ກອງປະຊຸມສຳມະນາໄດ້ຈັດຂຶ້ນໃນວັນທີ 22 ກໍລະກົດ 2014 ທີ່ ໂຮງແຮມເອຣາວັນ ຣີເວີຊາຍດ໌, ແຂວງຈຳປາສັກ ໂດຍມີຜູ້ເຂົ້າຮ່ວມ ຈາກ 03 ແຂວງພາກກາງ ແລະ 04 ແຂວງ ພາກໃຕ້ ຄື: ແຂວງບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະ ອັດຕະປື ທີ່ຕາງໜ້າຈາກ ພະແນກອຸດສາຫະກຳ ແລະ ການຄ້າ, ພະແນກການເງິນ, ພະແນກກະສິກຳ ແລະ ປ່າໄມ້, ແລະ ສະພາການຄ້າ ແລະ ອຸດສາຫະກຳແຂວງ ເຂົ້າຮ່ວມ, ທັງໝົດ 70 ທ່ານ. ກອງປະຊຸມໄດ້ດຳເນີນໄປເປັນເວລາ 1 ວັນ ພາຍໃຕ້ການເປັນການເປັນປະທານ ຂອງ ທ່ານ ນາງ ບານສະຕິ ເທບພະວົງ ຫົວໜ້າກົມການນໍາເຂົ້າ ແລະ ສົ່ງອອກ, ກະຊວງອຸດສາຫະກຳ ແລະ ການຄ້າ.
ຈຸດປະສົງຂອງກອງປະຊຸມສຳມະນາໃນຄັ້ງນີ້ ແມ່ນເພື່ອທົບທວນຄືນ ຜົນການຈັດຕັ້ງປະຕິບັດວຽກງານຢັ້ງຢືນແຫຼ່ງກຳເນີດສິນຄ້າຂອງ ສປປ ລາວ, ລະບຽບ ແລະ ຫຼັກການຢັ້ງຢືນແຫຼ່ງກຳເນີດສິນຄ້າ ດ້ວຍຕົນເອງ ເພື່ອກະກຽມຄວາມພ້ອມ ໃຫ້ແກ່ການເຂົ້າຮ່ວມປະຊາຄົມເສດຖະກິດອາຊຽນ ຫຼື AEC ໃນປີ 2015. ວຽກຢັ້ງຢືນແຫຼ່ງກຳເນີດສິນຄ້າ ຖືເປັນໜຶ່ງໃນໜ້າວຽກ ຂອງໂຄງການບູລິມະສິດຂອງອາຊຽນ, ເຊິ່ງໄດ້ຖືກຍົກຂື້ນມາປຶກສາຫາລືກັນ ເປັນເວລາດົນນານໃນອາຊຽນ. ໂດຍ ສປປ ລາວ ໄດ້ເຂົ້າຮ່ວມໃນໂຄງການ ຢັ້ງຢືນແຫຼ່ງກຳເນີດສິນຄ້າ ດ້ວຍຕົວເອງໄລຍະ II ເພື່ອເປັນການຫຼຸດຜ່ອນຕົ້ນທຶນຂອງຜູ້ດຳເນີນທຸລະກິດ-ການຄ້າ ແລະ ອຳນວຍຄວາມສະດວກ ໃຫ້ແກ່ຫົວໜ່ວຍທຸລະກິດທີ່ສົ່ງອອກໄປຕະຫຼາດອາຊຽນ.
ກອງປະຊຸມສຳມະນາໄດ້ອະທິບາຍ ຢ່າງລະອຽດ ກ່ຽວກັບ: ສິດທິພິເສດທາງການຄ້າ ທີ່ ສປປ ລາວ ໄດ້ຮັບ, ບັນດານິຕິກໍາ
ແລະ ເຄື່ອງມືໃນການຈັດຕັ້ງປະຕິບັດ ວຽກງານຢັ້ງຢືນແຫຼ່ງກຳເນີດສິນຄ້າ (CO), ຂັ້ນຕອນການກວດກາເງື່ອນໄຂ
ໄດ້ສິດທິພິເສດ ແລະ ການອອກໃບຢັ້ງຢືນແຫຼ່ງກຳເນີດສິນຄ້າ, ການລາຍງານສະຖິຕິກ່ຽວກັບການຢັ້ງຢືນແຫຼ່ງກໍາເນີດ
ສິນຄ້າ ແລະ ໃບຮັບຮອງສິນຄ້າໄດ້ແຫຼ່ງກໍາເນີດ, ວີທີການບັນທຶກຂໍ້ມູນຂອງບໍລິສັດທີ່ມາອອກໃບ CO ລົງໃນແບບຟອມ
ແບບເອກະພາບທົ່ວປະເທດ, ການຢັ້ງຢືນແຫຼ່ງກຳເນີດສິນຄ້າດ້ວຍຕົນເອງຢູ່ ສປປ ລາວ ພາຍໃຕ້ສັນຍາການຄ້າເສລີ
ອາຊຽນ, ແລະ ແຜນການໃນຕໍ່ໜ້າຂອງວຽກການຢັ້ງຢືນແຫຼ່ງກຳເນີດສິນຄ້າ.
