ພະແນກອຳນວຍຄວາມສະດວກທາງດ້ານການຄ້າ
ກົມການນຳເຂົ້າ ແລະ ສົ່ງອອກ
ກະຊວງອຸດສາຫະກຳ ແລະ ການຄ້າ
5 ມັງກອນ 2015
ບົດຄັດຫຍໍ້
ບົດຄົ້ນຄວ້ານີ້ ໄດ້ວິເຄາະຂະບວນການເຮັດສັນຍາລະບົບແຈ້ງພາສີປະຕູດຽວແຫ່ງຊາດ ຢູ່ ສປປ ລາວ ໂດຍອີງໃສ່ສອງຕົວຊີ້ວັດຕົ້ນຕໍຄື: ການມີສ່ວນຮ່ວມໃນຂະບວນການເຮັດສັນຍາຂອງພາກສ່ວນກ່ຽວຂ້ອງ ແລະ ບັນທັດຖານຂອງຄວາມເປັນຜູ້ປະກອບການທາງທຸລະກິດ. ຜົນຂອງການວິເຄາະໄດ້ສະແດງໃຫ້ເຫັນວ່າ ການເຮັດສັນຍາສຳປະທານ ລະຫວ່າງລັດຖະບານລາວ ແລະ ບໍລິສັດບິວໂຣເວີຣິຕັສ ວ່າດ້ວຍການພັດທະນາລະບົບແຈ້ງພາສີປະຕູດຽວແຫ່ງຊາດ ເປັນຍຸດທະສາດອັນດີ ທີ່ມີທ່າແຮງໃນການອຳນວຍຄວາມສະດວກດ້ານການຄ້າ ຢູ່ ສປປ ລາວ ແລະ ໃນການເຊື່ອມໂຍງເສດຖະກິດລາວ ເຂົ້າກັບເສດຖະກິດຂອງບັນດາປະເທດສະມາຊິກອາຊຽນ. ຜົນຂອງການວິເຄາະຕົ້ນທຶນ-ຜົນຕອບແທນຂອງ ລະບົບເຈ້ຍ-ສໍ ແລະ ລະບົບແຈ້ງພາສີປະຕູດຽວ ສະແດງໃຫ້ເຫັນວ່າ ການນຳໃຊ້ລະບົບແຈ້ງພາສີປະຕູດຽວ ຢູ່ ສປປ ລາວ ຈະຊ່ວຍຫຼຸດຜ່ອນຕົ້ນທຶນຂອງພາກທຸລະກິດໃນການຂໍອະນຸຍາດນຳເຂົ້າ-ສົ່ງອອກ ໄດ້ປະມານ $248.527.448 ໃນໄລຍະເວລາ 10 ປີ ເຊິ່ງຫຼຸດລົງຈາກ $356.647.975 ໃນກໍລະນີຂອງລະບົບເຈ້ຍ-ສໍ ເປັນ $108.120.527 ໃນກໍລະນີຂອງລະບົບແຈ້ງພາສີປະຕູດຽວ. ລັດຖະບານລາວ ຈະມີລາຍຮັບເພີ່ມຂຶ້ນປະມານ $4.636.417 ໃນໄລຍະເວລາ 10 ປີຂອງການສຳປະທານ (ບໍ່ລວມຄ່າພາກຫຼວງ ແລະ ອາກອນກຳໄລ ທີ່ຈະໄດ້ຮັບຈາກ ບໍລິສັດຮ່ວມທຶນ). ເຖິງຢ່າງໃດກໍ່ຕາມ, ຄ່າບໍລິການຂອງລະບົບແຈ້ງພາສີປະຕູດຽວ ຢູ່ ສປປ ລາວ ແມ່ນສູງກວ່າຫຼາຍປະເທດໃນໂລກ ເຊິ່ງມີມູນຄ່າປະມານ $18.545.667 ຫຼື 17,15% ຂອງຄ່າໃຊ້ຈ່າຍທັງໝົດໃນການຂໍອະນຸຍາດນຳເຂົ້າ-ສົ່ງອອກ ໃນໄລຍະເວລາ 10 ປີ ຂອງການສຳປະທານ. ຄ່າບໍລິການລະບົບດັ່ງກ່າວ ຈະເປັນອຸປະສັກຕໍ່ ຄວາມສາມາດແຂ່ງຂັນທາງທຸລະກິດຂອງຜູ້ປະກອບການພາຍໃນປະເທດ ແລະ ຈຳກັດການຂະຫຍາຍຕົວ ແລະ ການສ້າງຄວາມຫຼາກຫຼາຍທາງດ້ານການຄ້າໃນຂະແໜງອຸດສາຫະກຳ ທີ່ຕິດພັນກັບເຄືອຂ່າຍການຜະລິດຂອງໂລກ. ຂໍ້ຄົງຄ້າງຂອງການເຮັດສັນຍາສຳປະທານ ແມ່ນການກຳນົດຄ່າບໍລິການຂອງລະບົບແຈ້ງພາສີປະຕູດຽວຕາມເງື່ອນໄຂຂອງການລົງທຶນ ເຊິ່ງຜູ້ປະກອບການນຳເຂົ້າ-ສົ່ງອອກສິນຄ້າ ຢູ່ ສປປ ລາວ ອາດບໍ່ພໍໃຈໃນການຈ່າຍຄ່າບໍລິການດັ່ງກ່າວ. ສະນັ້ນ, ກົມພາສີຂອງກະຊວງການເງິນ ຄວນມີມາດຕະການຊົດເຊີຍຄ່າບໍລິການຂອງລະບົບແຈ້ງພາສີປະຕູດຽວໃຫ້ແກ່ຜູ້ປະກອບການ ໃນໄລຍະເວລາໃດໜຶ່ງ ເຊັ່ນ: 5 ປີທຳອິດຂອງການສຳປະທານ. ຫຼັງຈາກນັ້ນ, ກົມພາສີ ຄວນເຈລະຈາກັບບໍລິສັດບິວໂຣເວີຣິຕັສອີກຄັ້ງໜຶ່ງ ເພື່ອຂໍຫຼຸດຄ່າບໍລິການ ໃຫ້ຢູ່ໃນອັດຕາທີ່ເໝາະສົມ.
| # | ຫົວຂໍ້ | ດາວໂຫຼດ |
|---|---|---|
| 1 | Is the contract arrangement for establishing Lao National Single Window adequate to facilitate trade in Lao PDR? |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.