ທ່ານລັດຖະມົນຕີກະຊວງການເງິນ ໄດ້ແຈ້ງໃຫ້ສື່ມວນຊົນຊາບ ໃນຂະນະທີ່ເຂົ້າຮ່ວມກອງປະຊຸມຮອບສອງປີລະຫວ່າງຫ້ອງວ່າການລັດຖະບານ, ເຈົ້າຄອງນະຄອນຫຼວງ ແລະ ເຈົ້າແຂວງວ່າ: ໃນລະບົບດັ່ງກ່າວນີ້, ກະຊວງການເງິນໄດ້ເຮັດວຽກຮ່ວມກັບທະນາຄານທ້ອງຖິ່ນ ໃນການແນະນໍາການຈ່າຍເງິນໂດຍການນໍາໃຊ້ບັດທີ່ອອກໃຫ້ແກ່ຜູ້ນໍາເຂົ້າ ແລະ ຜູ້ສົ່ງອອກເຊິ່ງຈະຊ່ວຍໃຫ້ປະຫຍັດເວລາການການຈ່າຍຄ່າພາສີ-ອາກອນ. ຜູ້ນໍາເຂົ້າ ແລະ ຜູ້ສົ່ງອອກ ຈະໃຊ້ເວລາພຽງແຕ່ 15-30 ນາທີໃນການດໍາເນີນການຈ່າຍຄ່າພາສີ ເຊິ່ງໃຊ້ເວລາສັ້ນກວ່າການຈ່າຍພາສີແບບໃຊ້ເອກະສານໃນເມື່ອກ່ອນເຊິ່ງຈະໃຊ້ເວລາປະມານເຄິ່ງມື້ ຫຼື ມື້ໜຶ່ງຈຶ່ງຈະສໍາເລັດ.
ການນໍາໃຊ້ລະບົບໃໝ່ນີ້, ຜູ້ນໍາເຂົ້າ ແລະ ສົ່ງອອກຈະຕ້ອງໄດ້ແຈ້ງພາສີໃນການນໍາເຂົ້າ ແລະ ສົ່ງອອກສິນຄ້າ, ພ້ອມທັງຈ່າຍຄ່າພາສີ ດ້ວຍຕົນເອງຕາມລໍາດັບ. ເຊິ່ງແຕກຕ່າງຈາກເມື່ອກ່ອນ ທີ່ການນໍາໃຊ້ລະບົບເອກະສານມີຊ່ອງຫວ່າງໃນການເຈລະຈາ ເຊິ່ງອາດເຮັດໃຫ້ຜູ້ປະກອບການເສຍລາຍຮັບ. ໃນໄລຍະຜ່ານມາກໍໄດ້ມີການຈັດການຝຶກອົບຮົມການນໍາໃຊ້ລະບົບດັ່ງກ່າວໃຫ້ແກ່ເຈົ້າໜ້າທີ່ພາສີ ກໍຄືຜູ້ນໍາເຂົ້າ ແລະ ສົ່ງອອກ ເພື່ອໃຫ້ມີຄວາມຊໍານານໃນການນໍາໃຊ້ລະບົບ.
ນອກຈາກນີ້, ກະຊວງການເງິນກໍຍັງໄດ້ເຮັດວຽກຮ່ວມກັບບັນດາທະນາຄານທ້ອງຖິ່ນເພື່ອແນະນໍາ ລະບົບພາສີທັນສະໄໝ ເພື່ອຊ່ວຍໃຫ້ຜູ້ປະກອບການຈ່າຍພາສີຜ່ານທະນາຄານ. ເຈົ້າໜ້າທີ່ພາສີຈະອອກໃບແຈ້ງພາສີໃຫ້ແກ່ຜູ້ປະກອບການ ແລະ ຫຼັງຈາກນັ້ນ ຜູ້ປະກອບການກໍຈະຈ່າຍຄ່າພາສີຜ່ານທະນາຄານ ຫຼື ຜ່ານໂທລະສັບມືຖື. ໃນອະນາຄົດອັນໃກ້ນີ້, ກໍຍັງມີແຜນພັດທະນາໂປແກຼມຊ່ວຍໜູນໃຫ້ ນັກທຸລະກິດ ສາມາດຈ່າຍພາສີຜ່ານຕູ້ເອທີເອັມ. ປະຈຸບັນ, ກໍໄດ້ມີການຕິດຕັ້ງເຄື່ອງສະແກນ ຢູ່ດ່ານຊາຍແດນເພື່ອກວດເບິ່ງວ່າສິນຄ້າຕົວຈິງກົງກັບການແຈ້ງພາສີຫຼືບໍ່ ເຊິ່ງລະບົບດັ່ງກ່າວຈະຊ່ວຍປະຫຍັດເວລາ ແລະ ຮັບປະກັນຄວາມຖືກຕ້ອງຂອງການຈ່າຍພັນທະພາສີ.
ອີງຕາມ ຂໍ້ມູນທີ່ໄດ້ຈາກ 11 ເດືອນ 15 ວັນ ຂອງສົກງົບປະມານ ວັນທີ 30 ກັນຍາ 2015 ແມ່ນໄດ້ເກັບລາຍຮັບ 23.819 ພັນຕື້ກີບ ກວມເອົາ 91,16% ຂອງແຜນປະຈໍາປີ. ສໍາລັບລາຍຮັບໝົດປີແມ່ນຄາດວ່າຈະບໍ່ຫຼຸດ 95 % ຕາມແຜນ, ເຊິ່ງເພິ່ມຂຶ້ນ 1.4 ພັນຕື້, ທຽບເທົ່າ 7.3% ຈາກສົກປີຜ່ານມາ.
ເນື່ອງຈາກວ່າລະບົບດັ່ງກ່າວນີ້ ຫາກໍໄດ້ຮັບການແນະນໍາ, ຈື່ງມີຄວາມຈໍາເປັນທີ່ຈະຕ້ອງມີການສືບຕໍ່ເຜີຍແຜ່ໃຫ້ແກ່ນັກທຸລະກິດຮູ້ ເພື່ອເປັນການສົ່ງເສີມການຈ່າຍພາສີຜ່ານລະບົບໃໝ່.
ແຫຼ່ງທີ່ມາ: ໜັງສືພິມ ວຽງຈັນທາມສ໌
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.