ຕາມວາລະກອງປະຊຸມ, ເລີ່ມຈາກ ທ່ານ ປະທານຮ່ວມທັງສອງຝ່າຍ ໄດ້ມີຄຳເຫັນ ແລະ ກ່າວເປີດກອງປະຊຸມຢ່າງເປັນທາງການ. ໃນນີ້ ກອງປະຊຸມໄດ້ແບ່ງອອກເປັນ 3 ພາກໃຫຍ່ຄື: 1) ສະພາບການຄ້າ ແລະ ການລົງທຶນຂອງ ສປປ ລາວ, 2) ນະໂຍບາຍການສົ່ງເສີມການລົງທຶນ ແລະ ລະບຽບການທີ່ກ່ຽວຂ້ອງຂອງ ສປປ ລາວ; 3) ການລົງທຶນ ໃນເຂດເສດຖະກິດພິເສດ ແລະ ເຂດເສດຖະກິດສະເພາະ ຢູ່ ສປປ ລາວ. ຫຼັງຈາກນັ້ນ ກໍໄດ້ເປີດໂອກາດໃຫ້ມີການຖາມ-ຕອບເພື່ອແລກປ່ຽນຄຳຄິດຄຳເຫັນຮ່ວມກັນ.
ກອງປະຊຸມຈັດຂຶ້ນ ແລະ ດໍາເນີນໄປດ້ວຍຄວາມເອົາໃຈໃສ່ ແລະ ການສະໜັບສະໜູນຈາກສອງຝ່າຍ ເຮັດໃຫ້ປະສົບຜົນສໍາເລັດ ຕາມຈຸດປະສົງລະດັບຄາດໝາຍ, ມີນັກທຸລະກິດຈີນໃຫ້ຄວາມສົນໃຈ ແລະ ເຂົ້າຮ່ວມເກີນຈຳນວນທີ່ຄາດໝາຍ. ສຽງຕອບຮັບພາຍຫຼັງຈັດຕັ້ງກອງປະຊຸມ ໄດ້ມີນັກທຸລະກິດຈຳນວນໜຶ່ງສະແດງເຈດຈຳນົງຢາກມາລົງທຶນຢູ່ ສປປ ລາວ ໃນຂະແໜງຊັບພະຍາກອນທຳມະຊາດ (ແຮ່, ໄຟຟ້າ, ກະສິກຳ) ການລົງທຶນໃນຂະແໜງອະສັງຫາລິມມະຊັບ ກໍກໍາລັງເປັນທີ່ໜ້າສົນໃຈຂອງນັກທຸລະກິດຈີນ ໃນປັດຈຸບັນເຊັ່ນກັນ.
ກອງປະຊຸມໃນຄັ້ງນີ້ໄດ້ເປັນບາດກ້າວໜຶ່ງທີ່ສຳຄັນຂອງການຮ່ວມມື 2 ຊາດ ລາວ-ຈີນ. ໂດຍຜ່ານການຮ່ວມມືດັ່ງກ່າວ, ສປປ ລາວ ສາມາດສົ່ງຕໍ່ຂໍ້ມູນ ໂດຍຜ່ານສະຫະພັນການລົງທຶນຕ່າງປະເທດຈີນ ທີ່ເຮັດໜ້າທີ່ຊ່ວຍເປັນຂົວຕໍ່ໄປຍັງນັກທຸລະກິດຈີນ; ເພື່ອເຜິຍແຜ່ໂຄສະນານະໂຍບາຍການຕ່າງປະເທດ ທີ່ກ່ຽວຂ້ອງກັບວຽກງານເສດຖະກິດ-ການຄ້າ-ການລົງທຶນ ແລະ ດ້ານອື່ນໆ ເຮັດໃຫ້ນັກທຸລະກິດຈີນຮັບຮູ້ ແລະ ເຂົ້າໃຈສະພາບການພັດທະນາເສດຖະກິດ-ສັງຄົມ ຢູ່ ສປປ ລາວ ຫຼາຍຂຶ້ນ; ຊຸກຍູ້ໃຫ້ມີການຈັດຕັ້ງຄະນະນັກທຸລະກິດ ມາສືກສາສະພາບຂໍ້ມູນຄວາມເປັນໄປໄດ້ຕົວຈິງ ຢູ່ ສປປ ລາວ ເຊິ່ງ ກໍແມ່ນວຽກງານໜຶ່ງ ທີ່ທັງສອງຝ່າຍຈະໄດ້ພ້ອມກັນຈັດຕັ້ງປະຕິບັດ ໃນປີຕໍ່ໜ້າ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.