ໃນຕໍ່ໜ້າ ຂອງວຽກການຢັ້ງຢືນແຫຼ່ງກຳເນີດສິນຄ້າ, ກົມການນຳເຂົ້າ ແລະ ສົ່ງອອກ ມີແຜນຈະ ຄົ້ນຄວ້າຄວາມເປັນໄປໄດ້
ໃນການມອບສິດອອກຟອມ A ໃຫ້ແກ່ພະແນກອຸດສາຫະກໍາ ແລະ ການຄ້າແຂວງ ໃນຂອບເຂດທົ່ວປະເທດ ແລະ ເຂດ
ເສດຖະກິດພິເສດ, ແລະ ລະດົມບໍລິສັດ ທີ່ມີເງື່ອນໄຂ ຢັ້ງຢືນແຫຼ່ງກໍາເນີດສິນຄ້າດ້ວຍຕົນເອງ ເຂົ້າຮ່ວມໂຄງການທົດລອງ
ທີ II ຂອງອາຊຽນ ເພື່ອກຽມຄວາມພ້ອມ ໃນການຈັດຕັ້ງປະຕິບັດ ເປັນເອກະພາບກັນ ໃນອາຊຽນ ໃນປີ 2015, ສືບຕໍ່
ອອກໃບຮັບຮອງສິນຄ້າໄດ້ແຫຼ່ງກໍາເນີດ ແລະ ສຶກສາຄວາມເປັນໄປໄດ້ ກ່ຽວກັບ ການຍື່ນຂໍໃບຢັ້ງຢືນແຫຼ່ງກໍາເນີດສິນຄ້າ ຜ່ານລະບົບເອເລັກໂຕຣນິກ.
ພ້ອມດຽວກັນ, ກອງປະຊຸມຍັງໄດ້ປຶກສາຫາລື ບັນຫາອື່ນໆ ທີ່ຕິດພັນກັບວຽກງານການນຳເຂົ້າ ແລະ ສົ່ງອອກ ແລະ ເຜີຍ
ແຜ່ຂັ້ນຕອນການຄົ້ນຄວ້າລາຄາພັນທະໄມ້ ສົກປີ 2013/2014, ການຄິດໄລ່ຄ່າພັນທະໄມ້ ໂດຍອີງຕາມລັດຖະບັນຍັດຂອງ
ປະທານປະເທດວ່າດ້ວຍຄ່າທຳນຽມ ແລະ ຄ່າບໍລິການ, ສະບັບເລກທີ 003/ປປທ ແລະ ການແບ່ງລາຍຮັບທີ່ໄດ້ຈາກການ
ຂາຍໄມ້, ພ້ອມທັງປຶກສາຫາລື ກ່ຽວກັບ ຮ່າງແບບຟອມອອກອະນຸຍາດນຳເຂົ້າ ແລະ ສົ່ງອອກສິນຄ້າທີ່ກຳລັງມີການ
ປັບປຸງໃໝ່.
ສຳລັບຂັ້ນຕອນຂອງການຄົ້ນຄວ້າລາຄາພັນທະໄມ້ ສົກປີ 2013/2014 ມີຂັ້ນຕອນດັ່ງນີ້:
1)ສັງລວມຂໍ້ມູນຈາກຂະແໜງການທີ່ກ່ຽວຂ້ອງ, ຂໍ້ມູນຊື້-ຂາຍຕົວຈິງ ຢູ່ຕະຫຼາດພາຍໃນ ແລະ ຕ່າງປະເທດ, ແນວໂນ້ມລາຄາ ແລະ ຊະນິດໄມ້ທີ່ພົ້ນເດັ່ນ;
2)ປັບປຸງລາຄາ, ໂດຍອີງຕາມຂໍ້ມູນທີ່ໄດ້ສັງລວມມາຈາກຂັ້ນຕອນທີ 01 ແລ້ວຈຶ່ງພິຈາລະນາ ແລະ ຄົ້ນຄວ້າເພື່ອໃຫ້ໄດ້ລາຄາທີ່ເໝາະສົມຕາມສະພາບການຕົວຈິງ;
3)ສົ່ງຮ່າງລາຄາໃຫ້ຂະແໜງການກ່ຽວຂ້ອງປະກອບຄຳເຫັນ;
4)ຈັດປະຊຸມ ປຶກສາຫາລືພາຍໃນກະຊວງອຸດສາຫະກຳ ແລະ ການຄ້າ ກ່ຽວກັບ ຄຳເຫັນຂະແໜງການກ່ຽວຂ້ອງ ພິຈາລະນາປັບປຸງລາຄາອີກຄັ້ງ;
5)ປັບລາຄາ ຕາມການຕົກລົງ ຂອງກອງປະຊຸມປຶກສາຫາລືພາຍໃນກະຊວງອຸດສາຫະກຳ ແລະ ການຄ້າ;
6)ສົ່ງຮ່າງລາຄາໃຫ້ຂະແໜງການກ່ຽວຂ້ອງ ປະກອບຄຳເຫັນຕື່ມ;
