ຈຸດປະສົງຂອງກອງປະຊຸມໃນຄັ້ງນີ້ ແມ່ນເພື່ອກວດຄືນບັນດາມາດຕະການທີ່ທາງສູນກາງໄດ້ປະກອບຄຳເຫັນໃນກອງປະຊຸມ ໃນເດືອນຕຸລາ ປີ 2013 ຢູ່ທີ່ນະຄອນຫຼວງວຽງຈັນ ກ່ຽວກັບສັນຍາວ່າດ້ວຍການອຳນວຍຄວາມສະດວກທາງດ້ານການຄ້າ ເຊິ່ງຜົນທີ່ໄດ້ຮັບໃນຄັ້ງນັ້ນໄດ້ ແບ່ງອອກເປັນ 3 ປະເພດ ຄື: ປະເພດ ກ: ມາດຕາທີ່ຈັດຕັ້ງປະຕິບັດໄດ້ເຕັມສ່ວນ ມີ 21 ມາດຕາ; ປະເພດ ຂ: ມາດຕາທີ່ສາມາດຈັດຕັ້ງປະຕິບັດປະມານ 70% ເຊິ່ງຕ້ອງການເວລາເພິ່ມຕຶ່ມໃນການຈັດຕັ້ງປະຕິບັດມີ 10 ມາດຕາ; ແລະ ປະເພດ ຄ: ມາດຕາທີ່ຍັງຕ້ອງການເວລາ ແລະ ຄວາມຊ່ວຍເຫຼືອ ມີ 11 ມາດຕາ. ສະນັ້ນ, ກອງປະຊຸມທົບທວນຄືນຄັ້ງນີ້ ຈະເປັນການຮັບປະກັນວ່າຜົນໄດ້ຮັບຈາກການປະເມີນດັ່ງກ່າວແມ່ນເປັນຂໍ້ມູນທີ່ຖືກຕ້ອງ ແລະ ສອດຄ່ອງກັບການຈັດຕັ້ງປະຕິບັດຕົວຈິງຢູ່ຂັ້ນແຂວງ, ທັງນີ້ ກໍ່ເພື່ອ ຮັບປະກັນຜົນປະໂຫຍດ ຂອງ ສປປ ລາວ ເອງ ໃນການຍາດຊິງອົາຄວາມຕ້ອງການ ແລະ ບຸລິມະສິດ ໃນການພັດທະນາເສດຖະກິດ ແລະ ສັງຄົມ ຂອງ ສປປ ລາວ.
ກອງປະຊຸມດັ່ງກ່າວ ໄດ້ເປັນເວທີສົນທະນາອັນສໍາຄັນໃນການແລກປ່ຽນຄໍາຄິດເຫັນ ກ່ຽວກັບວຽກງານການອຳນວຍຄວາມສະດວກທາງດ້ານການຄ້າຂອງ ສປປ ລາວ ເພື່ອຮັບປະກັນຄວາມສອດຄ່ອງກັນ ລະຫວ່າງ ສູນກາງກັບທ້ອງຖິ່ນ. ບັນດາແຂກຜູ້ເຂົ້າຮ່ວມໄດ້ໃຫ້ຄໍາເຫັນວ່າ ກອງປະຊຸມຄັ້ງນີ້ ເປັນເຄື່ອງມືອັນສຳຄັນໃນການເຜີຍແຜ່ ບັນດານະໂຍບາຍ ແລະ ຜົນການຈັດຕັ້ງປະຕິບັດກ່ຽວກັບວຽກງານອຳນວຍຄວາມສະດວກທາງດ້ານການຄ້າ ໄດ້ເປັນຢ່າງດີ ແລະ ຄວາມຮູ້ທີ່ໄດ້ຮັບຈາກກອງປະຊຸມຄັ້ງນີ້ ສາມາດນໍາໃຊ້ໄດ້ໂດຍກົງກັບວຽກງານຂອງຂະແໜງການທີ່ກ່ຽວຂ້ອງ ຊຶ່ງສະແດງອອກໃນການປະກອບຄຳຄິດເຫັນຢ່າງຕັ້ງໜ້າຂອງບັນດາຜູ້ເຂົ້າຮ່ວມທີ່ມີຄວາມຮູ້ ແລະ ເຂົ້າໃຈທາງດ້ານນະໂຍບາຍທີ່ຕິດພັນກັບວຽກງານອຳນວຍຄວາມສະດວກການຄ້າ ເປັນຢ່າງດີ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.