ກອງປະຊຸມຄະນະກໍາມະການຮ່ວມເຂດການຄ້າເສລີອາຊຽນ-ຈີນຄັ້ງທີ 6 ທີ່ຈັດຂຶ້ນທີ່ຮາໂນຍ ສສ ຫວຽດນາມ ລະຫວ່າງວັນທີ 22-24 ກັນຍາ 2014 ເຊີ່ງມີຈຸດປະສົງເພື່ອປຶກສາຫາລື ທິດທາງໃນການຍົກລະດັບສັນຍາການຄ້າເສລີອາຊຽນ-ຈີນ ທີ່ໄດ້ຮັບການຮັບຮອງເອົາໂດຍລັດຖະມົນຕີອາຊຽນ-ຈີນ (AEM-MOFCOM) ຄັ້ງທີ 13 ທີ່ຈັດຂຶ້ນທີ່ ນາປີດໍ, ປະເທດມຽນມາ ໃນວັນທີ 26 ສິງຫາ 2014. ກອງປະຊຸມສາມາດຕົກລົງໄດ້ແຜນດຳເນີນງານ (Work Programme 2015) ໃນການຍົກລະດັບສັນຍາ ໂດຍຄາດໝາຍໃຫ້ສໍາເລັດພາຍໃນປີ 2015 ຊຶ່ງ ສປ ຈີນໄດ້ກ່າວຢໍ້າວ່າ ການຍົກລະດັບ ຕ້ອງສໍາເລັດກ່ອນການສະຫຼຸບການເຈລະຈາຂອບຄູ່ຮ່ວມມືເສດຖະກິດຮອບດ້ານລະດັບພາກພື້ນ RCEP. ໃນແຜນດັ່ງກ່າວໄດ້ກໍານົດຂອບວຽກ ແລະ ເພີ່ມຈໍານວນຄັ້ງຂອງກອງປະຊຸມຂຶ້ນເປັນ 3 ຄັ້ງຕໍ່ປີໃນປີ 2015 ເຊິ່ງໃນໄລຍະຜ່ານມາມີພຽງ 2 ຄັ້ງຕໍ່ປີ. ພ້ອມນັ້ນ, ຂອບວຽກທີ່ກໍານົດໃນແຜນດໍາເນີນງານ ໄດ້ກວມເອົາ 4 ຂົງເຂດວຽກໃຫຍ່ ຄື: 1) ການຄ້າດ້ານສິນຄ້າ, 2)ການຄ້າດ້ານບໍລິການ, 3)ການລົງທຶນ ແລະ 4)ການຮ່ວມມືດ້ານເສດຖະກິດ. ໃນລາຍລະອຽດແຕ່ລະຂົງເຂດວຽກປະກອບມີດັ່ງນີ້:
1. ການຄ້າດ້ານສິນຄ້າ
· ການລົບລ້າງອັດຕາພາສີ
ຄະນະຜູ້ແທນ ຂອງ ຈີນ ໄດ້ອະທິບາຍວ່າ ສປປ ຈີນ ມີຄວາມຫຍຸ້ງຍາກທີ່ຈະສືບຕໍ່ລົບລ້າງອັດຕາພາສີຂອງຕົນ ເພາະວ່າລະດັບການເປີດຕະຫລາດດ້ານການຄ້າສິນຄ້າຂອງຕົນ ແມ່ນສູງຫລາຍແລ້ວ (ປະມານ 94% ໂດຍສະເລັ່ຍ). ໃນກອງປະຊຸມຄັ້ງນີ້ ຄະນະຜູ້ນຳຂອງ ສປປ ລາວ ໄດ້ສະແດງຄວາມເຫັນຢ່າງຈະແຈ້ງວ່າ: ໃນຖານະເປັນປະເທດດ້ອຍພັດທະນາ ສປປ ລາວ ໄດ້ໃຫ້ຂໍ້ຜູກພັນໃນການເປີດຕະຫລາດດ້ານຄ້າສິນຄ້າສູງແລ້ວ ຄື ປະມານ 97% ຂອງຈໍານວນລາຍການສິນຄ້າທັງໝົດຂອງຕົນ ຊຶ່ງຢູ່ໃນລະດັບສູງເປັນອັນດັບສາມໃນຈໍານວນ 11 ປະເທດ ຖັດຈາກ ສິງກະໂປ ແລະ ບຣູໄນ.
