ກະຊວງອຸດສາຫະກໍາ ແລະ ການຄ້າ ອອກ ຄໍາສັ່ງຂອງລັດຖະມົນຕີວ່າການ ກ່ຽວກັບ ການຕິດສະຫຼາກສິນຄ້າ ເປັນພາສາລາວ, ສະບັບເລກທີ 2501/ອຄ. ຄພນ, ລົງວັນທີ 16 ທັນວາ 2015 ເພື່ອຜັນຂະຫຍາຍ ເນື້ອໃນຂອງກົດໝາຍ ວ່າດ້ວຍ ການປົກປ້ອງຜູ່ຊົມໃຊ້, ສະບັບເລກທີ 02/ສພຊ, ລົງວັນທີ 30 ມີຖຸນາ 2010 ໃຫ້ຜູ່ຈັດຕັດປະຕິບັດ ຢູ່ຂັ້ນທ້ອງຖິ່ນເຂົ້າໃຈແຈ້ງກ່ຽວກັບພາລະບົດບາດຂອງຕົນ ໃນວຽກງານການຄຸ້ມຄອງ ແລະ ຕິດຕາມການຕິດສະຫຼາກສິນຄ້າເປັນພາສາລາວ, ແນໃສ່ເຮັດໃຫ້ຜູ່ຜະລິດຢູ່ພາຍໃນ ແລະ ນໍາເຂົ້າຈາກຕ່າງປະເທດ ຕ້ອງຕິດສະຫຼາກເປັນພາສາລາວກ່ອນຈຶ່ງຈໍາໜ່າຍ, ເຮັດໃຫ້ຜູ່ຊົມໃຊ້ເຂົ້າໃຈກ່ຽວກັບສັບພະຄຸນ ແລະ ຄຸນນະພາບຂອງສິນຄ້າ ກ່ອນຈະເລືອກຊື້ ແລະ ຊົມໃຊ້ເພື່ອຫຼີກລ້ຽງການຊົມໃຊ້ສິນຄ້າທີ່ບໍ່ໄດ້ຄຸນນະພາບ, ເສຍຄຸນ ຫຼື ສັບພະຄຸນ ບໍ່ຖືກຕ້ອງຕາມຈຸດປະສົງຂອງຜູ່ຊົມໃຊ້, ປ້ອງກັນບໍ່ໃຫ້ມີ ຜົນກະທົບທີ່ບໍ່ດີ ຕໍ່ສຸຂະພາບ, ຊັບສິນ ຂອງຜູ່ຊົມໃຊ້ ແລະ ສິ່ງແວດລ້ອມ.ໂດຍໄດ້ກໍານົດໃຫ້ສະຫຼາກຂອງສິນຄ້າ ຕ້ອງຕິດເປັນພາສາລາວ, ແລະ ປະກອບມີເນື້ອໃນຕົ້ນຕໍດັ່ງນີ້:
1. ປະເພດ ຫຼື ຊະນິດສິນຄ້າ;
2. ເຄື່ອງໝາຍການຄ້າ ທີ່ໄດ້ຈົດທະບຽນຂອງຜູ່ຜະລິດ ແລະ ຜູ່ນໍາເຂົ້າ ເພື່ອຈໍາໜ່າຍ;
3. ສະຖານທີ່ຜະລິດ ແລະ ຜູ່ນໍາເຂົ້າເພື່ອຈໍາໜ່າຍ, ຊື່ປະເທດຜະລິດສິນຄ້າ;
4. ລາຄາ, ຈໍານວນ, ປະລິມານ, ຄຸນນະພາບ, ບໍລິມາດ, ສ່ວນປະກອບທີ່ກໍານົດແຈ້ງອັດຕາສ່ວນປະກອບ, ຂໍ້ແນະນໍາວິທີນໍາໃຊ້, ຄໍາເຕືອນ, ວັນເດືອນປີ ຜະລິດ ແລະ ວັນໝົດອາຍຸນໍາໃຊ້.
ສໍາລັບສິນຄ້າທີ່ໄດ້ຜະລິດ ຫຼື ນໍາເຂົ້າມາຈໍາໜ່າຍຢູ່ສປປ ລາວ ກ່ອນປະກາດໃຊ້ຄໍາສັ່ງສະບັບນີ້ ຜູ່ຂາຍຍ່ອຍຕ້ອງປະສານເອົາສະຫຼາກທີ່ເປັນພາສາລາວ ນໍາຜູ່ທີ່ສະໜອງສິນຄ້າໃຫ້ຕົນ.
ຄໍາສັ່ງສະບັບ ນີ້ ໄດ້ເອົາລົງໃນຈົດໝາຍເຫດທາງລັດຖະການ ວັນທີ 24 ທັນວາ 2015 ແລະ ມີຜົນບົງຄັບໃຊ້ເລີ່ມແຕ່ວັນທີ 8 ມັງກອນ 2015 ເປັນຕົ້ນໄປ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.