ເພື່ອເປັນການສ້າງຂີດຄວາມສາມາດ ໃຫ້ແກ່ວຽກງານອຳນວຍຄວາມສະດວກທາງດ້ານການຄ້າ ຂອງອາຊຽນ, ໂດຍແນໃສ່ເຮັດໃຫ້ສູນຂໍ້ມູນການຄ້າອາຊຽນ ຫຼື ATR (ASEAN Trade Repository) ມີເນື້ອໃນຢ່າງສົມບູນ, ຄົບຖ້ວນ, ຫຼາກຫຼາຍ ແລະ ໂປ່ງໃສ. ກ່ອນອື່ນ, ບັນດາສະມາຊິກ ອາຊຽນ ຕ້ອງມີສູນຂໍ້ມູນການຄ້າແຫ່ງຊາດ ຫຼື NTR (National Trade Repository).
ເນື່ອງຈາກວ່າ ສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ ໄດ້ຖືກອອກແບບໃຫ້ມີຄວາມສະດວກ ແລະ ງ່າຍດາຍ ໃນການນໍາໃຊ້, ແລະ ການຄົ້ນຫາຂໍ້ມູນດ້ານການຄ້າແມ່ນສາມາດເຮັດໄດ້ໃນຫຼາກຫຼາຍຮູບແບບ ເຊິ່ງປະຈຸບັນ ສູນຂໍ້ມູນຂ່າວສານທາງດ້ານການຄ້າ ຂອງ ສປປ ລາວ ໄດ້ເປັນທີ່ຮັບຮູ້ຢ່າງກ້ວາງຂວາງທັງພາຍໃນ ແລະ ຕ່າງປະເທດ. ນອກຈາກນີ້, ສູນຂໍ້ມູນຂ່າວສານທາງດ້ານການຄ້າດັ່ງກ່າວ ຍັງເປັນຮູບແບບຂອງການພັດທະນາເວັບໄຊ້ ທີ່ຫຼາຍປະເທດໃຫ້ຄວາມສົນໃຈເພື່ອນຳເອົາໄປເປັນຕົວແບບໃນການສ້າງ ແລະ ພັດທະນາສູນຂໍ້ມູນຂ່າວສານທາງດ້ານການຄ້າຂອງເຂົາເຈົ້າ. ໃນປີຜ່ານມາ, ກະຊວງ ອຄ ລາວ ກໍເຄີຍໄດ້ມອບ source code ເວັບໄຊ້ຂອງ Lao Trade Portal ໃຫ້ແກ່ຣາຊະອານາຈັກເລໂຊໂທ (ເລໂຊໂທເປັນປະເທດໜຶ່ງຢູ່ໃນທະວີບອາຟຣິກາ) ແລະ ໄດ້ເປີດນຳໃຊ້ຢ່າງເປັນທາງການໃນວັນທີ 26 ມີນາ 2014.
ໃນວາລະຢ້ຽມຢາມຄັ້ງນີ້, ກະຊວງ ອຄ ລາວ ກໍໄດ້ເຊັນບົດບັນທຶກຊ່ວຍຈຳ (MoU) ກ່ຽວກັບການມອບ source code ເວັບໄຊ້ຂອງ Lao Trade Portal ໃຫ້ກະຊວງການຄ້າມຽນມາ ໂດຍການເຊັນມອບຂອງ ທ່ານ ນາງ ເຂັມມະນີ ພົນເສນາ, ລັດຖະມົນຕີວ່າການກະຊວງ ອຄ ລາວ ແລະ ໃນໂອກາດທີ່ຄະນະກະຊວງການຄ້າມຽນມາ ໄດ້ເຂົ້າພົບທ່ານ ລັດຖະມົນຕີກະຊວງ ອຄ ລາວ, ທ່ານ ລັດຖະມົນຕີ ກໍໄດ້ກ່າວຍິນດີຕໍ່ກັບການຮ່ວມມື ເພື່ອເປັນການຊ່ວຍເຫຼືອ ແລະ ແລກປ່ຽນບົດຮຽນ ລະຫວ່າງປະເທດດ້ອຍພັດທະນາດ້ວຍກັນໃຫ້ສາມາດແຂ່ງຂັນກັບປະເທດອື່ນ. ພ້ອມນັ້ນ, ກໍຍັງສະໜັບສະໜຸນໃຫ້ສືບຕໍ່ແລກປ່ຽນບົດຮຽນນຳກັນລະຫວ່າງສອງປະເທດ ກໍຄື 2 ກະຊວງ ໃຫ້ແໜ້ນແຟ້ນຂຶ້ນເລື້ອຍໆ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.