ເພື່ອເຮັດໃຫ້ການຄຸ້ມຄອງ ແລະ ນຳໃຊ້ພາຫະນະຂອງນັກການທູດ ແລະ ຊ່ຽວຊານຕ່າງປະເທດທີ່ມາປະຈຳຢູ່ ສປປ ລາວ ມີຄວາມເປັນລະບຽບຮຽບຮ້ອຍ ແລະ ສອດຄ່ອງກັບລະບຽບກົດໝາຍຂອງສປປ ລາວ ແລະ ສົນທິສັນຍາສາກົນທີ່ ສປປ ລາວ ເຂົ້າເປັນພາຄີ, ນາຍົກລັດຖະມົນຕີໄດ້ອອກຂໍ້ຕົກລົງວ່າດ້ວຍອະພິສິດ ແລະ ເອກະສິດທາງການທູດຕໍ່ການນຳໃຊ້ພາຫະນະ (ລົດ) ຢູ່ສປປ ລາວ ສະບັບເລກທີ 50/ນຍ, ລົງວັນທີ 1 ເມສາ 2014, ຂໍ້ຕົກລົງດັ່ງກ່າວອະນຸຍາດໃຫ້ນັກການທູດ, ພະນັກງານຊ່ວຍວຽກ ແລະ ຊ່ຽວຊານຕ່າງປະເທດທີ່ມາປະຈຳຢູ່ ສ ປປ ລາວ ສາມາດນຳເຂົ້າພາຫະນະມາຮັບໃຊ້ວຽກງານຂອງຕົນ ເປັນການສ່ວນຕົວຊົ່ວຄາວ ຊຶ່ງພາຫະນະຕ້ອງມີຄວາມແຮງບໍ່ເກີນ 2,500 ຊີຊີ. ພາສີອາກອນສຳລັບການນຳເຂົ້າລົດດັ່ງກ່າວແມ່ນສາມາດ ໄດ້ຮັບການຍົກເວັ້ນ ຜູ້ລະ 01 ຄັນ ໃນໄລຍະປະຕິບັດໜ້າທີ່ຢູ່ ສປປ ລາວ. ການນຳເຂົ້າລົດດັ່ງກ່າວແມ່ນໃຫ້ຄຸ້ມຄອງລວມສູນຢູ່ກະຊວງການຕ່າງປະເທດ ໃນການຂໍໃບອະນຸຍາດນຳເຂົ້າ ແລະ ຍົກເວັ້ນພາສີ, ອາກອນນຳເຂົ້າລົດຊົ່ວຄາວ, ການຂໍໃສ່ປ້າຍ ແລະ ປື້ມຜ່ານແດນລົດ ສໍາລັບປ້າຍ ສທ ແລະ ຂຕ. ລົດດັ່ງກ່າວສາມາດຂາຍ, ມອບໂອນໃຫ້ບຸກຄົນ, ນິຕິບຸກຄົນ ແລະ ການຈັດຕັ້ງອື່ນໆ ຢູ່ໃນສປປ ລາວ ໄດ້ ໃນກໍລະນີທີ່ ມີການນຳໃຊ້ມາແລ້ວເປັນເວລາ 03 ປີ ຫລື ເຈົ້າຂອງລົດໄດ້ສີ້ນສຸດການປະຕິບັດໜ້າທີ່ຢູ່ ສປປ ລາວ ແຕ່ຜູ້ຊື້ (ຄົນລາວ) ຕ້ອງໄດ້ເສຍພາສີ, ອາກອນ ແລະ ຄ່າທຳນຽມຕ່າງໆໃຫ້ຄົບຖ້ວນຕາມກົດໝາຍ ຂອງສປປລາວ ຂັ້ນຕອນດັ່ງກ່າວແມ່ນສົມທົບກັບ ກະຊວງອຸດສາຫະກຳ ແລະ ການຄ້າ, ກະຊວງການເງິນ, ກະຊວງປ້ອງກັນຄວາມສະຫງົບ, ກະຊວງໂຍທາທິການ ແລະ ຂົນສົ່ງ ແລະ ພາກສ່ວນອື່ນທີ່ກ່ຽວຂ້ອງ .
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.