ເພື່ອໃຫ້ສອດຄ່ອງກັບນະໂຍບາຍຂອງລັດຖະບານ ແຫ່ງ ສປປ ລາວ ໃນການປູກໄມ້ໃຫ້ເປັນສິນຄ້າ ສົ່ງອອກຕ່າງປະເທດ ແລະ ເພື່ອເປັນການອຳນວຍຄວາມສະດວກໃຫ້ແກ່ຜູ້ປະກອບການ ດ້ວຍການຫລຸດຜ່ອນຂອດຂັ້ນ ທີ່ບໍ່ຈຳເປັນໃນການສົ່ງອອກໄມ້ປູກ ໂດຍສອດຄ່ອງກັບນະໂຍບາຍ 3 ສ້າງ ໃນການມອບສິດ, ມອບຄວາມຮັບຜິດຊອບຈາກສູນກາງ ລົງສູ່ທ້ອງຖິ່ນ. ນາຍົກລັດຖະມົນຕີ ໄດ້ອອກຂໍ້ຕົກລົງ ສະບັບເລກທີ 41/ນຍ, ລົງວັນທີ 26 ມີນາ 2014 ວ່າດ້ວຍການມອບສິດໃຫ້ແຂວງ, ນະຄອນຫລວງ ເປັນຜູ້ຄົ້ນຄວ້າພິຈາລະນາອະນຸຍາດສົ່ງອອກໄມ້ປູກ ທີ່ເປັນໄມ້ທ່ອນ ແລະ ໄມ້ເລື່ອຍ, ໂດຍມອບໃຫ້ພະແນກອຸດສາຫະກຳ ແລະ ການຄ້າແຂວງ, ນະຄອນຫລວງ ເປັນເຈົ້າການໃນການຄົ້ນຄວ້າພິຈາລະນາອອກໃບອະນຸຍາດສົ່ງອອກໄມ້ປູກ ແລະມອບໃຫ້ພະແນກກະສິກຳ ແລະ ປ່າໄມ້ແຂວງ ຮັບຜິດຊອບຢັ້ງຢືນແຫລ່ງທີ່ມາຂອງໄມ້ປູກ ພ້ອມທັງເປັນເຈົ້າການຄຸ້ມຄອງ, ກວດກາ ແລະ ຕິດຕາມການເຄື່ອນຍ້າຍໄມ້ປູກອອກຕ່າງປະເທດ ເພື່ອຫລີກລ້ຽງບໍ່ໃຫ້ສວຍໂອກາດລັກລອບເອົາໄມ້ທຳມະຊາດ ແລະ ໄມ້ປູກທີ່ບໍ່ໄດ້ລະບຸໄວ້ໃນຂໍ້ຕົກລົງສະບັບດັ່ງກ່າວນີ້ ຊຸກເຊື່ອງໄປນຳ, ແລະ ມອບໃຫ້ກະຊວງອຸດສາຫະກຳ ແລະ ການຄ້າ ແລະ ກະຊວງກະສິກຳ ແລະ ປ່າໄມ້ ອອກບົດແນະນຳເພີ່ມເຕີມ ເພື່ອຜັນຂະຫຍາຍເນື້ອໃນຈິດໃຈຂອງຂໍ້ຕົກລົງສະບັບດັ່ງກ່າວນີ້ ໃຫ້ໄດ້ຮັບຜົນເປັນຢ່າງດີ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.