ການປູກໝາກກ້ວຍເພື່ອເປັນສິນຄ້າ ເປັນຍຸດທະສາດອັນດີ ເພື່ອສ້າງລາຍຮັບໃຫ້ແກ່ຊາວກະສິກອນໃນເຂດຊົນນະບົດ ຢູ່ ສປປ ລາວ, ແຕ່ສົ່ງຜົນກະທົບທາງລົບຕໍ່ສຸຂະພາບຂອງປະຊາຊົນ ແລະ ຄຸນນະພາບດິນປູກຝັງ. ຄວາມໝາຍຂອງການປູກກ້ວຍເພື່ອເປັນສິນຄ້າ ແມ່ນການເພີ່ມປະລິມານ ແລະ ຄຸນນະພາບຂອງຜົນຜະລິດ ໂດຍນໍາໃຊ້ປັດໄຈການຜະລິດທີ່ມີຄຸນນະພາບດີເຂົ້າໃນຂະບວນການຜະລິດ ແລະ ມີຕະຫຼາດທີ່ແນ່ນອນເພື່ອຮອງຮັບຜົນຜະລິດດັ່ງກ່າວ. ການປູກກ້ວຍເພື່ອເປັນສິນຄ້າສ່ວນຫຼາຍ ແມ່ນອີງຕາມນະໂຍບາຍການຜະລິດກະສິກໍາຕາມສັນຍາ ໃນຮູບແບບ “2+3” ເຊິ່ງເປັນການຕົກລົງກັນຜະລິດໝາກກ້ວຍ ລະຫວ່າງ ຊາວກະສິກອນ ແລະ ນັກລົງທຶນ ໂດຍຊາວກະສິກອນ ປະກອບສ່ວນດ້ານແຮງງານ ແລະ ທີ່ດິນປູກຝັງ, ສ່ວນນັກລົງທຶນ ປະກອບສ່ວນດ້ານປັດໄຈການຜະລິດ, ເຕັກນິກການຜະລິດ ແລະ ຕະຫຼາດ.
ໃນໄລຍະຜ່ານມາ, ການຈັດຕັ້ງປະຕິບັດນະໂຍບາຍສົ່ງເສີມການປູກໝາກກ້ວຍເປັນສິນຄ້າ ໄດ້ສ້າງຜົນປະໂຫຍດທາງເສດຖະກິດຢ່າງໜ້າເພິ່ງພໍໃຈ. ໝາກຜົນອັນພົ້ນເດັ່ນ ແມ່ນການດຶງດູດເອົານັກລົງທຶນຈາກ ສປ ຈີນ ເຂົ້າມາລົງທຶນສົ່ງເສີມຊາວກະສິກອນລາວ ປູກໝາກກ້ວຍເພື່ອສົ່ງອອກ ຢູ່ເຂດພາກເໜືອຂອງ ສປປ ລາວ ເຊັ່ນ: ແຂວງບໍ່ແກ້ວ, ແຂວງຫຼວງນໍ້າທາ ແລະ ແຂວງອຸດົມໄຊ. ໃນໄລຍະເວລາພຽງ 04 ປີ, ມູນຄ່າການສົ່ງອອກກ້ວຍທັງໝົດ ໄດ້ເພີ່ມຂຶ້ນປະມານ 10 ເທົ່າ ເຊິ່ງເພີ່ມຂຶ້ນ ຈາກ 3,8 ລ້ານໂດລາ ໃນສົກປີ 2011-12 ມາເປັນ 40 ລ້ານໂດລາ ໃນສົກປີ 2014-15. ຕະຫຼາດສົ່ງອອກຕົ້ນຕໍ ແມ່ນ ສປ ຈີນ ແລະ ລຊ ໄທ. ໃນສອງຕະຫຼາດດັ່ງກ່າວ, ການສົ່ງອອກ ໄປ ສປ ຈີນ ໄດ້ເພີ່ມຂຶ້ນຢ່າງໄວ ເຊິ່ງກໍ່ໃຫ້ເກີດການປ່ຽນແປງໂຄງປະກອບຂອງຕະຫຼາດສົ່ງອອກໝາກກ້ວຍ ຈາກການສົ່ງອອກໝາກກ້ວຍທີ່ເນັ້ນໃສ່ຕະຫຼາດຂອງ ລຊ ໄທ ໃນເມື່ອກ່ອນ ມາເປັນ ຕະຫຼາດຂອງ ສປ ຈີນ ໃນປັດຈຸບັນ. ການສົ່ງອອກໝາກກ້ວຍ ໄປ ສປ ຈີນ ໄດ້ເພີ່ມຂຶ້ນ ຈາກ 42% ຂອງມູນຄ່າການສົ່ງອອກໝາກກ້ວຍທັງໝົດ ໃນສົກປີ 2011-12 ມາເປັນ 88% ໃນສົກປີ 2014-15. ການສົ່ງອອກດັ່ງກ່າວ ຄາດວ່າ ຈະມີແນວໂນ້ມເພີ່ມຂຶ້ນຢ່າງຕໍ່ເນື່ອງ.
