ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນາຖາວອນ
ກະຊວງການເງິນ
ກົມພາສີ ເລກທີ 09045/ກພສ
ນະຄອນຫຼວງວຽງຈັນ, ວັນທີ 13 ພະຈິກ 2021
ຄໍາແນະນໍາ
ກ່ຽວກັບ ການຄຸ້ມຄອງ ວຽກງານບໍລິຫານຄວາມສ່ຽງ ຂອງກົມພາສີ
- ອີງຕາມ ກົດໝາຍວ່າດ້ວຍພາສີ ສະບັບປັບປຸງ ສະບັບເລກທີ 04/ສພຊ, ລົງວັນທີ 20 ທັນວາ 2011 ແລະ ກົດໝາຍວ່າດ້ວຍພາສີ ສະບັບປັບປຸງບາງມາດຕາ ເລກທີ 57/ສພຊ, ລົງວັນທີ 20 ທັນວາ 2014
- ອີງຕາມບົດແນະນໍາກະຊວງການເງິນ, ສະບັບເລກທີ 1559/ກງ, ລົງວັນທີ 24 ພຶດສະພາ 2016 ວ່າດ້ວຍ ການຈັດຕັ້ງປະຕິບັດກົດໝາຍວ່າດ້ວຍພາສີ
- ອີງຕາມ ຂໍ້ຕົກລົງຂອງລັດຖະມົນຕີວ່າການກະຊວງການເງິນ ສະບັບເລກທີ: 2826/ກງ, ລົງວັນທີ 22 ສີິງຫາ 2017 ວ່າດ້ວຍການຈັດຕັ້ງ ແລະ ການເຄື່ອນໄຫວຂອງກົມພາສີ;
- ອີງຕາມ ຄູ່ມືແນະນໍາ ຂອງອົງການພາສີໂລກ ກ່ຽວກັບການບໍລິຫານຄວາມສ່ຽງ ຂອງຂະແໜງພາສີ (WCO Customs Risk Management Compendium)
- ບົດລາຍງານພະແນກກວດສອບຄືນການແຈ້ງພາສີ, ສະບັບເລກທີ 0532/ພຈກ, ລົງວັນທີ 9 ຕຸລາ2019
ຫົວໜ້າກົມພາສີ ອອກຄໍາແນະນໍາດັ່ງນີ້:
1. ຈຸດປະສົງ
ຄໍາແນະນໍາ ສະບັບນີ້ວາງອອກເພື່ອກໍານົດຫຼັກການ, ເງື່ອນໄຂ, ກົນໄກ ແລະ ວິທີການຄຸ້ມຄອງວຽກງານບໍລິຫານຄວາມສ່ຽງ ເພື່ອຮັບປະກັນ ການຈັດເກັບລາຍຮັບ, ການອໍານວຍຄວາມສະດວກທາງການຄ້າ ແລະ ການປົກປ້ອງສັງຄົມ ແນໃສ່ໃຫ້ລັດຖະການພາສີ ທີ່ດ່ານພາສີຊາຍແດນ ສາມາດເຂົ້າເຖິງຄວາມສ່ຽງຢ່າງທັນການ ເພື່ອຮັບຮູ້ກ່ຽວກັບຜູ້ປະກອບການ ຫຼື ປະເພດສິນຄ້າການສົ່ງອອກ-ນໍາເຂົ້າ ສິນຄ້າ, ເຄື່ອງຂອງ ທີ່ມີຄວາມສ່ຽງໃນການລັກລອບ ຫຼື ແຈ້ງບໍ່ຄົບຖ້ວນ.
2. ຂອບເຂດການນໍາໃຊ້
ຄໍາແນະນໍາສະບັບນີ້ ນໍາໃຊ້ສໍາຫຼັບລັດຖະການພາສີ ຂັ້ນສູນກາງ ແລະ ທ້ອງຖິ່ນ ໃນຂອບເຂດທົ່ວປະເທດ ທີ່ກ່ຽວຂ້ອງໂດຍກົງ ແລະ ປິ່ນອ້ອມ ໂດຍນໍາໃຊ້ຂໍ້ມູນການບໍລິຫານຄວາມສ່ຽງ ເພື່ອກວດກາສິນຄ້າ, ເຄື່ອງຂອງ ເຂົ້າ, ອອກ ແລະ ຜ່ານແດນ ສປປ ລາວ.
