ທ່ານ ວຽງສະຫວັນ ສີພັນດອນ, ຫົວໜ້າກົມຂົນສົ່ງ ກ່າວໃນກອງປະຊຸມເຜີຍແຜ່ການສຶກສາກ່ຽວກັບການຂົນສົ່ງ ແລະ ໂລຈິສຕິກ ທີ່ມີຜົນກະທົບຈາກການເຂົ້າເອອີຊີຂອງ ສປປ ລາວ ວ່າ: ກ່ອນໜ້ານີ້ ອົງການໄຈກາ ໄດ້ສຶກສາ ແລະ ສ້າງແຜນແມ່ບົດລະບົບໂລຈິສຕິກຂອງລາວ ເຫັນວ່າຈາກການເຊື່ອມໂຍງພາກພື້ນຈະມີບໍລິມາດການຂົນສົ່ງເພີ່ມຂື້ນຢ່າງຫຼວງຫຼາຍ, ມີທັງສິນຄ້ານຳເຂົ້າ-ສົ່ງອອກ ແລະ ສິນຄ້າຜ່ານແດນ ເຊິ່ງຈະເປັນໂອກາດດີໃຫ້ແກ່ຜູ້ປະກອບການດ້ານການຂົນສົ່ງ ແລະ ໂລຈິສຕິກຂອງພວກເຮົາ. ການທີ່ຈະສ້າງໃຫ້ ສປປ ລາວ ກາຍເປັນປະເທດບໍລິການທາງຜ່ານໄດ້ຢ່າງມີປະສິດທິຜົນນັ້ນ, ພາກສ່ວນທຸລະກິດກໍ່ຕ້ອງມີຄວາມເຂັ້ມແຂງເພື່ອແຂ່ງຂັນ ແລະ ຍາດເອົາຜົນປະໂຫຍດຈາກການເຄື່ອນຍ້າຍສິນຄ້າ, ການບໍລິການ, ການລົງທຶນ, ການເງິນ ແລະ ແຮງງານແບບເສລີຈາກການທີ່ເຂົ້າຮ່ວມຕະຫຼາດ ແລະ ຖານຜະລິດດຽວກັນ.
ທ່ານ ຮັດມຸດ ຢັນນຸສ ຫົວໜ້າໂຄງການແຜນການເຊື່ອມໂຍງເສດຖະກິດອາຊຽນຂອງ ສປປ ລາວ ເພື່ອພັດທະນາທຸລະກິດ ແລະ ການຄ້າ ກ່າວວ່າ: ການຂົນສົ່ງມີຄວາມສຳຄັນຢ່າງຍິ່ງຕໍ່ການເຂົ້າເອອີຊີຂອງລາວ, ແຕ່ລະບົບການຂົນສົ່ງ ແລະ ໂລຈິສຕິກ ຂອງລາວ ຍັງບໍ່ມີຄວາມເຂັ້ມແຂງພໍໃນການຮອງຮັບລົດບັນທຸກສິນຄ້າຈາກປະເທດເພື່ອນບ້ານເຂົ້າມາລາວແລ້ວໄປປະເທດທີ່ສາມ ເປັນຕົ້ນແມ່ນບັນດາເສັ້ນທາງສາຍຫຼັກທີ່ເຊື່ອມຈອດກັບປະເທດເພື່ອນບ້ານ.
ດ້ານ ທ່ານ ພໍລ ແອັ້ບທ໋ອບ ທີ່ປຶກສາດ້ານການຂົນສົ່ງໃນພາກພື້ນແມ່ນ້ຳຂອງໄດ້ສະຫຼຸບໂດຍຫຍໍ້ຜົນຂອງການສຶກສາກ່ຽວກັບການຂົນສົ່ງ ແລະ ໂລຈິສຕິກ ທີ່ມີຜົນກະທົບຈາກການເຂົ້າເອອີຊີຂອງ ສປປ ລາວ ວ່າ: ການຂົນສົ່ງສິນຄ້າພາຍໃນປະເທດແມ່ນມີຫຼາຍ, ແຕ່ບໍລິສັດຂົນສົ່ງສິນຄ້າຜ່ານແດນສ່ວນຫຼາຍຍັງເປັນຂອງຕ່າງປະເທດທີ່ມາລົງທຶນ ຫຼື ເປີດສາຂາບໍລິການຂົນສົ່ງຈຳພວກແຮ່ທາດ, ສິນຄ້າສຳເລັດຮູບ, ໄມ້ ແລະ ອື່ນໆ. ສິ່ງດັ່ງກ່າວບໍ່ໄດ້ສ້າງຜົນປະໂຫຍດໃຫ້ແກ່ລັດຖະບານພໍເທົ່າໃດ ຊ້ຳບໍ່ໜຳຜູ້ປະກອບການລາວຍັງເສຍໂອກາດໃນການສົ່ງສິນຄ້າຜ່ານແດນລະຫວ່າງປະເທດອີກດ້ວຍ.
