ກອງປະຊຸມສຳມະນາ ກ່ຽວກັບ ‘‘ສູນຂໍ້ມູນດ້ານການຄ້າອາຊຽນ(ATR), ສູນຂໍ້ມູນດ້ານການຄ້າແຫ່ງຊາດ (NTR), ມາດຕະການທາງດ້ານການຄ້າທີ່ບໍ່ແມ່ນພາສີ (NTMs) ແລະ ແຈ້ງການກ່ຽວກັບຂັ້ນຕອນຕ່າງໆພາຍໃຕ້ສັນຍາວ່າດ້ວຍການຄ້າດ້ານສິນຄ້າອາຊຽນ (ATIGA)’’ ໄດ້ຈັດໃນລະຫວ່າງວັນທີ 20-21 ຕຸລາ 2014, ທີ່ໂຮງແຮມລາວພລາຊາ, ນະຄອນຫຼວງວຽງຈັນ, ໂດຍການເປັນປະທານຂອງ ທ່ານ ນາງ ມະນີວອນ ວົງໄຊ ຮອງຫົວໜ້າກົມການນໍາເຂົ້າ ແລະ ສົ່ງອອກ, ພາຍໃຕ້ການສະໜັບສະໜຸນຈາກອົງການ ARISE (ASEAN Regional Integration Support from the EU) ຊຶ່ງມີຜູ້ເຂົ້າຮ່ວມທັງໝົດ 41 ທ່ານ. ກອງປະຊຸມສຳມະນາຄັ້ງນີ້ ໄດ້ດຳເນີນການບັນຍາຍຫຼັກໂດຍ ທ່ານ Paolo R. Vergano ແລະ ທ່ານ ນາງ Eugenia Costanza Laurenza ຕາງໜ້າອົງການ ARISE ແລະ ທ່ານ Anki Agustrin ຕາງໜ້າຈາກກອງເລຂາອາຊຽນ.
ຈຸດປະສົງຂອງກອງປະຊຸມຄັ້ງນີ້ ເພື່ອເຜີຍແຜ່ແນວຄວາມຄິດຂອງ ສູນຂໍ້ມູນສູນຂໍ້ມູນດ້ານການຄ້າອາຊຽນ (ATR), ສຸນຂໍ້ມູນດ້ານການຄ້າແຫ່ງຊາດ (NTR), ມາດຕະການທາງດ້ານການຄ້າທີ່ບໍ່ແມ່ນພາສີ (NTMs) ແລະ ບັນດາແຈ້ງການກ່ຽວກັບຂັ້ນຕອນຕ່າງໆ ພາຍໄຕ້ສັນຍາວ່າດ້ວຍການຄ້າດ້ານສິນຄ້າອາຊຽນ (ATIGA), ການວິເຄາະບັນດາລະບຽບການ ແລະ ນິຕິກຳຕ່າງໆກ່ຽວກັບການຄ້າ, ການວິໄຈກໍລະນີສຶກສາ ໂດຍການນຳໃຊ້ຄູ່ມືການຈັດແບ່ງປະເພດມາດຕະການທາງດ້ານການຄ້າທີ່ບໍ່ແມ່ນພາສີຂອງ UNCTAD 2012 NTM Classification ເຮັດໃຫ້ນັກສຳມະກອນສາມາດເຂົ້າໃຈວິທີການຈັດປະເພດມາດຕະການ NTMs ຂື້ນຕື່ມ. ນອກນີ້ກົມນຳເຂົ້າ ແລະ ສົ່ງອອກ ກໍຍັງໄດ້ນຳສະເໜີກ່ຽວກັບ ສູນຂໍ້ມູນຂ່າວສານທາງດ້ານການຄ້າ ຂອງ ສປປ ລາວ ເພື່ອຍົກໃຫ້ເຫັນກ່ຽວກັບບັນດາຂໍ້ມູນການຄ້າທີ່ມີຢູ່ໃນ LTP ນີ້ ສາມາດປະຕິບັດສອດຄ່ອງຕໍ່ກັບການສ້າງ NTR ຂອງ ສປປ ລາວ ພາຍໃຕ້ສັນຍາ ATIGA ໃຫ້ບັນດາຖັນແຖວພະນັກງານ ເພື່ອສ້າງຄວາມຮັບຮູ້ ແລະ ຄວາມເຂົ້າໃຈ ຕໍ່ກັບຄວາມສຳຄັນຂອງການນຳໃຊ້ສູນຂໍ້ມູນຂ່າວສານດັ່ງກ່າວ.