3. ການອະທິບາຍຄໍາສັບ
- ຄວາມສ່ຽງ (Risks) ແມ່ນຄວາມເປັນໄປໄດ້ ໃນການລະເມີນກົດໝາຍວ່າດ້ວຍພາສີ, ກົດໝາຍ ແລະ ລະບຽບການອື່ນ ໃນການນໍາເຂົ້າ-ສົ່ງອອກ, ຂົນສົ່ງຜ່ານແດນ, ການເຄື່ອນຍ້າຍສິນຄ້າ ແລະ ເກັບຮັກສາ, ການເຂົ້າ-ອອກຜູ້ໂດຍສານ ແລະ ຍານພາຫະນະ ຜ່ານດ່ານພາສີຊາຍແດນ.
- ການບໍລິຫານຄວາມສ່ຽງ (Risk Management) ແມ່ນຂັ້ນຕອນ ແລະ ມາດຕະການດ້ານວິຊາສະເພາະ ທີ່ລັດຖະການພາສີນໍາໃຊ້ເຂົ້າໃນການກໍານົດ, ປະເມີນຜົນ ແລະ ຈັດລະດັບຄວາມສ່ຽງ ເພື່ອເປັນບ່ອນອີງໃນການຈັດສັນຊັບພະຍາກອນຢ່າງມີປະສິດທິຜົນເຂົ້າໃນການກວດກາ, ຄວບຄຸມ ຕິດຕາມ ແລະ ສະໜັບສະໜູນການດໍາເນີນການອື່ນໆດ້ານພາສີ.
- ຕົວຊີ້ວັດຄວາມສ່ຽງ (Risk Indicators) ແມ່ນສິ່ງທີ່ຄາດວ່າອາດຈະມີການກະທໍາໃດໜຶ່ງທີ່ລະເມີດ ຕົວຢ່າງ: ແຫຼ່ງກໍາເນີດ, ມູນຄ່າສິນຄ້າ, ການຫຸ້ມຫໍ່ສິນຄ້າ, ເອກະສານປະກອບ ແລະ ອື່ນໆ ທີ່ກ່ຽວຂ້ອງ.
- ການກໍານົດສະດັບຄວາມສ່ຽງ (Level of Risk) ແມ່ນການກໍານົດ ຫຼື ຈັດປະເພດຄວາມສ່ຽງ.
- ການປະເມີນຄວາມສ່ຽງ (Risk Assessment) ແມ່ນການໄຈ້ແຍກຄວາມສ່ຽງອອກມາລະອຽດ ເພື່ອເອົາຄວາມສ່ຽງມາວິເຄາະ ຄວາມເປັນໄປໄດ້ ແລະ ຜົນທີ່ອາດຈະເກີດຂຶ້ນ ເພື່ອປະເມີນຄ່າຄວາມສ່ຽງ ແລະ ຈັດບຸລິມະສິດຄວາມສ່ຽງ.
- ການສ້າງຖານຄວາມສ່ຽງ (Risk Profile) ແມ່ນການເກັບກໍາຂໍ້ມູນ, ປະເມີນຂໍ້ມູນ, ວິເຄາະຂໍ້ມູນ, ສ້າງຖານຂໍ້ມູນ.
4. ຫຼັກການ
4.1. ການດໍາເນີນການຄຸ້ມຄອງຄວາມສ່ຽງຈະດໍາເນີນໄປໃນ 3 ຮູບແບບ ດັ່ງນີ້:
- ການກໍານົດຄວາມສ່ຽງທີ່ມີຜົນກະທົບຕໍ່ລາຍຮັບ: ມູນຄ່າແຈ້ງ, ລະຫັດ/ອັດຕາພາສີ, ລະບອບໃບແຈ້ງ, ແຫຼ່ງກໍາເນີດສິນຄ້າ, ການຫຸ້ມຫໍ່ສິນຄ້າ, ເອກະສານປະກອບການແຈ້ງພາສີ
- ການກໍານົດຄວາມສ່ຽງທີ່ມາຈາກການອໍານວຍຄວາມສະດວກທາງດ້ານການຄ້າ: ບຸກຄົນ ຫຼື ນິຕິບຸກຄົນ, ຖານະການເງິນ, ການປະຕິບັດສັນຍາການຄ້າສາກົນ, ເຂດການຄ້າເສລີ, ຮູບແບບການແຈ້ງພາສີ, ມາດຕະຖານການນໍາໃຊ້ລະບົບໄອທີຂອງຜູ້ປະກອບການ
- ການກໍານົດຄວາມສ່ຽງທີ່ມີຜົນກະທົບຕໍ່ການປົກປ້ອງສັງຄົມ: ຢາເສບຕິດ/ສານຕັ້ງຕົ້ນ, ການນໍາເຂົ້າສິນຄ້າ, ເຄື່ອງຂອງແບບຜິດກົດໝາຍ, ການປົກປ້ອງຊັບສິນທາງປັນຍາ
4.2. ການກໍານົດຄ່າຄວາມສ່ຽງ ມີ 3 ພື້ນຖານຄື:
ລະບົບ ອາຊິກຸດາ ແມ່ນມີຄວາມສາມາດ ໃນການວິເຄາະ ຄ່າຄວາມສ່ຽງຕາມ 3 ຮູບແບບ ທີ່ໄດ້ລະບຸຂ້າງເທິງ. ເຊິ່ງຄ່າຄວາມສ່ຽງດັ່ງກ່າວ ໄດ້ກໍານົດ ແຕ່ 0 ຫາ 100 ແລະ ຈັດເປັນ 3 ລະດັບຄວາມສ່ຽງ ຄື:
- ລະດັບທີ່ 1: ຊ່ອງສີຂາວ ຄ່າຄວາມສ່ຽງ ລະຫວ່າງ 0-30 ແມ່ນຄວາມສ່ຽງຂັ້ນຕົ້ນ (ລະດັບຕໍ່າ) ທີ່ສາມາດຄວບຄຸມໄດ້
- ລະດັບທີ່ 2: ຊ່ອງສີເຫຼືອງ ຄ່າຄວາມສ່ຽງ ລະຫວ່າງ 31-70 ແມ່ນຄວາມສ່ຽງປານກາງ (ລະດັບກາງ) ທີ່ຈະຕ້ອງໄດ້ມີການກວດກາເອກະສານ ແລະ/ຫຼື ກວດກາສິນຄ້າບາງສ່ວນ
- ລະດັບທີ່ 3: ຊ່ອງສີແດງ ຄ່າຄວາມສ່ຽງ ລະຫວ່າງ 71-100 ແມ່ນຄວາມສ່ຽງສູງສຸດ (ລະດັບສູງ) ທີ່ຈະຕ້ອງໄດ້ດໍາເນີນການກວດກາເອກະສານ ພ້ອມທັງການກວດກາສິນຄ້າ, ເຄື່ອງຂອງຕົວຈິງ
4.3. ວົງຈອນການຄຸ້ມຄອງຄວາມສ່ຽງ ແລະ ການສ້າງຖານຂໍ້ມູນຄວາມສ່ຽງ ປະກອບດ້ວຍ 6 ຂັ້ນຕອນ:
- ຂັ້ນຕອນທີ 1: ເກັບກໍາຂໍ້ມູນ ເຊິ່ງໄດ້ຈາກບົດລາຍງານການຢຶດສິນຄ້າຕ່າງໆ, ໄດ້ຈາກແຫຼ່ງຂ່າວພາຍໃນ/ພາຍນອກ, ໄດ້ຈາກການສໍາພາດເຈົ້າໜ້າທີ່ພາສີ, ເຈົ້າໜ້າທີ່ບັງຄັບໃຊ້ກົດໝາຍ, ຜູ້ປະກອບການນໍາເຂົ້າ, ຜູ້ບໍລິການແຈ້ງພາສີ ແລະ ຜູ້ບໍລິການສາງສິນຄ້າ.
- ຂັ້ນຕອນທີ 2: ສັງລວມຂໍ້ມູນ ທີ່ເກັບກໍາໄດ້ໃນເບື້ອງຕົ້ນ ເພື່ອວິໄຈຄວາມໜ້າເຊື່ອຖື ແລະ ຖືກຕ້ອງ ແລ້ວສັງລວມເປັນຕາຕະລາງ ເພື່ອສົມທຽບ ແລະ ຈັດລຽງຂໍ້ມູນ.
