ກອງປະຊຸມຝຶກອົບຮົມຄັ້ງນີ້ຈັດຂື້ນເພື່ອເປັນການເສີມສ້າງທັກສະ ແລະ ຄວາມສາມາດ ໃຫ້ເຈົ້າໜ້າທີ່ຂອງພາກລັດ ຂອງບັນດາປະເທດໃນພາກພື້ນ ທີ່ເຮັດວຽກໃນດ້ານວຽກງານ ມາດຕະການທາງດ້ານການຄ້າທີ່ບໍ່ແມ່ນພາສີ ໃນການປະເມີນ, ວິເຄາະ ແລະ ຮຽນຮູ້ວິທີການໃນການເຮັດບົດລາຍການຜົນກະທົບຂອງ NTMs ທີ່ມີຕໍ່ດ້ານເສດຖະກິດ ໂດຍມີຊ່ຽວຊານຈາກທາງທະນະຄານໂລກ ມາເປັນຜູ້ບັນຍາຍ. ໃນຂະນະດຽວກັນກໍ່ເປັນການເປີດໂອກາດໃຫ້ຜູ້ເຂົ້າຮ່ວມຈາກບັນດາປະເທດອ້ອມຂ້າງ ມີໂອກາດໃນການສົນທະນາ ເພື່ອແລກປ່ຽນບົດຮຽນເຊິ່ງກັນ ແລະ ກັນ ເພຶ່ອເປັນການສ້າງຄວາມໂປ່ງໃສທາງດ້ານການຄ້າ ໂດຍສະເພາະ ແມ່ນການຄ້າລະຫວ່າງປະເທດ.
ໃນການສຳມະນາຄັ້ງນີ້ ໄດ້ແບ່ງອອກເປັນ 3 ພາກຄື: ພາກ ທິດສະດີ, ພາກເຮັດບົດຝຶກຫັດ ແລະ ພາກແລກປ່ຽນຄວາມຄິດເຫັນ. ບັນດານັກສຳມະນາກອນ ໄດ້ມີໂອກາດຮຽນຮູ້ເຕັກນິກຕ່າງໃນການເກັບກຳຂໍ້ມູນ ແລະ ວິທີການວິເຄາະຂໍ້ມູນແບບວິທະຍາສາດ ຊຶ່ງໜຶ່ງໃນນີ້ກໍ່ແມ່ນການນຳໃຊ້ ໂປຼແກມ WITS ຊຶ່ງເປັນໂປຼແກມໜຶ່ງຂອງທະນະຄານໂລກ ທີ່ໃຊ້ໃນການສັງລວມ ຂໍ້ມູນການນຳເຂົ້າສົ່ງອອກ ຂອງປະເທດຕ່າງໆໃນໂລກ ໂດຍສະເພາະແມ່ນປະເທດ ທີ່ໄດ້ມີການແຈ້ງຂໍ້ມູນການນຳເຂົ້າ ແລະ ສົ່ງອອກໄປໃຫ້ທາງທະນະຄານໂລກ. ພ້ອມດຽວກັນ ໄດ້ເປີດໂອກາດໃຫ້ພາກທຸລະກິດເຂົ້າຮ່ວມ ຝຶກອົບຮົມ ຮັບຟັງ, ແລກປ່ຽນ ຄໍາຄິດເຫັນກ່ຽວກັບບັນຫາ ຫຼື ຂໍ້ສະດວກ ແລະ ຂໍ້ຫຍຸ້ງຍາກຕ່າງໆ ໃນການຈັດຕັ້ງປະຕິບັດມາດຕະການ NTMs.
ເຊັ່ນດຽວກັນ ຜູ້ເຂົ້າຮ່ວມຍັງໄດ້ມີໂອກາດເຮັດບົດຝຶກຫັດ ທີ່ທາງຊ່ຽວຊານຈາກທະນະຄານໂລກໄດ້ຈັດກຽມໄວ້ ເພື່ອເຮັດໃຫ້ແຕ່ລະຄົນມີຄວາມເຂົ້າໃຈແຈ້ງ ກ່ຽວກັບວຽກງານດັ່ງກ່າວ. ມື້ສຸດທ້າຍຂອງກອງປະຊຸມຝຶກອົບຮົມ ໄດ້ມີການເປີດໂອກາດໃຫ້ຜູ້ເຂົ້າຮ່ວມຈາກບັນດາປະເທດອ້ອມຂ້າງລາຍງານ ແລະ ມີຄວາມເຫັນຕໍ່ການຈັດຕັ້ງປະຕິບັດໂຄງການ NTMs ໃນປະເທດຂອງຕົນ. ຊຶ່ງສ່ວນຫຼາຍແມ່ນຍັງຢູ່ໃນຂັ້ນຕອນການສັງລວມຂໍ້ມູນ ເພື່ອທີ່ຈະມາຈັດປະເພດມາດຕະການ. ການຝຶກອົບຮົມຄັ້ງນີ້ໄດ້ດໍາເນີນໄປດ້ວຍບັນຍາກາດອັນຟົດຟື້ນ ແລະ ເປັນມິດ. ບັນດານັກສຳມະນາກອນທາງຫຼາຍ ໄດ້ສະແດງຄວາມເອົາໃຈໃສ່ຕໍ່ບົດຮຽນ ກໍ່ຄືແຕ່ລະຫົວຂໍ້ທີ່ທາງຊ່ຽວຊານໄດ້ນຳສະເໜີ ຊຶ່ງສາມາດສະຫຼຸບໄດ້ວ່າ ເປັນການຝຶກອົບຮົມທີ່ມີຄວາມໝາຍຄວາມສຳຄັນຫຼາຍ ແລະ ອາດກາຍເປັນບາດກ້າວໜຶ່ງ ເພື່ອເຊື່ອມໂຍງຄວາມສາມັກຄີກັບບັນດາປະເທດໃນພາກພື້ນໂດຍສະເພາະແມ່ນ ປະເທດທີ່ໄດ້ເຂົ້າຮ່ວມກັນຝຶກອົບຮົມຄັ້ງນີ້.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.