· ການສ້າງຄູ່ມືໂອນຖ່າຍລະຫັດພາສີ
ການໂອນຖ່າຍລະຫັດພາສີຈາກລະບົບປີ 2007 ມາເປັນລະບົບປີ 2012 ກອງປະຊຸມຄັ້ງນີ້ ສຶບຕໍ່ປຶກສາຫາລື ກ່ຽວກັບ 3 ຫລັກການ ຫລື 3 ທາງເລືອກໃນການໂອນຖ່າຍລະຫັດພາສີ ແຕ່ອາຊຽນ ແລະ ຈີນຍັງມີຄວາມເຫັນແຕກຕ່າງກັນກ່ຽວກັບທາງເລືອກ ທີ 3.
· ວຽກງານແຫຼ່ງກໍາເນີດສິນຄ້າ
ໜ່ວຍງານ (Working Group)ວ່າດ້ວຍແຫຼ່ງກໍາເນີດສິນຄ້າ ແລກປ່ຽນຄໍາເຫັນທີ່ມີເນື້ອໃນສໍາຄັນດັ່ງນີ້:
1) ການສະຫຼຸບຮ່າງສັນຍາ ROO ສະບັບໃໝ່ ຊຶ່ງຝ່າຍຈີນໄດ້ມີຄໍາເຫັນ ແລະ ສະເໜີປັບປຸງຄືນ (counter proposal) ໃນບາງຈຸດຕໍ່ຮ່າງທີ່ສະເໜີໂດຍອາຊ່ຽນ ໃນກອງປະຊຸມໄດ້ແລກປ່ຽນຄໍາເຫັນເພື່ອຄວາມເຂົ້າໃຈຕໍ່ counter proposal ຂອງ ສປ ຈີນທີ່ໄດ້ຍື່ນສົ່ງສະມາຊິກກ່ອນໜ້ານີ້;
2) ການຮັບຮອງເອົາລາຍການສິນຄ້າທີ່ມີລະບຽບການສະເພາະ (Product Specific Rules-PSR), ຜ່ານມາອາຊຽນໄດ້ຍື່ນບັນຊີລາຍການສິນຄ້າທີ່ມີລະບຽບການສະເພາະສໍາລັບແຕ່ລະຜະລິດຕະພັນໃຫ້ ສປ ຈີນພິຈາລະນາ, ໃນກອງປະຊຸມ ສປ ຈີນໄດ້ມີຄໍາເຫັນຕໍ່ຂໍ້ສະເໜີວ່າປະມານ 80% ໃນ PSR list ສະເໜີໃຫ້ນໍາໃຊ້ລະບຽບ Regional Value Contain-RVC 40% . ນອກນັ້ນ, ສປ ຈີນ ຍັງມີຄໍາເຫັນວ່າ ໃນບາງກຸ່ມສິນຄ້າ ນໍາໃຊ້ພຽງ RVC ຫຼື Change in Tariff Classification (CTC) ຊະນິດດຽວກໍ່ຈະສາມາດຢັ້ງຢືນແຫຼ່ງກໍາເນີດໄດ້ແລ້ວ, ສະນັ້ນ ສປ ຈີນ ຈະສະເໜີໃຫ້ອາຊຽນພິຈາລະນາຄືນໃໝ່ຕໍ່ສິນຄ້າເຫຼົ້າ;
3) ການປັບປຸງຂັ້ນຕອນການຢັ້ງຢືນ OCP, ສປ ຈີນ ສະເໜີໃຫ້ມີການປັັບຂັ້ນຕອນດັ່ງກ່າວ, ແຕ່ອາຊຽນຕ້ອງການປືກສາພາຍໃນກ່ອນ ເນື່ອງຈາກຂັ້ນຕອນປັດຈຸບັນຫາກໍ່ຈັດຕັ້ງປະຕິບັດ.
4) ແຜນວຽກງານຕໍ່ໜ້າ ກອງປະຊຸມ JC ໄດ້ເຫັນດີໃນໜ່ວຍງານຈັດກອງປະຊຸມຕື່ມອີກເທື່ອໜຶ່ງກ່ອນຈະມີກອງປະຊຸມ JC ຄັ້ງຕໍ່ໄປ.
