ກອງເລຂາອໍານວຍຄວາມສະດວກທາງດ້ານການຄ້າ[1]
ກົມການນໍາເຂົ້າ ແລະ ສົ່ງອອກ
ກະຊວງອຸດສາຫະກໍາ ແລະ ການຄ້າ
ບົດຄັດຫຍໍ້
ການຈັດຕັ້ງປະຕິບັດສັນຍາອຳນວຍຄວາມສະດວກທາງດ້ານການຄ້າຂອງ ອົງການການຄ້າໂລກ (WTO) ເປັນຍຸດທະສາດອັນດີໃນການຫຼຸດຜ່ອນຕົ້ນທຶນທາງດ້ານການຄ້າໃຫ້ແກ່ປະເທດສະມາຊິກ. ແຕ່ວ່າຄວາມອາດສາມາດໃນການຈັດຕັ້ງປະຕິບັດສັນຍາຂອງແຕ່ລະປະເທດສະມາຊິກ ມີຄວາມແຕກຕ່າງກັນ ຕາມລະດັບການພັດທະນາເສດຖະກິດຂອງແຕ່ລະປະເທດ. ຈຸດປະສົງຂອງບົດລາຍງານສະບັບນີ້ ແມ່ນເພື່ອ: (1) ສະຫຼຸບຜົນການປະເມີນຄວາມຕ້ອງການ ແລະ ບູລິມະສິດຂອງວຽກງານອຳນວຍຄວາມສະດວກທາງດ້ານການຄ້າຂອງ ສປປ ລາວ ຢູ່ຂັ້ນສູນກາງ ແລະ ຂັ້ນທ້ອງຖິ່ນ; (2) ວິ ເຄາະຄວາມພ້ອມ ແລະ ຂໍ້ຄົງຄ້າງ ຂອງ ສປປ ລາວ ໃນການຈັດຕັ້ງປະຕິບັດບັນດາມາດຕາ ຂອງສັນຍາອໍານວຍຄວາມສະດວກທາງດ້ານການຄ້າ ໂດຍອີງໃສ່ 03 ຕົວຊີ້ວັດ ຄື: (1) ນິຕິກຳຂອງຂະແໜງການຮັບຜິດຊອບ, (2) ໂຄງລ່າງພື້ນຖານ, ແລະ (3) ບຸກຄະລາກອນ ທີ່ຕິດພັນກັບວຽກງານອຳນວຍຄວາມສະດວກທາງດ້ານການຄ້າ.
ຜົນການປະເມີນຊີ້ໃຫ້ເຫັນວ່າ: ໝວດ A ຂອງສັນຍາ ປະກອບດ້ວຍ 13 ມາດຕະການ; ໝວດ B ຂອງສັນຍາ ປະກອບດ້ວຍ 7 ມາດຕະການ; ໝວດ C ຂອງສັນຍາ ປະກອບດ້ວຍ 16 ມາດຕະການ. ນອກນັ້ນ, ຜົນການວິເຄາະ ສະແດງໃຫ້ເຫັນ ຕົວກຳນົດຄວາມອາດສາມາດຂອງ ສປປ ລາວ ໃນການຈັດຕັ້ງປະຕິບັດໝວດ A ເຊິ່ງປະກອບດ້ວຍ 03 ຕົວຊີ້ວັດຄື: (1) ນິຕິກຳທີ່ເປັນພື້ນຖານແກ່ການຈັດຕັ້ງປະຕິບັດສັນຍາ ປະກອບດ້ວຍ ກົດໝາຍ 03 ສະບັບ ຄື: ກົດໝາຍ ວ່າດ້ວຍພາສີ, ກົດໝາຍ ວ່າດ້ວຍອາຫານ, ແລະ ກົດໝາຍ ວ່າດ້ວຍ ການປ້ອງກັນພືດ; (2) ໂຄງລ່າງພື້ນຖານໃນການຈັດຕັ້ງປະຕິບັດສັນຍາ ປະກອບດ້ວຍ ສູນຂໍ້ມູນຂ່າວສານທາງດ້ານການຄ້າຂອງ ສປປ ລາວ ແລະ ລະບົບອາຊິກຸດາ; (3) ບຸກຄະລາກອນໃນການຈັດຕັ້ງປະຕິບັດສັນຍາ ປະກອບດ້ວຍ ສະມາຊິກກອງເລຂາອຳນວຍຄວາມສະດວກທາງດ້ານການຄ້າ (ກຂອຄ). ເຖິງຢ່າງໃດກໍ່ຕາມ, ຄວາມອາດສາມາດຂອງ ສປປ ລາວ ໃນການຈັດຕັ້ງປະຕິບັດສັນຍາ ແມ່ນຍັງຕໍ່າກວ່າບັນດາປະເທດທາງຜ່ານ (ໄທ ແລະ ຫວຽດນາມ) ແລະ ປະເທດດ້ອຍພັດທະນາ ເປັນຕົ້ນແມ່ນການນຳໃຊ້ລະບົບອີເລັກໂທຣນິກ ແລະ ບຸກຄະລາກອນທີ່ມີຄວາມຮູ້ໃນລະດັບສູງໃນການບໍລິຫານຄວາມສ່ຽງ.