- ຂັ້ນຕອນທີ 3: ວິເຄາະຂໍ້ມູນສະຖິຕິ ເພື່ອກວດເບິ່ງຄວາມສອດຄ່ອງບັນດາຂໍ້ມູນທີ່ໄດ້ມາ
- ຂັ້ນຕອນທີ 4: ກໍານົດຄ່າ ແລະ ລະດັບຄວາມສ່ຽງ ເຊິ່ງກ່ອນອື່ນ ຕ້ອງກໍານົດຕົວຊີ້ວັດຄວາມສ່ຽງ ຫຼັງຈາກນັ້ນ ກໍານົດເລກຄ່າຄວາມສ່ຽງ
- ຂັ້ນຕອນທີ 5: ຄະນະກໍາມະການຄຸ້ມຄອງບໍລິຫານຄວາມສ່ຽງ ຂອງກົມພາສີ ຄົ້ນຄວ້າພິຈາລະນາ ເພື່ອຮັບຮອງຄ່າຄວາມສ່ຽງ ເພື່ອເອົາລົງລະບົບ ອາຊິກຸດາ ແລະ ແຈ້ງການນໍາໃຊ້ ພາຍໃນລັດຖະການພາສີ
- ຂັ້ນຕອນທີ 6: ພາຍຫຼັງຄະນະກໍາມະການບໍລິຫານຄວາມສ່ຽງໄດ້ອອກ ແຈ້ງການນໍາໃຊ້ແລ້ວ ຕ້ອງມີການປະເມີນທົບທວນຄືນ ເປັນແຕ່ລະໄລຍະ, ເພື່ອປັບປຸງຄ່າຄວາມສ່ຽງ ໂດຍໃຫ້ເລີ້ມດໍາເນີນການ ຕາມຂັ້ນຕອນທີ 1 ທີ່ໄດ້ກໍານົດຂ້າງເທິງ.
4.4. ການເກັບຂໍ້ມູນ
- ການເກັບຂໍ້ມູນຈາກພາຍໃນ ປະກອບມີ:
ໜ່ວຍງານປະຕິບັດກົດໝາຍ (ເຊັ່ນ: ທະຫານ, ຕໍາຫຼວດ, ໄອຍະການ, ສານ, ຂະແໜງປ່າໄມ້, ໜ່ວຍງານກວດກາ); ຂໍ້ມູນການຍຶດສິນຄ້າ, ຂໍ້ມູນແຫຼ່ງຂ່າວ-ຄະດີຈາກເຈົ້າໜ້າທີ່ ແລະ ຜູ້ປະກອບການ; ຂໍ້ມູນຈາກການກວດສອບຄືນ, ການແຈ້ງພາສີ, ເອກະສານການຂົນສົ່ງ, ແບບຟອມຂໍຂໍ້ມູນ ແລະ ອື່ນໆ.
- ການເກັບກໍາຂໍ້ມູນຈາກພາຍນອກ ປະກອບມີ:
ອົງການພາສີໂລກ WCO RILO Regional Intelligence Liaison Office, CEN, nCEN, Interpol, UNODC ແລະ ອື່ນໆ.
4.5. ການດັດປັບຖານຂໍ້ມູນຄວາມສ່ຽງ ແລະ ຄ່າຄວາມສ່ຽງ
ການດັດປັບຂໍ້ມູນຄວາມສ່ຽງ ແລະ ຄ່າຄວາມສ່ຽງ ຈະດໍາເນີນການເປັນແຕ່ລະໄລຍະ ຕາມສະພາບຕົວຈິງ.
