ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອກວດຄືນຜົນການປະເມີນບັນດາມາດຕະການອຳນວຍຄວາມສະດວກທາງດ້ານການຄ້າ ຂອງບັນດາຂະແໜງການກ່ຽວຂ້ອງຢູ່ຂັ້ນສູນກາງ ໃນປີ 2013 ເພື່ອໃຫ້ມີຄວາມສອດຄ່ອງ ແລະ ເປັນເອກະພາບກັບບັນດາແຂວງຜູ້ຈັດຕັ້ງປະຕິບັດຕົວຈິງ ໃນຂອບເຂດທົ່ວປະເທດ ກ່ອນທີ່ຈະມີການສະຫຼຸບຜົນສຸດທ້າຍ ຢູ່ນະຄອນຫຼວງວຽງຈັນ ແລະ ສະເໜີຕໍ່ລັດຖະບານ ເພື່ອຮັບຮອງເອົາຢ່າງເປັນທາງການ. ກອງປະຊຸມດັ່ງກ່າວ ແມ່ນສ່ວນໜຶ່ງຂອງການປະເມີນຄວາມຕ້ອງການ ແລະ ບູລິມະສິດ ກ່ຽວກັບ ວຽກງານອໍານວຍຄວາມສະດວກທາງດ້ານການຄ້າ ຂອງ ສປປ ລາວ ຢູ່ຂັ້ນທ້ອງຖິ່ນ ເຊິ່ງໄດ້ສືບຕໍ່ມາຈາກກອງປະຊຸມສຳລັບຂະແໜງການກ່ຽວຂ້ອງຈາກບັນດາແຂວງທາງພາກກາງ ແລະ ພາກໃຕ້ ທີ່ໄດ້ຈັດຢູ່ແຂວງສະຫວັນນະເຂດໃນວັນທີ 27-29 ເມສາ 2015.
ຜົນຂອງກອງປະຊຸມ ໄດ້ຊີ້ໃຫ້ເຫັນຄວາມສຳຄັນຂອງກົນໄກການປະສານງານ ແລະ ຄວາມຮັບຮູ້ຂອງພະນັກງານປະຈຳດ່ານ ເພື່ອຈັດຕັ້ງປະຕິບັດວຽກງານອຳນວຍຄວາມສະດວກທາງດ້ານການຄ້າ ໃຫ້ມີປະສິດທິຜົນ. ປັດຈຸບັນ, ການປະສານງານລະຫວ່າງບັນດາຂະແໜງການກ່ຽວຂ້ອງປະຈຳຢູ່ດ່ານສາກົນຍັງບໍ່ເປັນລະບົບທີ່ຈະແຈ້ງ; ແລະ ພະນັກງານສ່ວນໃຫຍ່ແມ່ນ ຍັງຂາດຄວາມຮູ້ກ່ຽວກັບວຽກງານອຳນວຍຄວາມສະດວກທາງດ້ານການຄ້າ ເປັນຕົ້ນແມ່ນ ລະບົບການບໍລິຫານຄວາມສ່ຽງ ແລະ ລະບົບການແຈ້ງເອກະສານນຳເຂົ້າ-ສົ່ງອອກທາງອີເລັກໂທຣນິກ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.