ບົດລາຍງານການດໍາເນີນທຸລະກິດ ປະຈໍາປີນີ້ ສໍາເລັດຄວາມພະຍາຍາມສອງປີໃນການຂະຫຍາຍດັດສະນີທີ່ໃຊ້ ວັດແທກຄຸນນະພາບຂອງລະບຽບການ ກໍຄື ປະສິດທິພາບຂອງຂອບວຽກດ້ານນິຕິກໍາທີ່ພົວພັນກັບການດໍາເນີນທຸລະກິດ ເພື່ອເປັນການຕິດຕາມສະພາບຂໍ້ມູນຕົວຈິງໃຫ້ດີຂື້ນ. ຫ້າຕົວຊີ້ວັດນີ້ໄດ້ສະແດງໃຫ້ເຫັນການປ່ຽນແປງໂດຍປຽບທຽບຈາກປີຜ່ານມາຄື: 1) ການຂໍອະນຸຍາດກໍ່ສ້າງ, 2) ການຂໍໄຟຟ້າ, 3) ການເຮັດໃຫ້ສັນຍາມີຜົນສັກສິດ, 4) ການຈົດທະບຽນຊັບສິນ, 5) ການຄ້າຂ້າມແດນ.
ເຖິງແມ່ນວ່າ ສປປ ລາວ ມີຄວາມກ້າວໜ້າໃນການປະຕິຮູບແວດລ້ອມໃນການດໍາເນີນທຸລະກິດ ໃນໄລຍະຜ່ານມາ, ການສືບຕໍ່ປັບປຸງໃນຂະແໜງການອື່ນໆຈະຍັງມີບົດບາດສໍາຄັນສໍາລັບ ສປປ ລາວ ໃນການບັນລຸເປົ້າໝາຍການຫຼຸດພົ້ນຈາກສະຖານະເປັນປະເທດດ້ອຍພັດທະນາໃນປີ 2020. ເຖິງຢ່າງໃດກໍຕາມ, ສປປ ລາວ ຍັງຄົງຢູ່ໃນອັນດັບຕໍ່າທີ່ສຸດໃນພາກພື້ນອາຊີຕາເວັນອອກ ແລະ ເຂດປາຊີຟິກ, ຄືພຽງແຕ່ຖືກຈັດໃນອັນດັບດີກວ່າມຽນມາ (167) ແລະ ຕີມໍເລສເຕ້ (173) ທຽບໃສ່ປະເທດເພື່ອນບ້ານອາຊຽນ ແລະ ປະເທດຄູ່ແຂ່ງໃນພາກພື້ນແລ້ວ ສປປ ລາວ ກໍຍັງຢູ່ໃນອັນດັບທີ່ລາກທ້າຍຢູ່ ເຊັ່ນ: ກໍາປູເຈຍ (127), ຫວຽດນາມ (90), ໄທ (49), ມາເລເຊຍ (18). ດັ່ງນັ້ນ ການສືບຕໍ່ປັບປຸງເພີ່ມເຕີມແມ່ນມີຄວາມສໍາຄັນ.
ຜົນສໍາເລັດຂອງການຈັດອັນດັບການດໍາເນີນທຸລະກິດໃນ ສປປ ລາວ ອີງຕາມ 10 ຕົວຊີ້ວັດມີດັ່ງນີ້:
1. ສປປ ລາວ ໄດ້ປັບປຸງອັນດັບຂອງຕົນໃນການເລີ່ມທຸລະກິດຈາກອັນດັບທີ 154 ເປັນ 153 ເນື່ອງຈາກໄລຍະເວລາທີ່ໃຊ້ໃນການເລີ່ມເຮັດທຸລະກິດຫຼຸດລົງຈາກ 92 ວັນ ເຫຼືອ 73 ວັນ.
2. ສປປ ລາວ ຖືກຈັດອັນດັບໃນການກໍ່ສ້າງ 42/189.
3. ສໍາລັບການຂໍໄຟຟ້າໃນ ສປປ ລາວ ແມ່ນມີການປັບໂຕຢູ່ອັນດັບ 158/189.
4. ໃນຂົງເຂດການຈົດທະບຽນ ສປປ ລາວຈັດຢູ່ໃນອັນດັບທີ 66/189.
5. ດັ່ງທີ່ໄດ້ກ່າວມາຂ້າງເທິງ, ສປປ ລາວ ໄດ້ມີບົດບາດໃນການປ່ອຍສິນເຊື່ອໂດຍການປັບປຸງການເຂົ້າເຖິງຂໍ້ມູນສິນເຊື່ອເຊິ່ງໃນປະຈຸບັນຢູ່ໃນອັນດັບທີ 70/189.
6. ສປປ ລາວ ຍັງຄົງຈັດຢູ່ໃນອັນດັບທີ 178/189 ໃນການປົກປ້ອງນັກລົງທຶນລາຍຍ່ອຍ.
7. ການຈ່າຍພັນທະອາກອນຍັງຢູ່ອັນດັບ 127/189
8. ໃນການປະເມີນດ້ານການຄ້າຂ້າມແດນ, ສປປ ລາວຍັງຄົງຢູ່ອັນດັບ 108/189.
9. ການເຮັດໃຫ້ສັນຍາມີຜົນສັກສິດໃນ ສປປ ລາວ ຍັງຈັດຢູ່ໃນອັນດັບ 92/189.
10. ການແກ້ໄຂການລົ້ມລະລາຍຂອງ ສປປ ລາວ ຍັງຄົງຢູ່ໃນອັນດັບທີ 189/189.
ແຫຼ່ງທີ່ມາ: ບົດລາຍງານການດໍາເນີນທຸລະກິດ 2016, ກຸ່ມທະນາຄານໂລກ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.