີຄວາມໂປ່ງໃສໃນການປະຕິບັດວຽກງານຂອງເຈົ້າໜ້າທີ່ພາສີ.
ລະບົບແຈ້ງພາສີອັດຕະໂນມັດ (ASYCUDA) ເປັນລະບົບຄຸ້ມຄອງ ແລະ ບໍລິການແຈ້ງພາສີເຂົ້າໃນແບບຟອມ ເອເລັກໂຕຣນິກດ້ວຍ ຕົນເອງ. ຜູ້ແຈ້ງພາສີຕ້ອງປະຕິບັດຕາມຂັ້ນຕອນການແຈ້ງພາສີເປັນລາຍລະອຽດຕາມ ມາດຕາ 22ຂອງກົດໝາຍວ່າດ້ວຍພາສີສະບັບ ເລກທີ 04/ສພຊ, ລົງວັນທີ 20 ທັນວາ 2011. ພາຍຫຼັງຂໍ້ມູນການແຈ້ງພາສີໄດ້ຖືກສົ່ງເຂົ້າຫາລະບົບ ເຈົ້າໜ້າທີ່ພາສີ ກໍ່ສາມາດດຳເນີນ ຂັ້ນຕອນການກວດຂໍ້ມູນ ແລະ ເອກະສານປະກອບການແຈ້ງພາສີ ໃນລະບົບໂດຍກົງ.
ລະບົບແຈ້ງພາສີອັດຕະໂນມັດ (ASYCUDA) ໄດ້ນຳໃຊ້ລະບົບບໍລິຫານຄວາມສ່ຽງເຂົ້າໃນການຄວບຄຸມ ແລະ ກວດກາສິນຄ້າເຊິ່ງ ແບ່ງເປັນ 3 ປະເພດຄວາມສ່ຽງຄື: ຄວາມສ່ຽງສູງ, ຄວາມສ່ຽງປານກາງ ແລະ ຄວາມສ່ຽງຕ່ຳ. ມີພຽງສິນຄ້າທີ່ມີຄວາມສ່ຽງສູງເທົ່ານັ້ນ ຈິ່ງຈະຖືກກວດກາຕົວຈິງ, ສ່ວນສິນຄ້າທີີ່ມີຄວາມສ່ຽງປານກາງຈະຖືກກວດກາດ້ານເອກະສານ ແລະ ສຳລັບສິນຄ້າທີ່ມີຄວາມສ່ຽງຕ່ຳ ແມ່ນຈະໄດ້ຮັບການກວດປ່ອຍທັນທີ. ການນຳໃຊ້ກົນໄກນີ້ເຮັດໃຫ້ການແຈ້ງພາສີສະດວກ, ວ່ອງໄວ, ສອດຄ່ອງກັບການປະຕິບັດຂອງ ສາກົນ.
ກົມພາສີໄດ້ຮັບທຶນຊ່ວຍເຫຼືອລ້າຈາກທະນາຄານໂລກ ໃນການສ້າງລະບົບແຈ້ງພາສີອັດຕະໂນມັດ (ASYCUDA) ນັບແຕ່ເດືອນກໍລະກົດ ປີ 2010 ຈົນເຖິງ ເດືອນມີຖຸນາ 2011. ລະບົບຕົ້ນແບບຂອງລະບົບອາຊິກຸດາໄດ້ສໍາເລັດພາຍໃນເວລາ 12 ເດືອນ, ການສ້າງລະບົບດັ່ງກ່າວໄດ້ກຳນົດໃຫ້ລະບົບມີຄວາມສອດຄ່ອງກັບບັນດານິຕິກໍາ, ໃນໄລຍະດຽວກັນນັ້ນກໍ່ໄດ້ສ້າງປຶ້ມຄູ່ມືການນໍາໃຊ້ລະບົບ ພ້ອມທັງຈັດຝຶກອົບຮົມການນໍາໃຊ້ລະບົບໃຫ້ແກ່ເຈົ້າໜ້າທີ່ພາສີ ແລະ ຜູ້ປະກອບການ. ລະບົບອາຊິກຸດາເລີ່ມທົດລອງນຳໃຊ້ ຢູ່ດ່ານ ຂົວມິດຕະພາບ 1 ເປັນດ່ານທຳອິດໃນ ສປປ ລາວ ນັບແຕ່ເດືອນກໍລະກົດ 2011 ເຖິງ ເດືອນມີຖຸນາ 2012. ຄຽງຄູ່ກັບການນໍາໃຊ້ລະບົບຕົວຈິງ, ຍັງມີການປັບປຸງຫ້ອງການ ແລະ ລະບົບເຄືອຄ່າຍພາຍໃນດ່ານ ເພື່ອຮັບຮອງການນໍາໃຊ້ລະບົບ, ສືບຕໍ່ຈັດຝຶກອົບຮົມການນໍາໃຊ້ລະບົບ ແລະ ການສະໜອງເຄື່ອງຄອມພິວເຕີ-ເຟີນີເຈີເພີ່ມຕື່ມ ເພື່ອອໍານວຍຄວາມສະດວກໃຫ້ແກ່ການປະຕິບັດວຽກງານດັ່ງກ່າວຂອງເຈົ້າໜ້າທີ່ພາສີປະຈຳດ່ານ ແລະ ຜູ້ມາໃຊ້ບໍລິການທົ່ວໄປ. ລະບົບອາຊິກຸດາໄດ້ຂະຫຍາຍການນໍາໃຊ້ ລົງສູ່ 10 ດ່ານພາສີສາກົນ ໃນຂອບເຂດທົ່ວປະເທດຄື: ດ່ານພາສີສາກົນ ນໍ້າພາວ, ດ່ານພາສີສາກົນແດນ ສະຫວັນ, ດ່ານພາສີສາກົນ ບໍ່ເຕັນ, ດ່ານພາສີສາກົນ ຫ້ວຍຊາຍ, ດ່ານພາສີສາກົນ ຂົວມິດຕະພາບ 2, ດ່ານພາສີສາກົນ ວັງເຕົາ, ດ່ານພາສີສາກົນ ນໍ້າໂສຍ, ດ່ານພາສີສາກົນ ຂົວມິດຕະພາບນໍ້າເຫືອງ, ດ່ານພາສີສາກົນ ຂົວມິດຕະພາບ 3 ແລະ ດ່ານພາສີສາກົນ ສະໜາມບີນວັດໄຕ.
ກົມພາສີໄດ້ສໍາເລັດການຕິດຕັ້ງລະບົບແຈ້ງພາສີອັດຕະໂນມັດ ຢູ່ 11 ດ່ານພາສີສາກົນ ໃນຂອບເຂດທົ່ວປະເທດ ພາຍໃນປີ 2013. ແຜນການໃນຕໍ່ໜ້າກົມພາສີຈະຂະຫຍາຍການຕິດຕັ້ງລະບົບແຈ້ງພາສີອັດຕະໂນມັດ ລົງສູ່ 12 ດ່ານພາສີສາກົນຄື: ດ່ານປາກຊັນ, ດ່ານ ໜອງນົກຂຽນ, ດ່ານພູເກືອ, ດ່ານນ້ຳກັນ, ດ່ານບ້ານມອມ, ດ່ານສົມຫວັງ, ດ່ານປາງຫົກ, ດ່ານນ້ຳເງິນ, ດ່ານນ້ຳເພົ້າ, ດ່ານສະໜາມບິນປາກເຊ, ດ່ານສະໜາມບິນຫຼວງພະບາງ ແລະ ດ່ານປາດູ່ ຈັດບຸລິມະສິດຕາມລຳດັບ. ການນໍາໃຊ້ລະບົບດັ່ງກ່າວໄດ້ເຮັດໃຫ້ການແຈ້ງພາສີຢູ່ດ່ານພາສີສາກົນເຫຼົ່ານັ້ນ ມີຄວາມສະດວກ, ວ່ອງໄວ ແລະ ທັນສະໄໝຂຶ້ນກວ່າເກົ່າ. ຜົນສໍາເລັດດັ່ງກ່າວສາມາດຍົກລະດັບວຽກງານພາສີໃຫ້ທັນສະໄໝຂຶ້ນອີກກ້າວໜຶ່ງ. ລະບົບແຈ້ງພາສີອັດຕະໂນມັດ ນອກຈາກຈະສ້າງຄວາມສະດວກ-ວ່ອງໄວ ໃນການແຈ້ງພາສີແລ້ວ ຍັງໄດ້ຍົກລະດັບຄວາມຮູ້, ຄວາມສາມາດ ແລະ ທັກສະ ໃຫ້ແກ່ເຈົ້າຫນ້າທີ່ພາສີ ແລະ ຜູ້ປະກອບການໃນການນຳໃຊ້ລະບົບດັ່ງກ່າວ, ທັງເປັນການຈັດຕັ້ງຜັນຂະຫຍາຍກົດຫມາຍ ວ່າດ້ວຍພາສີ ທີ່ອະນຸຍາດໃຫ້ດຳເນີນຂັ້ນຕອນການແຈ້ງພາສີຜ່ານທາງເອເລັກໂຕຣນິກ ແລະ ສອດຄ່ອງກັບແຜນຍຸດທະສາດຂອງກົມພາສີ ທີ່ວາງຄາດຫມາຍພັດທະນາວຽກງານພາສີໃຫ້ມີຄວາມທັນສະໄຫມ, ໂປ່ງໃສ, ຊຳນານງານ, ທ່ຽງທໍາ ແລະ ຫນ້າເຊື່ອຖື. ພ້ອມດຽວກັນນັ້ນ. ກໍ່ເປັນການປະຕິບັດແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດຂອງລັດຖະບານ ໃນການເພີ່ມທະວີການຮ່ວມມື ແລະ ເຊື່ອມໂຍງເຂົ້າສູ່ສາກົນ.
