ຈຸດປະສົງຂອງກອງປະຊຸມສຳມະນາໃນຄັ້ງນີ້ ແມ່ນແນໃສ່ທົບທວນຄືນການຈັດຕັ້ງປະຕິບັດໃນປີ 2013 - 2014 ແລະ ແຜນການໃນຕໍ່ໜ້າ ໃນການພັດທະນາກົນໄກການປະສານງານ ໃນການສະໜອງຂໍ້ມູນຂ່າວສານ ໃຫ້ແກ່ສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ. ນອກຈາກນີ້, ກໍ່ໄດ້ນຳສະເໜີ ເຄື່ອງມືໃໝ່ທີ່ພັດທະນາຂຶ້ນ ໃນ LTP ( LTP Forum) ເຊິ່ງຈະຊ່ວຍຊຸກຍູ້ ເຮັດໃຫ້ວຽກງານປະສານງານ ແລະ ສະໜອງຂໍ້ມູນ ມີຄວາມວ່ອງໄວຂຶ້ນກ່ວາເກົ່າ.
ກອງປະຊຸມໄດ້ດຳເນີນໄປຕາມວາລະ ໂດຍມີການນຳສະເໜີບັນດາເນື້ອໃນທີ່ສຳຄັນ ຄື: 1. ລາຍງານສະພາບ ການຈັດຕັ້ງປະຕິບັດວຽກງານ ປະສານງານ ແລະ ສະໜອງຂໍ້ມູນຂ່າວສານ ໃນໄລຍະຜ່ານມາ; 2. ຄວາມໝາຍຄວາມສຳຄັນ ຂອງການສ້າງກົນໄກການປະສານງານ ສະໜອງຂໍ້ມູນ ໃຫ້ແກ່ LTP, ພ້ອມທັງສະເໜີແນວທາງປັບປຸງບັນດາລາຍຊື່ຜູ້ປະສານງານ ທີ່ມີຢູ່ໃນປະຈຸບັນ; 3. ນຳສະເໜີກ່ຽວກັບ ATR ແລະ NTR ບັນດາໜ້າວຽກ ທີ່ LTP ຕ້ອງໄດ້ເຮັດທີ່ຕິດພັນກັບວຽກງານ ATR; 4. ນຳສະເໜີ ແລະ ເຮັດແບບຝຶກຫັດວິທີນຳໃຊ້ ອີເມລ໌ຈຸດປະສານງານ; 5. ນຳສະເໜີ ແລະ ເຮັດແບບຝຶກຫັດວິທີນຳໃຊ້ ກະດານສົນທະນາ (LTP Forum).
ກອງປະຊຸມໃນຄັ້ງນີ້ ໄດ້ດຳເນີນໄປດ້ວຍບັນຍາກາດຂອງການແລກປ່ຽນຄວາມຄິດເຫັນຢ່າງເປັນກັນເອງ, ບັນດານັກສຳມະນາກອນໄດ້ໃຫ້ຄວາມເອົາໃຈໃສ່ ແລະ ມີຄວາມຕັ້ງໜ້າໃນການຮຽນຮູ້ຕາມຫົວຂໍ້ທີ່ໄດ້ນຳສະເໜີດັ່ງກ່າວຂ້າງເທິງຢ່າງເລິກເຊິ່ງເພື່ອໃຫ້ສາມາດນຳໃຊ້ເຂົ້າໃນການປະຕິບັດວຽກງານ ໂດຍສ່ວນໃຫຍ່ ນັກສຳມະນາກອນ ແມ່ນຕີລາຄາສູງຕໍ່ກັບການສ້າງກົນໄກການສະໜອງຂໍ້ມູນຂ່າວສານ ໃຫ້ແກ່ສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ. ເພື່ອເຮັດໃຫ້ LTP ມີເນື້ອໃນອຸດົມສົມບູນ, ຄົບຖ້ວນ, ທັນກັບສະພາບ ແລະ ມີຄວາມຍືນຍົງ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.