· ຂັ້ນຕອນດ້ານອັດຕາພາສີ ແລະ ການອໍານວຍຄວາມສະດວກດ້ານການຄ້າ
ກອງປະຊຸມສືບຕໍ່ແລກປ່ຽນຄໍາເຫັນຕໍ່ຮ່າງສັນຍາ CPTF ຊຶ່ງຍັງມີ 3 ມາດຕາທີ່ຍັງບໍ່ຕົກລົງກັນໄດ້ ເຊັ່ນ: ມາດຕາ 10, 11 ແລະ 12. ສປ ຈີນ ມີຄວາມຫຍຸ້ງຍາກໃນການຈັດຕັ້ງປະຕິບັດ ພ້ອມນັ້ນກໍ່ຮຽກຮ້ອງໃຫ້ອາຊຽນເຂົ້າໃຈສະພາບຄວາມຫຍຸ້ງຍາກຂອງ ສປ ຈີນຕື່ມເນື່ອງຈາກບໍລິມາດການຄ້າຂອງ ສປ ຈີນມີຈໍານວນມະຫາສານ ແລະ ເຫັນວ່າຈະເປັນໄປໄດ້ຍາກທີ່ເຈົ້າໜ້າທີ່ພາສີຈະປະຕິບັດຕາມມາດຕາເຫຼົ່ານັ້ນ.
2. ການຄ້າດ້ານການບໍລິການ
ການຄ້າດ້ານການບໍລິການໃນຂອບສັນຍາການຄ້າເສລີອາຊຽນຈີນ ປັດຈຸບັນນີ້ແມ່ນສໍາເລັດການເປີດເສລີສອງຄັ້ງແລ້ວ (2nd package of commitment), ກອງປະຊຸມເຫັນດີໃຫ້ໜ່ວຍງານການຄ້າດ້ານການບໍລິການກັບຄືນມາສືບຕໍ່ຄົ້ນຄວ້າຄວາມເປັນໄປໄດ້ໃນການເປີດເສລີຄັ້ງທີ 3 ຕາມທີ່ໄດ້ຕົກລົງໃນສັນຍາວ່າດ້ວຍການຍົກລະດັບສັນຍາ.
3. ການລົງທຶນ
ກອງປະຊຸມຊຸດນີ້ ຝ່າຍອາຊຽນຍັງບໍ່ທັນມີປະທານໜ່ວຍງານວຽກການລົງທຶນ ຊຶ່ງໄທໄດ້ສະເໜີເປັນປະທານ ແຕ່ຕົວແທນລົງທຶນຂອງໄທບໍ່ສາມາດມາເຂົ້າຮ່ວມໄດ້ໃນກອງປະຊຸມຊຸດນີ້.
4. ການຮ່ວມມືດ້ານເສດຖະກິດ
ກອງປະຊຸມໄດ້ປຶກສາກັນກ່ຽວກັບການນໍາໃຊ້ທຶນຊ່ວຍເຫຼືອຂອງລັດຖະບານຈີນໃນການຈັດກິດຈະກໍາຍົກລະດັບຄວາມສາມາດໃນແຕ່ລະຂົງເຂດ, ໂດຍອີງໃສ່ການຈັດຕັ້ງປະຕິບັດໃນໄລຍະຜ່ານມາເຫັນວ່າ ຂັ້ນຕອນການອະນຸມັດຂອງລັດຖະບານຈີນ ຍັງມີຄວາມສັບສົນ ແລະ ໃຊ້ເວລາຫຼາຍເກີນໄປ ເຮັດໃຫ້ສະມາຊິກອາຊຽນຫຼາຍປະເທດມີຄວາມຂັດຂ້ອງຕໍ່ວິທີການອະນຸມັດໂຄງການດັ່ງກ່າວ. ຕໍ່ຂໍ້ຂ້ອງໃຈຝ່າຍຈີນເຫັນດີທີ່ຈະປັບປຸງຂອດຂັ້ນອະນຸມັດໃຫ້ມີຄວາມສະດວກຂຶ້ນກວ່າເກົ່າ ໂດຍບໍ່ຈໍາເປັນຕ້ອງໄປຜ່ານສະຖານທູດຄືເມື່ອກ່ອນ.