5. ການສ້າງຕັ້ງຄະນະຮັບຜິດຊອບປັບປຸງວຽກງານບໍລິຫານຄວາມສ່ຽງຂອງກົມພາສີ
ການບໍລິຫານຄວາມສ່ຽງຈະຕ້ອງມີຂໍ້ຕົກລົງສ້າງຕັ້ງຄະນະກໍາມະການຮັບຜິດຊອບຄຸ້ມຄອງຄວາມສ່ຽງ; ຕ້ອງມີຜູ້ຮັບຜິດຊອບແຜນງານບໍລິຫານຄວາມສ່ຽງ ເພື່ອພັດທະນາແຜນງານ ແລະ ເພື່ອຈັດຕັ້ງປະຕິບັດການບໍລິຫານຄວາມສ່ຽງ ຫຼັງຈາກນັ້ນກໍຕິດຕໍ່ ແລະ ທົບທວນຄືນແຜນປະຕິບັດງານ ເຊິ່ງປະກອບດ້ວຍ:
5.1. ຄະນະກໍາມະການຊີ້ນໍາລວມຂອງກົມພາສີ
ມີໜ້າທີ່ຄຸ້ມຄອງ ແລະ ລາຍງານຄະນະຜູ້ບໍລິຫານລະດັບສູງໃນການຈັດຕັ້ງປະຕິບັດແຜນຍຸດທະສາດວຽກງານຄຸ້ມຄອງບໍລິຫານຄວາມສ່ຽງ; ກະກຽມ ແລະ ໃຫ້ຄໍາປຶກສາແກ່ຄວາມສ່ຽງທີ່ເປັນອັນຕະລາຍ ແລະ ວາງແຜນຍຸດທະສາດ; ທົບທວນບົດລາຍງານຄວາມສ່ຽງສູງ ແລະ ວິເຄາະຂັ້ນຕອນບໍລິຫານຄວາມສ່ຽງ ແລະ ການຄຸ້ມຄອງຄວາມສ່ຽງພາຍໃນ; ຮັບຮອງແນວທາງນະໂຍບາຍການຄຸ້ມຄອງຄວາມສ່ຽງ; ກໍານົດທິດທາງເປົ້າໝາຍ; ເຜີຍແຜ່ ນະໂຍບາຍວຽກງານບໍລິຫານຄວາມສ່ຽງ; ພັດທະນາຕົວຊີ້ວັດຄວາມສ່ຽງ; ຮັບປະກັນນະໂຍບາຍການຄຸ້ມຄອງຄວາມສ່ຽງທີ່ວາງອອກ ຮັບປະກັນເຄື່ອງມືໃນການບໍລິຫານຄວາມສ່ຽງແກ່ຜູ້ບໍລິຫານລະດັບກາງ ແລະ ວິຊາການຜູ້ປະຕິບັດງານຕົວຈິງ.
5.2. ພະແນກທີ່ຮັບຜິດຊອບວຽກງານບໍລິຫານຄວາມສ່ຽງ
ຈະຕ້ອງໄດ້ຮັບປະກັນນະໂຍບາຍທີວາງອອກໄປຖືກຈັດຕັ້ງປະຕິບັດໂດຍຜ່ານຂັ້ນຕອນ ການປະສານງານ ແລະ ບໍາລຸງຮັກສາຂັ້ນຕອນການບໍລິຫານຄວາມສ່ຽງ. ບໍລິຫານຄວາມສ່ຽງຕາມຂອບເຂດຄວາມຮັບຜິດຊອບຂອງຕົນຮັບປະກັນຂົງເຂດບຸລິມະສິດ ແລະ ໜ້າທີ່; ຮັບປະກັນລະບົບທີ່ໃຊ້ຈັດຕັ້ງປະຕິບັດ ແລະ ຂັ້ນຕອນມີປະສິດທິພາບ; ສືບຕໍ່ການຝຶກອົບຮົມ, ໃຫ້ຄໍາແນະນໍາ ແລະ ຊຸກຍູ້ພະນັກງານທີ່ເຮັດວຽກບໍລິຫານຄວາມສ່ຽງ; ຮັບປະກັນເຄື່ອງມືແກ່ເຈົ້າໜ້າທີ່ໃນການປະຕິບັດວຽກງານການຄຸ້ມຄອງຄວາມສ່ຽງ, ເກັບກໍາຄວາມສ່ຽງຫຼັກ; ພັດທະນາຄູ່ມືເອກະສານທີ່ໃຊ້ເຂົ້າໃນການດໍາເນີນການບໍລິຫານຄວາມສ່ຽງ; ຮັບປະກັນລະບົບການລາຍງານ, ອັບເດດຂໍ້ມູນຄວາມສ່ຽງໃນລະບົບ ແລະ ຮັບປະກັນເອກະສານບໍລິຫານຄວາມສ່ຽງແມ່ນທັນກັບສະພາບການປະຈຸບັນ.