7)ປັບລາຄາຄັ້ງສຸດທ້າຍ, ໂດຍພິຈາລະນາຕາມການປະກອບຄຳເຫັນ ຂອງຂະແໜງການກ່ຽວຂ້ອງ ໃນຂັ້ນຕອນທີ 06;
8)ເມື່ອສຳລັດຂັ້ນຕອນທີ 07 ຈາກນັ້ນຈຶ່ງນຳສະເໜີລັດຖະບານພິຈາລະນາ;
ພາຍຫຼັງທີ່ລັດຖະບານພິຈາລະນາເຫັນດີ, ຫ້ອງວ່າການລັດຖະບານ ຈຶ່ງອອກແຈ້ງການເລື່ອງ “ທິດຊີ້ນຳ ກ່ຽວກັບ ລາຄາ
ພັນທະໄມ້ ສົກປີ 2013-2014 ສະບັບເລກທີ 706/ຫລບ.ກລຂ, ລົງວັນທີ 28 ພຶດສະພາ 2014”. ເພື່ອເປັນພື້ນຖານໃຫ້
ກະຊວງອຸດສາຫະກຳ ແລະ ການຄ້າ, ອອກແຈ້ງການ ກ່ຽວກັບ ລາຄາພັນທະໄມ້ທ່ອນສະໜາມ II ແລະ ລາຄາພັນທະໄມ້
ສົ່ງອອກຕ່າງປະເທດປະຈຳ ສົກປີ 2013-2014 ສະບັບເລກທີ 0992/ອຄ.ກຂອ. ລົງວັນທີ 29 ພຶດສະພາ 2014 ເພື່ອໃຫ້
ທົ່ວປະເທດ ເລີ່ມຈັດຕັ້ງປະຕິບັດ.
ສຳລັບການຄິດໄລ່ລາຄາພັນທະໄມ້ ໄດ້ຈຳແນກປະເພດ ໄມ້ທີ່ມີລັກສະນະແຕກຕ່າງກັນ ແລະ ມີລາຄາພັນທະທີ່ແຕກ
ຕ່າງກັນ ຕາມປະເພດ ແລະ ຕາມການຈັດເກຣດ. ເຊິ່ງລາຄາພັນທະໄມ້ ແມ່ນຖືກກຳນົດຢູ່ທີ່ ສະໜາມ II ແລະ ໄດ້ຈັດແບ່ງ
ເປັນຮູບແບບ ຄື: ໄມ້ທ່ອນເພື່ອປຸງແຕ່ງພາຍໃນ ເປັນຜະລິດຕະພັນສຳເລັດຮູບ, ໄມ້ທ່ອນສົ່ງອອກຕ່າງປະເທດ, ໄມ້ຕີຕັບ
ສົ່ງອອກຕ່າງປະເທດ ແລະ ໄມ້ແປຮູບສົ່ງອອກຕ່າງປະເທດ. ເຊິ່ງໂຄງສ້າງຂອງລາຄາພັນທະໄມ້ ປະກອບມີ: 1) ຄ່າສຳຫຼວດ
(ກ່ອນຂຸດຄົ້ນ, ໝາຍກາຕົ້ນຕັດ, ຫຼັງຂຸດຄົ້ນ), 2) ຄ່າພັນທະປູກໄມ້ແທນຄືນ (ຄ່າປູກໄມ້ທົດແທນ, ຄ່າຄຸ້ມຄອງ) ແລະ 3) ຄ່າຊັບພະຍາກອນ.
ໃນກອງປະຊຸມ ບັນດານັກສຳມະນາກອນ ໄດ້ໃຫ້ຄວາມສົນໃຈສູງຕໍ່ກັບເນື້ອໃນການເຜີຍແຜ່ຄັ້ງນີ້ ຊຶ່ງເຫັນໄດ້ໃນການ
ເອົາໃຈໃສ່ ຕິດຕາມການບັນຍາຍ ຂອງນັກວິທະຍາກອນ, ແລກປ່ຽນຄໍາຄິດ ຄໍາເຫັນ, ປະສົບການຕົວຈິງທີ່ໄດ້ພົບມາ,
ການຕັ້ງຄໍາຖາມ ໃສ່ບາງຈຸດ ທີ່ບໍ່ທັນຈະແຈ້ງ ແລະ ບໍ່ທັນເຂົ້າໃຈ. ໂດຍສະເພາະແມ່ນ ລະບຽບການ ໃນການອອກໃບຢັ້ງຢືນ ແຫຼ່ງກໍາເນີດສິນຄ້າ, ການຈັດຕັ້ງປະຕິບັດ ລາຄາພັນທະໄມ້ສົກປີ 2013 – 2014 ແລະ ບັນຫາອື່ນໆ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.