ນອກນີ້ ກອງປະຊຸມຍັງໄດ້ຮັບຮູ້ກ່ຽວກັບການປະສານງານຂອງກອງເລຂາ WTO ທີ່ຕ້ອງການໃຫ້ຄະນະກໍາມະການການຄ້າເສລີອາຊຽນຈີນແຈ້ງ ກ່ຽວກັບຄວາມສອດຄ່ອງຂອງສັນຍາການຄ້າເສລີ ໃຫ້ແກ່ຄະນະກໍາມະການວ່າດ້ວຍສັນຍາການຄ້າພາກພື້ນ ຂອງ WTO ເພື່ອດຳເນີນຂັ້ນຕອນທົບທວນຄວາມສອດຄ່ອງດັ່ງກ່າວ. ສປປ ລາວ ຈໍາເປັນຈະຕ້ອງປັບປຸງລະດັບການເປີດໃນຂະແໜງການດ້ານການຄ້າດ້ານບໍລິການຕື່ມ ຊື່ງຍັງຈໍາກັດຫຼາຍ ມີພຽງ 19 ຂະແໜງຫຍ່ອຍ ເມືອທຽບໃສ່ລະດັບການເປີດໃນຂອບ WTO ທີ່ມີເຖີງ 79 ຂະແໜງຫຍ່ອຍ.
ກອງປະຊຸມຄັ້ງນີ້ໄດ້ສຸມໃສ່ປຶກສາຫາລືກ່ຽວກັບບັນດາອົງປະກອບ (Elements)ທີ່ໄດ້ກຳນົດໄວ້ໃນສັນຍາການຄ້າເສລີອາຊຽນ-ຈີນ ສະບັບເປີດກວ້າງ ຊຶ່ງໄດ້ຮັບການຮັບຮອງເອົາແລ້ວ ໂດຍລັດຖະມົນຕີເສດຖະກິດອາຊຽນແລະລັດຖະມົນຕີການຄ້າຂອງຈີນ. ທຸກຝ່າຍລ້ວນແຕ່ຮັບຮູ້ຄວາມສຳຄັນຂອງສັນຍາສະບັບນີ້ ແລະ ພະຍາຍາມເຮັດແນວໃດໃຫ້ຕົນເອງໄດ້ຮັບຜົນປະໂຫຍດສູງສຸດ. ເຖີງວ່າ ແຕ່ລະປະເທດຈະມີບູລິມະສິດແຕກຕ່າງກັນແຕ່ກໍໄດ້ໃຫ້ຄວາມຮ່ວມມືດີໃນການເຈລະຈາດ້ວຍທັດສະນະທີ່ສ້າງສັນ ຊຶ່ງຈະເຮັດໃຫ້ສັນຍາສະບັບເປີດກວ້າງມີຄຸນນະພາບດີ,ຕ່າງຝ່າຍຕ່າງໄດ້ຮັບຜົນປະໂຫຍດທີ່ພໍໃຈ ແລະ ສາມາດສະຫລຸບການເຈລະຈາໃນປີ 2015 ຕາມແຜນການ.
ສຳຫລັບ ສປປ ລາວ ສັນຍາ ສະບັບເປີດກວ້າງ ຈະມີທັງໂອກາດ ແລະ ສິ່ງທ້າທາຍ. ໂອກາດ ຫລັກຄື: ຕະຫລາດສົ່ງອອກຂອງລາວ ແລະ ການລົງທຶນຈາກຈີນມາລາວ ຈະໄດ້ຮັບການຂະຫຍາຍກ້ວາງອອກ ແຕ່ສິ່ງທ້າທາຍທີ່ລາວຈະຕ້ອງຜ່ານຜ່າ ຄື: ການກະກຽມຄວາມພ້ອມພາຍໃນຂອງລາວເຮົາເອງ. ຖ້າບໍ່ມີຄວາມພ້ອມທາງດ້ານການຄຸ້ມຄອງມະຫາພາກ ແລະ ດ້ານຄຸນນະພາບຂອງການຜະລິດ ລາວຈະບໍ່ໄດ້ຮັບຜົນປະໂຫຍດເທົ່າທີ່ຄວນ.
ຍ້ອນຄຳໜຶງເຖີງໂອກາດ ແລະ ສິ່ງທ້າທາຍ ດັ່ງກ່າວ ຄະນະເຈລະຈາ ຂອງ ລາວ ຈຶ່ງ ນຳໃຊ້ວິທີການເຈລະຈາ(Negotiation Approach) ແບບເປີດ ແລະ ປິດ. ເປີດສິ່ງທີ່ ລາວໄດ້ຜົນປະໂຫຍດ ແລະ ປິດສິ່ງທີ່ລາວເສຍປຽບ ບໍ່ສາມາດແຂ່ງຂັນ ເພື່ອມີເວລາປັບຕົວ ໂດຍສະເພາະຂົງເຂດການຄ້າດ້ານສິນຄ້າ ແລະ ການຄ້າບໍລິການ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.