ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອແຈ້ງໃຫ້ພາກທຸລະກິດສົ່ງອອກຮັບຊາບ ກ່ຽວກັບແຜນງານສໍາຫຼວດ ມາດຕະການດ້ານການຄ້າທີ່ບໍ່ແມ່ນພາສີ; ສ້າງຄວາມຮັບຮູ້ພື້ນຖານ ກ່ຽວກັບອຸປະສັກດ້ານການຄ້າ, ການຈັດປະເພດບັນດາມາດຕະການ NTMs, ລະບຽບດ້ານສຸຂານາໄມ ແລະ ສຸຂານາໄມພືດ (SPS) ແລະ ສິ່ງກີດຂວາງດ້ານເຕັກນິກຕໍ່ການຄ້າ (TBT) ໃຫ້ແກ່ພາກທຸລະກິດ; ແລະ ແຈ້ງໃຫ້ຮູ້ເຖິງຈຸດປະສົງ ແລະ ຂອບເຂດຂອງການດໍາເນີນການສຳຫຼວດ ແລະ ບົດວິໄຈ.
ທ່ານ ນາງ ມະນີວອນ ວົງໄຊ, ຮອງຫົວໜ້າກົມການນຳເຂົ້າ ແລະ ສົ່ງອອກ ໄດ້ກ່າວສະພາບໂດຍລວມ ໂຄງການທົບທວນຄືນ ມາດຕະການດ້ານການຄ້າທີ່ບໍ່ແມ່ນພາສີຂອງ ສປປ ລາວ ຊຶ່ງປະກອບມີ 2 ອົງປະກອບໃຫຍ່ຄື: 1) ທົບທວນຄືນມາດຕະການພາຍໃນ (ເບື້ອງນໍາເຂົ້າ) ແລະ 2) ການສໍາຫຼວດມາດຕະການຂອງຕ່າງປະເທດ (ເບື້ອງສົ່ງອອກ) ທີ່ຜູ້ສົ່ງອອກຂອງລາວພົບພໍ້. ສໍາລັບການທົບທວນຄືນມາດຕະການພາຍໃນ, ກົມການນຳເຂົ້າ ແລະ ສົ່ງອອກ ແມ່ນໄດ້ສຳເລັດການສັງລວມ ແລະ ຈັດປະເພດມາດຕະການ NTM ແລ້ວເຜີຍແຜ່ຢູ່ໃນເວັບໄຊທ໌ Lao Trade Portal ເປັນທີ່ຮຽບຮ້ອຍ ໂດຍການເຮັດວຽກກັບແຕ່ຂະແໜງການພາກລັດທີ່ກ່ຽວຂ້ອງ ທີ່ຖືກແຕ່ງຕັ້ງເຂົ້າມາເປັນ ຈຸດປະສານງານຂອງໜ່ວຍງານ NTM ຫຼາຍຄັ້ງພໍສົມຄວນ. ສຳລັບແຜນງານການສຳຫຼວດມາດຕະການຂອງ ຕ່າງປະເທດນີ້ ກໍ່ຄືກອງປະຊຸມແຜນງານຄັ້ງນີ້ ໄດ້ກຳນົດເວລາການເຮັດວຽກປະມານ 3-4 ເດືອນ ຊຶ່ງຈະຖືກດຳເນີນງານໂດຍ ບໍລິສັດທີ່ປຶກສາ EDC ພາຍໃຕ້ການນຳພາຂອງທ່ານ Dr. Prabir De, ຊ່ຽວຊານໂຄງການ NTM ໂດຍການສະໜັບສະໜູນທາງດ້ານຂໍ້ມູນຂອງກົມການນຳເຂົ້າ ແລະ ສົ່ງອອກ.
ກອງປະຊຸມໄດ້ດຳເນີນໄປໃນບັນຍາກາດອັນຟົດຟື້ນ, ມີການສະເໜີແລກປ່ຽນສອບຖາມຢ່າງກົງໄປກົງມາ ແລະ ໄດ້ຮັບໝາກຜົນຕາມຄາດໝາຍທີ່ວາງໄວ້ ຊຶ່ງຕາງໜ້າຈາກພາກທຸລະກິດ ໄດ້ຮັບຊາບ ແລະ ເຫັນດີເປັນເອກະພາບກັບ ແຜນງານສຳຫຼວດດັ່ງກ່າວ ເນື່ອງຈາກຫຼາຍປະເທດກໍ່ໄດ້ຈັດຕັ້ງປະຕິບັດໄປແລ້ວ, ທັງນີ້ກໍ່ເພື່ອຊ່ວຍບັນດາທຸລະກິດສົ່ງອອກຂອງ ລາວເຮົາ ໃຫ້ສາມາດສົ່ງອອກສິນຄ້າ ໄປແຂ່ງຂັນຢູ່ຕະຫຼາດຕ່າງປະເທດໄດ້ ແລະ ຈະໃຫ້ການຮ່ວມມືໃນການໃຫ້ສຳພາດ ແລະ ປະກອບຂໍ້ມູນທີ່ເປັນປະໂຫຍດຕໍ່ການສຳຫຼວດດັ່ງກ່າວ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.