ການນຳໃຊ້ລະບົບແຈ້ງພາສີອັດຕະໂນມັດ ຢູ່ຕາມດ່ານພາສີຈະເປັນຜົນສຳເລັດອັນສຳຄັນຂອງວຽກງານອຳນວຍຄວາມສະດວກທາງດ້ານພາສີ ແລະ ການຄ້າ. ດັ່ງນັ້ນ, ຍັງຈະຕ້ອງໄດ້ສືບຕໍ່ພັດທະນາລະບົບດັ່ງກ່າວໃຫ້ທັນສະໄໝຂື້ນເລື້ອຍໆ ແນໃສ່ເພີ່ມທະວີ ການອຳນວຍຄວາມສະດວກທາງດ້ານພາສີ ແລະ ການຄ້າ, ຕອບສະຫນອງໄດ້ການຈັດຕັ້ງປະຕິບັດວຽກງານວິຊາການສະເພາະພາສີ ແລະ ສອດຄ່ອງກັບແນວທາງປະຕິບັດ ແລະ ລະບຽບການຄ້າສາກົນ. ພ້ອມດຽວກັນນັ້ນ, ກົມພາສີກໍ່ຈະສຶບຕໍ່ຂະຫຍາຍການຕິດຕັ້ງລະບົບດັ່ງກ່າວ ໃຫ້ກວມເອົາບັນດາດ່ານພາສີສາກົນໃນຂອບເຂດທົ່ວປະເທດ ແນໃສ່ເຮັດໃຫ້ການແຈ້ງພາສີຜ່ານລະບົບເອເລັກໂຕຣນິກກວມເອົາ 90% ຂອງການແຈ້ງພາສີຜ່ານລະບົບອິນເຕີເນັດໄດ້.
ຄຽງຄູ່ກັນນັ້ນກໍຍັງມີສິ່ງທ້າທາຍຫຼາຍຢ່າງເຊັ່ນ: 1)ການເຊື່ອມໂຍງຂໍ້ມູນກັບຫລາຍຂະແຫນງການຂອງພາກລັດເພື່ອສາມາດແລກປ່ຽນຂໍ້ມູນ ເຊິ່ງກັນ ແລະ ກັນ ຜ່ານລະບົບເອເລັກໂຕຣນິກຍັງມີຄວາມຈຳກັດ ເຊັ່ນ: ກົມສ່ວຍສາອາກອນ, ຂະແໜງອຸດສາຫະກຳ-ການຄ້າ, ຄັງເງິນ, ທະນາຄານ ແລະ ອື່ນໆ; 2) ຄວາມຢືນຢົງຂອງການນຳໃຊ້ລະບົບແຈ້ງພາສີອັດຕະໂນມັດ ແລະ ການພັດທະນາຢ່າງຕໍ່ເນື່ອງຂອງລະບົບດັ່ງກ່າວ; 3)ການຮັບຮູ້ຂອງສັັງຄົມ ກ່ຽວກັບ ພາສີແບບອັດຕະໂນມັດຍັງຈຳກັດ; 4) ການນຳໃຊ້ເວລາໃນແຈ້ງພາສີໃຫ້ມີຄວາມສະດວກ-ວ່ອງໄວທຽບເທົ່າກັບສາກົນ (ການນຳໃຊ້ເວລາໃນແຈ້ງພາສີຍັງຫຼາຍຢູ່ເມື່ອທຽບໃສ່ປະເທດອ້ອມຂ້າງທີ່ກ້າວໜ້າ); 5)ການສະຫນອງຂໍ້ມູນດ້ານການສົ່ງອອກ-ນຳເຂົ້າສິນຄ້າໃຫ້ຂະແຫນງການກ່ຽວຂ້ອງ; ສັນຍານໂທລະຄົມ ແລະ ເຄືອຄ່າຍໄຟຟ້າ ແຕ່ລະດ່ານຍັງມີຂໍ້ຈຳກັນຢູ່; 6)ຄວາມສາມາດໃນການນຳໃຊ້ລະບົບຂອງເຈົ້າໜ້າທີ່ພາສີ ແລະ ການແກ້ໄຂບັນຫາດ້ານເຕັກນິກໃນລະດັບພື້ນຖານຍັງບໍ່ທັນຄ່ອງແຄ້ວ; 7)ການບຳລຸງຮັກສາອຸປະກອນໄອທີທີ່ຮັບໃຊ້ລະບົບແຈ້ງພາສີອັດຕະໂນມັດຍັງເຮັດບໍ່ໄດ້ດີ; ແລະ 8)ການຂະຫຍາຍລະບົບແຈ້ງພາສີອັດຕະໂນມັດລົງສູ່ ແຕ່ລະດ່ານພາສີໃນຂອບເຂດທົ່ວປະເທດ ຍັງຂາດຄວາມພ້ອມຂອງພື້ນຖານໂຄງລ່າງ;
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.