ເຖິງວ່າ ຜົນປະໂຫຍດທາງເສດຖະກິດຈາກການປູກກ້ວຍເພື່ອສົ່ງອອກ ມີຫຼາຍ, ຜົນປະໂຫຍດດັ່ງກ່າວ ໄດ້ຖືກແຈກຢາຍໃຫ້ແກ່ຜູ້ມີສ່ວນຮ່ວມໃນການຜະລິດ ຢ່າງບໍ່ເທົ່າທຽມກັນ. ອີງຕາມຜົນການຄົ້ນຄວ້າເບື້ອງຕົ້ນ ຂອງສະຖາບັນຄົ້ນຄວ້າກະສິກໍາ ແລະ ປ່າໄມ້ແຫ່ງຊາດ ກ່ຽວກັບ ການປູກກ້ວຍເພື່ອເປັນສິນຄ້າ ຢູ່ ສປປ ລາວ ໃນປີ 2016, ຜູ້ມີສ່ວນຮ່ວມໃນການຜະລິດ ປະກອບດ້ວຍ ນັກລົງທຶນຈີນ, ຜູ້ໃຫ້ເຊົ່າທີ່ດິນ ແລະ ກໍາມະກອນໃນສວນກ້ວຍ. ໃນກໍລະນີຂອງແຂວງຫຼວງນໍ້າທາ, ນັກລົງທຶນທີ່ສົ່ງເສີມການປູກກ້ວຍ ມີຜົນໄດ້ຮັບສຸດທິຈາກການປູກກ້ວຍ ປະມານ 20 ລ້ານກີບ/ເຮັກຕາ/ປີ; ຜູ້ໃຫ້ເຊົ່າທີ່ດິນປູກກ້ວຍ ມີລາຍຮັບປະມານ 15 ລ້ານກີບ/ເຮັກຕາ/ປີ; ແລະ ກໍາມະກອນທີ່ເຮັດວຽກໃນສວນກ້ວຍ ມີລາຍຮັບ 780.000 ກີບ/ເຮັກຕາ/ປີ. ຜົນການຄົ້ນຄວ້າດັ່ງກ່າວ ຊີ້ໃຫ້ເຫັນວ່າ ນັກລົງທຶນຈີນ ມີຜົນໄດ້ຮັບສຸດທິຈາກການປູກກ້ວຍ ຫຼາຍກວ່າປະຊາຊົນລາວ ທີ່ປະກອບສ່ວນດ້ານດິນປູກຝັງ ແລະ ແຮງງານ.
ນອກນັ້ນ, ຄວາມບໍ່ເທົ່າທຽມກັນທາງດ້ານຜົນປະໂຫຍດທາງເສດຖະກິດຈາກການປູກກ້ວຍ ຍິ່ງຈະເພີ່ມຂຶ້ນ ຖ້າພິຈາລະນາຕົ້ນທຶນທາງສັງຄົມ ແລະ ສິ່ງແວດລ້ອມຂອງການປູກກ້ວຍ. ຜົນການຄົ້ນຄວ້າຂອງ ສະຖາບັນຄົ້ນຄວ້າກະສິກໍາ ແລະ ປ່າໄມ້ແຫ່ງຊາດ (2016) ຊີ້ໃຫ້ເຫັນວ່າ ການນໍາໃຊ້ຢາຂ້າຫຍ້າ ແລະ ຢາປາບສັດຕູພືດ ໃນສວນກ້ວຍ ມີປະລິມານຫຼາຍ ເຊິ່ງສົ່ງຜົນກະທົບທາງລົບຕໍ່ຄຸນນະພາບຊີວິດຂອງຊາວກະສິກອນ ແລະ ປະຊາຊົນທີ່ຢູ່ອ້ອມຂ້າງສວນກ້ວຍ ແລະ ເຮັດໃຫ້ຄຸນນະພາບຂອງດິນປູກຝັງເຊື່ອມໂຊມລົງ. ຖ້າລວມເອົາຕົ້ນທຶນການຟື້ນຟູດິນເຂົ້າໃນການຄໍານວນຜົນໄດ້ຮັບສຸດທິຈາກການໃຫ້ເຊົ່າທີ່ດິນ, ຜູ້ໃຫ້ເຊົ່າທີ່ດິນປູກກ້ວຍ ຍິ່ງຈະມີລາຍຮັບສຸດທິໜ້ອຍລົງ. ໃນລັກສະນະດຽວກັນ, ຖ້າລວມເອົາຕົ້ນທຶນການປິ່ນປົວສຸຂະພາບຂອງຊາວກະສິກອນ ເຂົ້າໃນການຄໍານວນຜົນໄດ້ຮັບສຸດທິຈາກການອອກແຮງງານ, ກໍາມະກອນທີ່ເຮັດວຽກໃນສວນກ້ວຍ ຍິ່ງຈະມີລາຍຮັບສຸດທິໜ້ອຍລົງ.
