ປະຈຸບັນ ວຽກງານອໍານວຍຄວາມສະດວກທາງດ້ານການຄ້າ ໃນຂອບ WTO ກຳລັງໄດ້ຮັບການເອົາໃຈໃສ່ ຊຶ່ງສະແດງອອກໃນຄວາມພະຍາຍາມຂອງປະເທດສາມະຊິກ WTO ໃນການນຳສະເໜີ ເຂົ້າຮ່ວມການເຈລະຈາສັນຍາດັ່ງກ່າວຢ່າງຕັ້ງໜ້າ ນັບແຕ່ປີ 2004 ເຖິງທ້າຍປີ 2013. ສັນຍາວ່າດ້ວຍການອຳນວຍຄວາມສະດວກທາງດ້ານການຄ້າ ປະກອບມີ ເກືອບ 44 ມາດຕະການ ທີ່ພົວພັນເຖິງວຽກງານຂອງພາສີ ແລະ ການປະສານງານລະຫວ່າງເຈົ້າໜ້າທີ່ປະຈຳດ່ານທັງໝົດ. ໂດຍເນື້ອໃນຫຼັກແມ່ນ ກ່ຽວກັບ ຄວາມໂປ່ງໃສ, ການເສຍຄ່າທຳນຽມຕ່າງໆ ແລະ ຂັ້ນຕອນການນຳເຂົ້າ-ສົ່ງອອກ. ປະຈຸບັນ, ສັນຍາດັ່ງກ່າວແມ່ນຢູ່ໃນຂັ້ນຕອນການນຳສະເໜີຮັບຮອງ ຂອງບັນດາປະເທດສະມາຊິກ WTO ເພື່ອໃຫ້ມີຜົນບັງຄັບໃຊ້ຢ່າງເປັນທາງການ.
ກອງປະຊຸມໄດ້ເຊື້ອເຊີນ ບັນດາສະມາຊິກກອງເລຂາອຳນວຍຄວາມສະດວກທາງດ້ານການຄ້າ, ຂະແໜງການກ່ຽວຂ້ອງ ທີ່ເຮັດວຽກປິ່ນອ້ອມວຽກງານການຄ້າ, ພະແນກອຸດສາຫະກຳ ແລະ ການຄ້າ ນະຄອນຫຼວງ/ແຂວງ, ເຈົ້າໜ້າທີ່ພາສີປະຈຳຢູ່ແຕ່ລະແຂວງ ແລະ ຜູ້ຕາງໜ້າຈາກສະພາອຸດສາຫະກຳ ແລະ ການຄ້າ ແຫ່ງຊາດ ພ້ອມດ້ວຍນັກທຸລະກິດຈຳນວນໜຶ່ງ ເຂົ້າຮ່ວມ ລວມທັງໝົດ 90 ທ່ານ.