ກອງປະຊຸມສຳມະນາຄັ້ງນີ້ ໄດ້ເປັນການສ້າງຂີດຄວາມສາມາດ ໃຫ້ແກ່ວຽກງານອຳນວຍຄວາມສະດວກທາງດ້ານການຄ້າ ຂອງອາຊຽນ ເວົ້າລວມ, ເວົ້າສະເພາະແມ່ນເພື່ອສ້າງຄວາມເຂັ້ມແຂງ ໃຫ້ແກ່ວຽກງານອຳນວຍຄວາມສະດວກທາງດ້ານການຄ້າ ຂອງ ສປປ ລາວ ໂດຍແນໃສ່ ວຽກງານຂໍ້ມູນຂ່າວສານທາງດ້ານການຄ້າເປັນພິເສດໃນການສ້າງຄວາມໂປ່ງໃສ່ ທີ່ເປັນຕົວຜັກດັນພື້ນຖານໃນການພັດ ທະນາເສດຖະກິດ-ການຄ້າ-ລົງທຶນ ແລະ ສາມາດຫຼີກລ່ຽງຂໍ້ຄັດແຍ່ງທາງດ້ານການຄ້າໃຫ້ແກ່ຜູ້ປະກອບການ. ເພື່ອເຮັດໃຫ້ສູນຂໍ້ມູນອາຊຽນ ມີເນື້ອໃນຢ່າງສົມບູນ, ຄົບຖ້ວນ, ຫຼາກຫຼາຍ ແລະ ໂປ່ງໃສ. ສະນັ້ນ, ກ່ອນທີ່ຈະມີສູນຂໍ້ມູນ ອາຊຽນທີ່ສົມບູນແບບ ແລະ ບັນດາສະມາຊິກ ອາຊຽນ ກໍ່ຕ້ອງມີສຸນຂໍ້ມູນແຫ່ງຊາດເປັນຂອງຕົນເອງ ພາຍໃນປີ 2015 ເຊິ່ງຕ້ອງສອດຄອງກັບ ຂໍ້ກຳນົດທີ່ໄດ້ລະບຸໃນສັນຍາ ATIGA ໂດຍອີງຕາມ 09 ຂົງເຂດຂອງຄວາມໂປງໃສ່ ທີ່ຕ້ອງມີຂໍ້ມູນດັ່ງນີ້ :
1) ການຈັດລະຫັດພາສີ;
2) ອັດຕາພາສີ MFN ອັດຕາພາສີທີ່ປະຕິບັດຕໍ່ປະເທດທີ່ໄດ້ຮັບການອະນຸເຄາະຍິ່ງ,ອັດຕາພາສີລະຫວ່າງອາຊຽນ ກັບ ປະເທດພາຄີອາຊຽນ ແລະ ອັດຕາພາສີ CEPT ຫຼື ອັດຕາພາສີພິເສດ ສຳລັບທຸກສິນຄ້າທີ່ມີການຄ້ານໍາກັນລະຫວ່າງບັນດາປະເທດສະມາຊິກອາຊຽນ;
3) ລະບຽບແຫຼ່ງກຳເນີດສິນຄ້າ;
4) ມາດຕະການທາງດ້ານການຄ້າທີ່ບໍ່ແມ່ນພາສີ;
5) ກົດໝາຍການຄ້າ, ກົດໝາຍພາສີ ແລະ ນິຕິກຳອື່ນໆ;
6) ຂັ້ນຕອນ ແລະ ເອກະສານທີ່ຈຳເປັນ;
7) ລະບຽບບໍລິຫານ;
8) ແບບຢ່າງຕົວຈິງທີ່ດີໃນການ ອຳນວຍຄວາມສະດວກທາງດ້ານ ການການຄ້າ; ແລະ
9) ລາຍຊື່ຜູ້ປະກອບການທີ່ໄດ້ຮັບອຸນາຍາດ (ແບບອັດຕະໂນມັດ).
ປັດຈຸບັນ ສູນຂໍ້ມູນຂ່າວສານດ້ານການຄ້າ ສປປ ລາວ ສາມາດບັນບັນລຸໄດ້ 08 ຂົງເຂດແລ້ວ, ສ່ວນຂົງເຂດທີ່ 09 ແມ່ນຢູ່ໃນຂັ້ນຕອນການປັບປຸງຂອງກົມພາສີ. ທ່ານ Paolo R. Vergano ໄດ້ກ່າວວ່າ : ວຽກງານການສ້າງ NTR ຂອງ ສປປ ລາວ ເຫັນໄດ້ວ່າ ສູນຂໍ້ມູນຂ່າວສານທາງດ້ານ ການຄ້າຂອງ ສປປ ລາວ (LTP) ເປັນໜ່ວຍງານໜຶ່ງທີ່ດີທີ່ສຸດ ໃນການດຳເນີນການສ້າງ NTR ໃນປະຈຸບັນ ແລະ ສາມາດເວົ້າໄດ້ວ່າ LTP ເປັນສູນຂໍ້ມູນ ຂ່າວສານທາງດ້ານການຄ້າໜຶ່ງທີ່ດີທີ່ສຸດ ໃນພາກພື້ນ ແລະ ສາກົນ.
ກົມການນຳເຂົ້າ ແລະ ສົ່ງອອກ ໄດ້ໃຫ້ຮູ້ວ່າ Lao Trade Portal ເປັນເວັບໄຊ໌ທີ່ອາດຈະມີຄວາມແຕກຕ່າງຈາກເວັບໄຊ໌ອື່ນໆ ຢູ່ບ່ອນວ່າ ເປັນເວັບໄຊ້ທີ່ເຕັມໄປດ້ວຍພະລັງແນວຄິດສ້າງສັນ ແລະ ມີຖານຂໍ້ມູນເຊິ່ງບັນຈຸ ມີບັນດາຂໍ້ມູນຂ່າວສານ ເຊັ່ນ: ອັດຕາພາສີ, ນິຕິກຳກົດໝາຍ, ຂັ້ນຕອນການນຳເຂົ້າ-ສົ່ງອອກ, ແບບຟອມຂໍອະນຸຍາດ ແລະ ອື່ນໆ ເຊິ່ງບັນດາຂໍ້ມູນສາມາດຄົ້ນຫາໄດ້ຢ່າງສະດວກ ໂດຍອີງໃສ່ເງື່ອນໄຂ ທີ່ຕ້ອງໃຫ້ມີ ຂໍ້ມູນທັງ 9 ຂົງເຂດ ເຊິ່ງລະບຸໄວ້ໃນມາດຕາ 13 ຂອງ ATIGA.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.