ກອງປະຊຸມໄດ້ປຶກສາຫາລືກັບບັນດາຫ້າງຮ້ານ ແລະ ທຸລະກິດທີ່ມີການນຳເຂົ້າພາຫະນະທຸກປະເພດ ກ່ຽວກັບແຜນການຫຼຸດອາກອນຊົມໃຊ້ (ອກຊ) ພາຫະນະ ຈາກປົກກະຕິຢູ່ລະຫວ່າງ 25%-150% ມາເປັນ 3%-90% ຊື່ງຈະເຮັດໃຫ້ລາຄາພາຫະນະຫຼຸດລົງ.
ນອກຈາກການປັບປຸງກົດໝາຍ ວ່າດ້ວຍ ສ່ວຍສາອາກອນ ກ່ຽວກັບພາຫະນະບາງມາດຕາແລ້ວ ກໍຍັງມີແຜນປັບປຸງມາດຕາອື່ນໆອີກ ເພື່ອໃຫ້ສອດຄ່ອງກັບພັນທະຂອງ ສປປ ລາວ ພາຍຫຼັງການເຂົ້າຮ່ວມປະຊາຄົມເສດຖະກິດອາຊຽນ (AEC) ທີ່ເຮັດໃຫ້ພາສີນໍາເຂົ້າສິນຄ້າຫຼາຍປະເພດຫຼຸດລົງເຫຼືອ 0 % (ຍົກເວັ້ນບາງປະເພດສິນຄ້າ) ແລະ ພັນທະຕໍ່ກັບອົງການການຄ້າໂລກ (WTO). ອາກອນຊົມໃຊ້ ຫຼື ອາກອນທາງອ້ອມຈະປັບລົງຈາກເດີມຫຼາຍພໍສົມຄວນ ເຊິ່ງຈະສົ່ງຜົນດີໃຫ້ຜູ້ຊົມໃຊ້ພາຍໃນ ໂດຍສະເພາະ ຜູ້ທີ່ມີລາຍຮັບລະດັບກາງ ຫາ ໜ້ອຍ ຈະໄດ້ມີພາຫະນະຊົມໃຊ້ຢ່າງສະດວກສະບາຍ.
ທັງນີ້ ກົດໝາຍສະບັບປັບປຸງດັ່ງກ່າວ ຄາດວ່າຈະປະກາດໃຊ້ຢ່າງເປັນທາງການ ໃນທ້າຍປີ 2015 ພ້ອມກັບການເຂົ້າຮ່ວມເປັນສະມາຊິກ AEC ຢ່າງເປັນທາງການເຊິ່ງຈະກາຍເປັນສິ່ງທ້າທາຍພໍສົມຄວນໃຫ້ກັບພາກລັດ ແລະ ຜູ້ປະກອບການທີ່ນຳເຂົ້າພາຫະນະ. ສິ່ງດັ່ງກ່າວຈະເປັນພື້ນຖານສຳຄັນໃຫ້ແກ່ການສ້າງລາຍຮັບຂອງລັດຖະບານ ໃຫ້ເຂົ້າສູ່ລະບົບເຊັ່ນດຽວກັບປະເທດເພື່ອນບ້ານທີ່ມີລາຍຮັບ ອກຊ ໃນລະດັບ 60%-70% ລົງມາ. ເຖິງຢ່າງໃດກໍຕາມ, ອັດຕາອາກອນທີ່ປັບຫຼຸດຂອງ ສປປ ລາວ ຍັງຖືວ່າຢູ່ໃນອັດຕາທີ່ສູງພໍສົມຄວນ ຫາກທຽບກັບບັນດາປະເທດເພື່ອນບ້ານ.
ແຫຼ່ງທີ່ມາ: ໜັງສືພິມວຽງຈັນໃໝ່
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.