ກອງປະຊຸມໃນຄັ້ງນີ້ ແມ່ນກອງປະຊຸມຄັ້ງທຳອິດ ທີ່ເຜີຍແຜ່ກ່ຽວກັບ ສັນຍາອໍານວຍຄວາມສະດວກທາງດ້ານການຄ້າ ໃນຂອບ WTO ມີຈຸດປະສົງຫຼັກເພື່ອສ້າງຄວາມເຂົ້າໃຈ ກ່ຽວກັບ ສັນຍາດັ່ງກ່າວ ໃຫ້ບັນດາຜູ້ເຂົ້າຮ່ວມ ໄດ້ຮັບຮູ້ພັນທະຂອງສັນຍາ ແລະ ກຽມພ້ອມຈັດຕັ້ງປະຕິບັດສັນຍາດັ່ງກ່າວ. ນອນນັ້ນ, ຍັງມີການສະຫຼຸບຜົນຂອງການປະເມີນຄວາມຕ້ອງການ ແລະ ບູລິມະສິດຂອງ ສປປ ລາວ ໃນການຈັດຕັ້ງປະຕິບັດສັນຍາອຳນວຍຄວາມສະດວກທາງດ້ານການຄ້າ ທີ່ໄດ້ຈັດໃນເດືອນ ຕຸລາ 2013 ທີ່ຜ່ານມາ ໃຫ້ກອງປະຊຸມໄດ້ຮັບຊາບ ແລະ ປະກອບຄຳເຫັນ. ເຖິງແມ່ນວ່າ ຜົນຂອງການປະເມີນບູລິມະສິດ ແລະ ຄວາມຕ້ອງການດັ່ງກ່າວມານັ້ນ ຈະສະແດງໃຫ້ເຫັນວ່າ ສປປ ລາວ ມີຄວາມພ້ອມທີ່ຈະຈັດຕັ້ງປະຕິບັດພັນທະ ຂອງສັນຍາເປັນສ່ວນໃຫຍ່ເຖິງ 48% ເນື່ອງຈາກມີການປັບປຸງນິຕິກຳຢ່າງຕໍ່ເນື່ອງ. ແຕ່ໃນພາກປະຕິບັດຕົວຈິງ ສປປ ລາວ ຍັງຕ້ອງການເວລາ ແລະ ການຊ່ວຍເຫຼືອດ້ານເຕັກນິກວິຊາການ. ໃນເງື່ອນໄຂທີ່ ສປປ ລາວ ຍັງເປັນປະເທດດ້ອຍພັດທະນາ ສປປ ລາວ ຕ້ອງໄດ້ສ້າງແຜນການຈັດຕັ້ງປະຕິບັດ ສັນຍາອຳນວຍຄວາມສະດວກທາງດ້ານການຄ້າ ໂດຍຈັດປະເພດບັນດາມາດຕະການ ພາຍໃຕ້ສັນຍາ ເຂົ້າໃນໝວດ ກ, ຂ ແລະ ຄ ເພື່ອແຈ້ງໃຫ້ກອງເລຂາ WTO ຊາບ, ໂດຍສະເພາະ ໝວດ ກ ທີ່ກຳນົດມາດຕະການທີ່ ສປປ ລາວ ສາມາດຈັດຕັ້ງປະຕິບັດໄດ້ທັນທີ ພາຍຫຼັງທີ່ສັນຍາມີຜົນບັງຄັບໃຊ້.
ກອງປະຊຸມ ໄດ້ດຳເນີນໄປດ້ວຍບັນຍາກາດອັນຟົດຟື້ນ ຜູ້ເຂົ້າຮ່ວມໃຫ້ຄວາມສົນໃຈ ຕໍ່ກັບເນື້ອໃນທີ່ໄດ້ນຳສະເໜີ, ພ້ອມທັງຕັ້ງຄຳຖາມ ແລະ ປະກອບຄຳຄິດເຫັນຢ່າງກົງໄປກົງມາ ໂດຍສະເພາະກ່ຽວກັບ ຄວາມກຽມພ້ອມຂອງ ສປປ ລາວ ໃນການຈັດຕັ້ງປະຕິບັດສັນຍາດັ່ງກ່າວ. ໂດຍລວມແລ້ວ ກອງປະຊຸມເຫັນດີເປັນເອກະພາບ ໃຫ້ມີການທົບທວນຄືນຜົນການປະເມີນທີ່ໄດ້ເຮັດ ໃນທ້າຍປີ 2013 ໂດຍໃຫ້ມີການວາງແຜນການປະເມີນຢ່າງຄັກແນ່ ເພື່ອຮັບປະກັນຄວາມຊັດເຈນຂອງຜົນການປະເມີນ ກອງປະຊຸມຍັງເຫັນດີໃຫ້ຂະແໜງການທີ່ກ່ຽວຂ້ອງ ຢູ່ທັງສູນກາງ ແລະ ທ້ອງຖິ່ນ ເຂົ້າຮ່ວມຢ່າງພ້ອມພຽງ, ພ້ອມນັ້ນ ກໍຕ້ອງມີພາກທຸລະກິດເຂົ້າຮ່ວມນຳ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.