ສະນັ້ນ, ຜົນຂອງການສຶກສາຄົ້ນຄວ້າໄດ້ຊີ້ໃຫ້ເຫັນວ່າ: ບໍລິສັດຂົນສົ່ງທີ່ມີຢູ່ໃນລາວຍັງຂາດແຄນບຸກຄະລາກອນທີ່ເປັນມືອາຊີບເປັນຕົ້ນແມ່ນ: ຊ່າງສ້ອມແປງ, ນັກຂັບຂີ່, ການບໍລິການ ແລະ ອື່ນໆ. ຖ້າທຽບໃສ່ກຸ່ມການຂົນສົ່ງໃນປະເທດອາຊຽນຖືວ່າຢູ່ໃນເກນທີ່ຕໍ່າ. ສະນັ້ນ, ພວກເຮົາຈະເຮັດແນວໃດເພື່ອຍາດແຍ່ງເອົາຜົນປະໂຫຍດທີ່ໄດ້ຈາກການເຂົ້າເອອີຊີ ເຊີ່ງຕ້ອງມີການຝຶກອົບຮົມໃຫ້ພະນັກງານເຫຼົ່ານັ້ນ ລວມທັງບໍລິສັດຂົນສົ່ງໃຫ້ສາມາດຂົນສົ່ງສິນຄ້າໄປຕ່າງປະເທດໄດ້ ເປັນຕົ້ນແມ່ນ: ໄທ, ສສ ຫວຽດນາມ, ສປ ຈີນ ຫຼື ປະເທດອື່ນໆ, ແຕ່ຫາກບໍລິສັດຈ້າງພະນັກງານຂອງຕ່າງປະເທດກໍ່ຈະເສຍຄ່າແຮງງານສູງເຖິງ 3 ເທົ່າ ຂອງບຸກຄະລາກອນທີ່ເປັນຄົນລາວ ຫຼື ຖ້າຫາກເຮັດ ແນວນີ້ກໍ່ຈະເຮັດໃຫ້ພາກການຂົນສົ່ງຂອງຄົນລາວເປັນລັກສະນະທີ່ບໍ່ຍືນຍົງ.
ເຖິງຢ່າງໃດກໍຕາມ ທ່ານຫົວໜ້າກົມກ່າວຕື່ມອີກວ່າ ເພື່ອຮັບມືກັບບັນຫາດັ່ງກ່າວ, ກົມຂົນສົ່ງໄດ້ປັບປຸງ ແລະ ອອກກົດໝາຍຫຼາຍສະບັບເພື່ອໃຫ້ສອດຄ່ອງກັບກອບອາຊຽນ ເປັນຕົ້ນແມ່ນ: ສຳເລັດອອກກົດໝາຍຂົນສົ່ງທາງບົກ ແລະ ກົດໝາຍຈະລາຈອນທາງບົກ. ໄລຍະຜ່ານມາໄດ້ຖອດຖອນບົດຮຽນຫຼາຍສົມຄວນ, ແຕ່ຍັງແບກຫາບງົບປະມານຈຳນວນມະຫາສານເພື່ອບູລະນະບັນດາໂຄງລ່າງຄົມມະນາຄົມ-ຂົນສົ່ງ ເຊີ່ງຖ້າທຽບໃສ່ກັບຜົນປະໂຫຍດທີ່ໄດ້ຮັບແມ່ນບໍ່ກຸ້ມຄ່າ.
ແຫຼ່ງທີ່ມາ: ໜັງສືພິມເສດຖະກິດການຄ້າ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.