ການຝຶກອົບຮົມຄັ້ງນີ້ ເພື່ອເປັນການສ້າງທັກສະ ຄວາມຮູ້, ຄວາມສາມາດ ໃນການຂີດຂຽນບົດຂ່າວ, ບົດຄວາມ ແລະ ສິ່ງພິມຕ່າງໆ ໃຫ້ແກ່ພະນັກງານວິຊາການ ໂດຍສະເພາະທີມງານບໍລິຫານ ແລະ ຈຸດປະສານງານ ຂອງສູນຂໍ້ມູນຂ່າວສານທາງດ້ານການຄ້າ ຂອງ ສປປ ລາວ ແລະ ຂະແໜງການກ່ຽວຂ້ອງ ໃຫ້ມີຄວາມຖືກຕ້ອງຕາມຫຼັກການ, ມີຄວາມຊັດເຈນ ແລະ ວ່ອງໄວທັນກັບສະພາບ. ເພື່ອຜັນຂະຫຍາຍ ເຂົ້າໃນວຽກງານເຜີຍແຜ່ຂໍ້ມູນຂ່າວສານສູ່ສັງຄົມ. ພ້ອມທັງເປັນການແລກປ່ຽນຄວາມຮູ້ ແລະ ປະສົບການກ່ຽວກັບການຂີດຂຽນ ຂອງນັກວິທະຍາກອນ ແລະ ຜູ້ເຂົ້າຮ່ວມ.
ການຈັດຊຸດຝຶກອົບຮົມ ໄດ້ດຳເນີນໄປຕາມວາລະ ໂດຍມີການນຳສະເໜີບັນດາເນື້ອໃນທີ່ສຳຄັນ ຄື: 1) ການລາຍງານຂ່າວເບື້ອງຕົ້ນ; 2) ການພາດຫົວຂໍ້ຂ່າວ ແລະ ການຂຽນຄຳນຳ/ວັກນຳ, 3) ເຕັກນິກການສຳພາດ; 4) ການປຽບທຽບລັກສະນະການຂຽນຂ່າວ ແລະ ບົດຄວາມ ;5) ບົດຮຽນການຂຽນບົດຄວາມພື້ນຖານ ; 6) ການຂຽນລາຍງານພິເສດ ແລະ ສະກູບພິເສດ ; 7) ຈັນຍາບັນຂອງສື່ມວນຊົນ ; 8) ການໃຊ້ສຳນວນ ແລະ ພາສາໃນບົດຂ່າວ ; 9) ເຕັກນິກການຂຽນຂ່າວ, ສື່ສິ່ງພິມ ; 10) ການວິິໄຈ ແລະ ປະເມີນຄຸນຄ່າຂອງຂ່າວ ; 11) ການຂຽນຂ່າວຕາມນິຕິກຳ ບໍ່ວ່າຈະເປັນແຈ້ງການ, ຂໍ້ຕົກລົງຕ່າງໆ ; 12) ຄວາມຮູ້ພື້ນຖານກ່ຽວກັບການຖ່າຍພາບ.
ການຈັດຝຶກອົບຮົມໃນຄັ້ງນີ້ ໄດ້ດຳເນີນໄປດ້ວຍບັນຍາກາດອັນຟົດຟື້ນ ແລະ ເປັນກັນເອງ, ມີການຕັ້ງຄຳຖາມ, ສະເໜີຂໍ້ຄິດເຫັນຕ່າງໆ ເພື່ອແລກປ່ຽນບົດຮຽນຢ່າງຫຼາກຫຼາຍ. ຜູ້ເຂົ້າຮ່ວມມີຄວາມຕັ້ງໃຈໃນການເກັບກ່ຽວເອົາບົດຮຽນ, ຄວາມຮູ້ ນຳຄູຝຶກທີ່ຖ່າຍທອດໃຫ້. ຄູຝຶກແມ່ນມີຄວາມຈິງໃຈ ໃນການຖ່າຍທອດບົດຮຽນ, ຄວາມຮູ້ທີ່ມີ ໃຫ້ນັກສຳມະນາກອນຢ່າງຈິງຈັງ ແລະ ຈິງໃຈ ໂດຍການອະທິບາຍບົດຮຽນຢ່າງລະອຽດຈະແຈ້ງ. ນອກນີ້ ການເຮັດບົດຝຶກຫັດໃນການຂຽນບົດຂ່າວ ໄດ້ເຮັດໃຫ້ຜູ້ເຂົ້າຮ່ວມເຂົ້າໃຈແຈ້ງຂຶ້ນຕື່ມ.
ການຝຶກອົບຮົມ ໄດ້ດຳເນີນໄປເປັນເວລາ 3 ວັນ ເຖິງວ່າເປັນເວລາສັ້ນ ແຕ່ໄດ້ດຳເນີນໄປດ້ວຍດີ ແລະ ສາມາດບັນລຸຈຸດປະສົງເປົ້າໝາຍ. ໃນຕອນທ້າຍ ໄດ້ມີການມອບໃບຢັ້ງຢືນ ໃຫ້ແກ່ນັກສຳມະນາກອນ ທີ່ໄດ້ຈົບຫຼັກສູດຂອງການຝຶກອົບຮົມ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.