ສຳລັບໄລຍະເວລາໃນການກະກຽມຈັດຕັ້ງປະຕິບັດສັນຍາ, ສປປ ລາວ ອາດພິຈາລະນາ 03 ທາງເລືອກ ສຳລັບ ການແຈ້ງ ໝວດ A ແລະ ໃຫ້ສັດຕະຍາບັນສັນຍາ ຄື: (1) ເດືອນກັນຍາ ປີ 2015, (2) ເດືອນຕຸລາ ປີ 2015, ແລະ (3) ທ້າຍປີ 2016. ຜົນການວິເຄາະຄວາມພ້ອມຂອງ ສປປ ລາວ ຊີ້ໃຫ້ເຫັນວ່າ: (1) ສປປ ລາວ ມີຄວາມພ້ອມທີ່ຈະແຈ້ງ ໝວດ A ໃນເດືອນກັນຍາ ປີ 2015 ແລະ ໃຫ້ສັດຕະຍາບັນສັນຍາ ໃນທ້າຍປີ 2015; (2) ສປປ ລາວ ມີຄວາມພ້ອມທີ່ຈະແຈ້ງ ໝວດ A ໃນເດືອນຕຸລາ ປີ 2015 ແລະ ໃຫ້ສັດຕະຍາບັນສັນຍາ ໃນທ້າຍປີ 2015; ຫຼື (3) ສປປ ລາວ ຄວນແຈ້ງໝວດ A ໃນທ້າຍປີ 2015 ແລະ ໃຫ້ສັດຕະຍາບັນສັນຍາ ໃນທ້າຍປີ 2016 ເພື່ອສັງເກດຄວາມຄືບໜ້າການໃຫ້ສັດຕະຍາບັນຂອງບັນດາປະເທດດ້ອຍພັດທະນາອື່ນ. ເຖິງຢ່າງໃດກໍ່ຕາມ, ຄວາມແຕກຕ່າງຂອງໄລຍະເວລາ 1 ປີ ສໍາລັບການໃຫ້ສັດຕະຍາບັນ ໃນທ້າຍປີ 2015 ແລະ ໃນທ້າຍປີ 2016 ຈະບໍ່ມີຜົນກະທົບຕໍ່ການປັບປຸງຄວາມອາດສາມາດຂອງ ສປປ ລາວ ໃນການຈັດຕັ້ງປະຕິບັດສັນຍາ ຍ້ອນວ່າ ບັນດາຕົວກຳນົດຄວາມພ້ອມໃນການຈັດຕັ້ງປະຕິບັດສັນຍາ ເຊັ່ນ: ນິຕິກຳ, ໂຄງລ່າງພື້ນຖານ ແລະ ບຸກຄະລາກອນ ຈະບໍ່ມີການປ່ຽນແປງ ຫຼື ປ່ຽນແປງໜ້ອຍ ໃນຊ່ວງເວລາດັ່ງກ່າວ.
[1] ຜູ້ຂຽນ: ສີທະນົນໄຊ ສຸວັນນະພັກດີ. ອີເມວ: [email protected].
ດາວໂຫຼດ: ບົດລາຍງານຄວາມພ້ອມຂອງ ສປປ ລາວ ໃນການຈັດຕັ້ງປະຕິບັດ ສັນຍາອຳນວຍຄວາມສະດວກທາງດ້ານການຄ້າ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.