ບົດຄັດຫຍໍ້
ວຽກງານອຳນວຍຄວາມສະດວກທາງດ້ານການຄ້າ ຂອງ ສປປ ລາວ ໄດ້ຮັບການຈັດຕັ້ງປະຕິບັດມາຕັ້ງແຕ່ປີ 2011 ພາຍໃຕ້ແຜນຍຸດທະສາດອຳນວຍຄວາມສະດວກທາງດ້ານການຄ້າ ໃນໄລຍະປີ 2011-2015 ເຊິ່ງເປັນບາດ ກ້າວອັນສຳຄັນໃນການເຮັດໃຫ້ຂັ້ນຕອນການຄ້າຕ່າງປະເທດ ແລະ ພາສີ ມີຄວາມກະທັດຮັດ, ໂປ່ງໃສ, ສະດວກວ່ອງໄວ ແລະ ກົມກຽວກັນ, ແນໃສ່ຫຼຸດຜ່ອນຕົ້ນທຶນທາງດ້ານການຄ້າ, ປະກອບສ່ວນແກ່ການເພີ່ມຄວາມສາມາດແຂ່ງຂັນທາງດ້ານການຄ້າຂອງພາກທຸລະກິດລາວ ໃນຕະຫຼາດຕ່າງປະເທດ, ດຶງດູດການລົງທຶນຂອງຕ່າງປະເທດໃຫ້ໄດ້ຫຼາຍຂຶ້ນ ແລະ ສາມາດຄຸ້ມຄອງຂັ້ນຕອນການນຳເຂົ້າ ແລະ ສົ່ງອອກ ໄດ້ຢ່າງມີປະສິດທິພາບ. ຈຸດປະສົງຂອງບົດລາຍງານສະບັບນີ້ ແມ່ນເພື່ອສະຫຼຸບຜົນການຈັດຕັ້ງປະຕິບັດວຽກງານອຳນວຍຄວາມສະດວກທາງດ້ານການຄ້າ ໄລ ຍະເວລາ 02 ປີ ແຕ່ເດືອນຕຸລາ 2013 ຫາ ເດືອນກໍລະກົດ 2015. ບົດສະຫຼຸບດັ່ງກ່າວ ຈະເປັນຂໍ້ມູນພື້ນຖານແກ່ການຕິດຕາມກວດກາ ແລະ ປະເມີນຄວາມຄືບໜ້າຂອງການອຳນວຍຄວາມສະດວກທາງດ້ານການຄ້າໃນແຕ່ລະຂະແໜງການ, ແນໃສ່ສ້າງຄວາມກົມກຽວແກ່ການສ້າງແຜນງານ, ປະກອບສ່ວນແກ່ການຫຼຸດຜ່ອນຕົ້ນທຶນທາງດ້ານການຄ້າ ແລະ ການເພີ່ມຄວາມສາມາດແຂ່ງຂັນຂອງພາກທຸລະກິດໃຫ້ນັບມື້ນັບສູງຂຶ້ນ.
ການປະເມີນຄວາມຄືບໜ້າ ໃນການຈັດຕັ້ງປະຕິບັດແຜນຍຸດທະສາດອຳນວຍຄວາມສະດວກທາງດ້ານການຄ້າ ແມ່ນອີງໃສ່ການປຽບທຽບ ລະຫວ່າງ ຜົນການຈັດຕັ້ງປະຕິບັດກິດຈະກໍາຕົວຈິງ ແລະ ບັນດາກິດຈະກຳ ຂອງ 06 ຍຸດທະສາດອຳນວຍຄວາມສະດວກທາງດ້ານການຄ້າ ທີ່ລະບຸໄວ້ໃນແຜນຍຸດທະສາດອຳນວຍຄວາມສະດວກທາງດ້ານການຄ້າ ຂອງ ສປປ ລາວ ໃນໄລຍະປີ 2011-2015. ຜົນກະທົບຂອງການຈັດຕັ້ງປະຕິບັດແຜນຍຸດທະສາດດັ່ງ ກ່າວ ສາມາດວັດແທກໄດ້ຈາກ ຕົວຊີ້ວັດຄວາມງ່າຍໃນການດຳເນີນທຸລະກິດ ແລະ ການຫຼຸດຜ່ອນຕົ້ນທຶນທາງດ້ານການຄ້າ ທີ່ຮວບຮວມໂດຍທະນາຄານໂລກ.