ລວມຄວາມແລ້ວ, ການປູກກ້ວຍເພື່ອສົ່ງອອກ ເປັນທ່າແຮງອັນສໍາຄັນ ໃນການສ້າງລາຍຮັບໃຫ້ແກ່ປະຊາຊົນລາວ ເພື່ອຫຼຸດຜ່ອນຄວາມທຸກຍາກໃນເຂດຊົນນະບົດ. ແຕ່ວ່າ ປະຊາຊົນລາວ ທີ່ເປັນເຈົ້າຂອງທີ່ດິນ ແລະ ເປັນຜູ້ອອກແຮງງານໃນສວນກ້ວຍ ຍັງບໍ່ທັນໄດ້ຮັບຜົນປະໂຫຍດທາງເສດຖະກິດຈາກການປູກກ້ວຍ ເທົ່າທີ່ຄວນ ແລະ ມີບາງກໍລະນີການປູກກ້ວຍ ໄດ້ສົ່ງຜົນກະທົບທາງລົບຕໍ່ຄຸນນະພາບຊີວິດຂອງປະຊາຊົນ ແລະ ສິ່ງແວດລ້ອມ. ສະນັ້ນ, ການສົ່ງເສີມການປູກກ້ວຍທີ່ມີຄວາມຍືນຍົງ ຄວນພິຈາລະນາ 02 ຂໍ້ສະເໜີ ດັ່ງລຸ່ມນີ້:
- ເພີ່ມທະວີຄວາມເຂັ້ມງວດໃນການອະນຸມັດລົງທຶນປູກກ້ວຍ ຕາມກົດໝາຍວ່າດ້ວຍການສົ່ງເສີມການລົງທຶນ; ແລະ ຄຸ້ມຄອງ ແລະ ຕິດຕາມກວດກາໂຄງການລົງທຶນປູກກ້ວຍ ໃຫ້ສອດຄ່ອງກັບ ກົດໝາຍວ່າດ້ວຍການປ້ອງກັນພືດ ແລະ ລະບຽບການກ່ຽວຂ້ອງກັບການຄຸ້ມຄອງຢາປາບສັດຕູພືດ, ຢາຂ້າຫຍ້າ ແລະ ຝຸ່ນເຄມີ.
- ສ້າງຄູ່ຮ່ວມລົງທຶນລາວ-ຈີນ ເພື່ອຮຽນຮູ້ວິທີການເຂົ້າເຖິງຕະຫຼາດສິນຄ້າກະສິກໍາ ຢູ່ ສປ ຈີນ ແລະ ເພື່ອອໍານວຍຄວາມສະດວກແກ່ການຄ້າ ແລະ ການລົງທຶນ ຢູ່ ສປປ ລາວ ເປັນຕົ້ນແມ່ນ ຂັ້ນຕອນການລົງທຶນ, ຄຸນລັກສະນະຂອງຕະຫຼາດແຮງງານ ແລະ ຂັ້ນຕອນການນໍາເຂົ້າປັດໄຈການຜະລິດ.
ຂຽນໂດຍ: ສີທະນົນໄຊ ສຸວັນນະພັກດີ
ກອງເລຂາອຳນວຍຄວາມສະດວກທາງດ້ານການຄ້າ
ກົມການນຳເຂົ້າ ແລະ ສົ່ງອອກ
ກະຊວງອຸດສາຫະກຳ ແລະ ການຄ້າ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.