ຜົນການປະເມີນຄວາມຄືບໜ້າ ສະແດງໃຫ້ເຫັນວ່າ: ກຂອຄ ແລະ ຂະແໜງການກ່ຽວຂ້ອງກັບວຽກງານອຳນວຍຄວາມສະດວກທາງດ້ານການຄ້າ ສາມາດຈັດຕັ້ງປະຕິບັດແຜນຍຸດທະສາດອຳນວຍຄວາມສະດວກທາງດ້ານການຄ້າ ໄດ້ປະມານ 93% ໃນໄລຍະປີ 2011-2015. ຜົນຂອງການປະເມີນ ແມ່ນອີງຕາມ 06 ຍຸດທະສາດຍ່ອຍ ເຊິ່ງປະກອບດ້ວຍ 28 ກິດຈະກຳ; ໃນນັ້ນ, ມີ 26 ກິດຈະກໍາທີ່ໄດ້ຮັບການຈັດຕັ້ງປະຕິບັດ. ຍຸດທະສາດທີ່ສາມາດຈັດຕັ້ງປະຕິບັດໄດ້ຕາມແຜນ ປະກອບດ້ວຍ 04 ຍຸດທະສາດ ຄື: (1) ຍຸດທະສາດທີ 1 ກ່ຽວກັບ ການຍົກສູງວຽກງານການອຳນວຍຄວາມສະດວກທາງດ້ານການຄ້າ ໃນບັນດາກະຊວງ ແລະ ຂະແໜງການທີ່ກ່ຽວຂ້ອງ; (2) ຍຸດທະສາດທີ 2 ກ່ຽວກັບ ການເຮັດໃຫ້ຂັ້ນຕອນດ້ານການຄ້າ ແລະ ພາສີ ມີຄວາມກະທັດຮັດ, ໂປ່ງໃສ, ສະດວກວ່ອງໄວ ແລະ ກົມກຽວກັນ; (3) ຍຸດທະສາດທີ 4 ກ່ຽວກັບ ການປັບປຸງ ແລະ ສ້າງຂີດຄວາມສາມາດຂອງພາກທຸລະກິດ ໃຫ້ສາມາດດຳເນີນການຄ້າໄດ້ຢ່າງມີປະສິດທິຜົນ ໂດຍສອດຄ່ອງກັບລະບຽບຫຼັກການ; ແລະ (4) ຍຸດທະສາດທີ 6 ກ່ຽວກັບ ການສ້າງຕັ້ງ ກຂອຄ. ຍຸດທະສາດທີ່ສາມາດຈັດຕັ້ງປະຕິບັດໄດ້ພຽງບາງສ່ວນ ປະກອບດ້ວຍ 02 ຍຸດທະສາດ ຄື: (1) ຍຸດທະສາດທີ 3 ກ່ຽວກັບ ການຈັດຕັ້ງປະຕິບັດບັນດາພັນທະໃນຂອບສອງຝ່າຍ, ອະນຸພາກພື້ນ, ພາກພື້ນ ແລະ ສາກົນ; ແລະ (2) ຍຸດທະສາດທີ 5 ກ່ຽວກັບ ການສະໜອງອຸປະກອນ ແລະ ສິ່ງອຳນວຍຄວາມສະດວກ ເພື່ອເຮັດໃຫ້ຂັ້ນຕອນການຄ້າ ແລະ ພາສີ ມີຄວາມຄ່ອງຕົວ.
ຜົນສຳເລັດ ຂອງການຈັດຕັ້ງປະຕິບັດແຜນຍຸດທະສາດອຳນວຍຄວາມສະດວກທາງດ້ານການຄ້າ ປະກອບ ສ່ວນແກ່ ການພັດທະນາວຽກງານອຳນວຍຄວາມສະດວກທາງດ້ານການຄ້າ 04 ດ້ານ ຄື: (1) ການປະຕິຮູບທາງດ້ານລະບຽບການ ເຊິ່ງສະແດງອອກໃນການສ້າງ ແລະ ປັບປຸງນິຕິກຳ ຈຳນວນ 35 ສະບັບ ແລະ ການສະຫຼຸບຜົນການປະເມີນຄວາມຕ້ອງການ ແລະ ບູລິມະສິດຂອງວຽກງານອຳນວຍຄວາມສະດວກທາງດ້ານການຄ້າຂອງ ສປປ ລາວ; (2) ການປັບປຸງໂຄງລ່າງພື້ນຖານໃນການອຳນວຍຄວາມສະດວກທາງດ້ານການຄ້າ ເຊິ່ງສະແດງອອກໃນການພັດທະ ນາສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ ໃຫ້ມີຄວາມຫຼາກຫຼາຍທາງດ້ານເນື້ອໃນ ແລະ ການຕິດຕັ້ງລະບົບອາຊິກຸດາໃນທຸກດ່ານສາກົນ; (3) ການພັດທະນາບຸກຄະລາກອນ ເຊິ່ງສະແດງອອກໃນການຈັດຝຶກອົບຮົມແກ່ພະນັກງານໃນພາກລັດ ແລະ ພາກທຸລະກິດ ທາງດ້ານວິທີການນໍາໃຊ້ສູນຂໍ້ມູນຂ່າວສານທາງດ້ານການຄ້າ ຂອງ ສປປ ລາວ, ການເພີ່ມຂີດຄວາມສາມາດທາງດ້ານທັກສະການເປັນຄູຝຶກ ແລະ ທັກສະດ້ານການເປັນນັກວິທະຍາ ກອນ ໃນການນຳສະເໜີບົດ, ການເພີ່ມຂີດຄວາມສາມາດ ໃນການປະເມີນຜົນກະທົບຂອງມາດຕະການທີ່ບໍ່ແມ່ນພາສີ, ແລະ ການນຳໃຊ້ລະບົບແຈ້ງພາສີແບບອີເລັກໂທຣນິກ; ແລະ (4) ການແກ້ໄຂບັນຫາຂອງພາກທຸລະກິດ ເຊິ່ງສະແດງອອກໃນການຕິດຕາມ ແລະ ແກ້ໄຂບັນຫາການສຳປະທານບໍລິການປະກອບເອກະສານການສົ່ງອອກສິນຄ້າກະສິກໍາ ຢູ່ ແຂວງອຸດົມໄຊ, ການຜ່ານແດນຂອງສິນຄ້າກະສິກຳ ປະເພດໝາກກ້ວຍ ຈາກ ສປປ ລາວ ໄປ ສປ ຈີນ ໂດຍຜ່ານແດນຫວຽດນາມ, ແລະ ການຂໍອະນຸຍາດນໍາເຂົ້າຢາ, ອາຫານ ແລະ ສານເສບຕິດ.
ໝາກຜົນຂອງການພັດທະນາວຽກງານອຳນວຍຄວາມສະດວກທາງດ້ານການຄ້າ ໄດ້ປະກອບສ່ວນແກ່ການປັບປຸງບັນດາລະບຽບການດຳເນີນທຸລະກິດທີ່ເອື້ອອໍານວຍແກ່ການຂະຫຍາຍຕົວຂອງພາກທຸລະກິດ. ອີງຕາມດັດສະນີຄວາມງ່າຍດາຍໃນການດຳເນີນທຸລະກິດຂອງທະນາຄານໂລກ, ສປປ ລາວ ໄດ້ຖືກຈັດຢູ່ລຳດັບທີ 148 ໃນປີ 2015 ຈາກ ລໍາດັບທີ 155 ໃນ 189 ປະເທດ ໃນປີ 2013. ໝາຍຄວາມວ່າ: ສະຖານະພາບຂອງ ສປປ ລາວ ກ່ຽວກັບ ການອຳນວຍຄວາມສະດວກແກ່ການດຳເນີນທຸລະກິດ ໄດ້ຮັບການປັບປຸງ 7 ລໍາດັບ ໃນໄລຍະປີ 2013-2015. ນອກນັ້ນ, ຕົ້ນທຶນການສົ່ງອອກຕໍ່ຕູ້ຂົນສົ່ງ ໄດ້ຫຼຸດລົງປະມານ 9% ເຊິ່ງໄດ້ຫຼຸດລົງຈາກ US$2.140 ໃນປີ 2013 ມາເປັນ US$1.950 ໃນປີ 2015, ໃນຂະນະທີ່ ຕົ້ນທຶນການນຳເຂົ້າຕໍ່ຕູ້ຂົນສົ່ງ ໄດ້ຫຼຸດລົງປະມານ 10% ເຊິ່ງໄດ້ຫຼຸດລົງຈາກ US$2.125 ມາເປັນ US$1.910 ໃນໄລຍະເວລາດຽວກັນ.
ເອກະສານຊ້ອນທ້າຍ:
ດາວໂຫຼດ: ເອກະສານຊ້ອນທ້າຍ 1: ຄວາມຄືບໜ້າຂອງການຈັດຕັ້ງປະຕິບັດຍຸດທະສາດອຳນວຍຄວາມສະດວກທາງດ້ານການຄ້າ ສົກປີ 2011-2015
ດາວໂຫຼດ: ເອກະສານຊ້ອນທ້າຍ 2: ບັນດານິຕິກໍາ ແລະ ເອກະສານກ່ຽວຂ້ອງ ທີ່ກໍາລັງໄດ້ຮັບການປັບປຸງ ຕຸລາ 2013 ຫາ ກໍລະກົດ 2015
ດາວໂຫຼດ: ເອກະສານຊ້ອນທ້າຍ 3: ການແກ້ໄຂບັນຫາຂອງພາກທຸລະກິດ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.