5.3. ຂັ້ນໜ່ວຍງານ, ດ່ານ, ເຈົ້າໜ້າທີ່ປະຈໍາດ່ານ
ຮັບຜິດຊອບກວດກາຂໍ້ມູນ ແລະ ວິເຄາະຂໍ້ມູນ; ປະເມີນຂໍ້ມູນເບື້ອງຕົ້ນທີ່ໄດ້ຮັບ ແລະ ປະເມີນຂັ້ນຕອນການບໍລິຫານຄວາມສ່ຽງ ແລະ ການຄຸ້ມຄອງຄວາມສ່ຽງພາຍໃນ; ມີໜ້າທີ່ຫຼຸດຄວາມສ່ຽງ, ຮັບຮູ້ ແລະ ເຂົ້າໃຈນິຕິກໍາ ແລະ ສິດໜ້າທີ່ຂອງຕົນ; ປະຕິບັດຕາມນະໂຍບາຍ, ຄໍາແນະນໍາ ແລະ ຂັ້ນຕອນການບໍລິຫານຄວາມສ່ຽງ; ຊີ້ໃຫ້ເຫັນຄວາມສ່ຽງ, ຄວາມເປັນໄປໄດ້ ແລະ ຜົນທີ່ຄາດວ່າຈະເຮັດໃຫ້ເກີດມີຄວາມສ່ຽງ; ດໍາເນີນການເພື່ອຮັບປະກັນເຮັດໃຫ້ຄວາມສ່ຽງຫຼຸດລົງ; ເກັບກໍາຄວາມສ່ຽງຫຼັກ, ພັດທະນາຄູ່ມືເອກະສານທີ່ໃຊ້ເຂົ້າໃນການບໍລິຫານຄວາມສ່ຽງ; ຮັບປະກັນລະບົບການລາຍງານ ແລະ ຮັບປະກັນເອກະສານບໍລິຫານຄວາມສ່ຽງແມ່ນທັນກັບສະພາບການປະຈຸບັນ.
6. ການຈັດຕັ້ງປະຕິບັດ ແລະ ຜົນສັກສິດ
1. ມອບໃຫ້ຄະນະຮັບຜິດຊອບການຄຸ້ມຄອງບໍລິຫານຄວາມສ່ຽງ, ພະແນກກວດສອບຄືນການແຈ້ງພາສີ, ຂະແໜງການກວດສອບຄືນ ແລະ ບໍລິຫານຄວາມສ່ຽງ ປະສານສົມທົບກັບພາກສ່ວນທີ່ກ່ຽວຂ້ອງ ພ້ອມກັນຈັດຕັ້ງປະຕິບັດ, ເຜີຍແຜ່, ແນະນໍາ, ຜັນຂະຫຍາຍ ຄໍາແນະນໍາສະບັບນີ້ ແລະ ພ້ອມກັນຈັດຕັ້ງປະຕິບັດໃຫ້ໄດ້ຜົນສໍາເລັດຕາມລະດັບຄາດໝາຍ.
2. ມອບໃຫ້ພະແນກກວດສອບຄືນການແຈ້ງພາສີ ປະສານສົມທົບກັບພາກສ່ວນທີ່ກ່ຽວຂ້ອງໃນການຈັດຕັ້ງປະຕິບັດການບໍລິຫານຄວາມສ່ຽງໃຫ້ມີປະສິດທິຜົນ; ລົງເລິກແຜນວຽກລະອຽດໃຫ້ໄດ້ຕາມເປົ້າໝາຍ, ຈັດສັດພະນັກງານເຮັດວຽກສະເພາະຄຸ້ມຄອງການບໍລິຫານຄວາມສ່ຽງ ກ້າວໄປສູ່ການເຮັດລະບົບບໍລິຫານຄວາມສ່ຽງເຕັມຮູບແບບ ແລະ ສາມາດເຊື່ອມໂຍງກັບບັນດາຖານຂໍ້ມູນຄວາມສ່ຽງຂອງບັນດາຂະແໜງການລັດ.
3. ມອບໃຫ້ທຸກພາກສ່ວນຈົ່ງໃຫ້ການຮ່ວມມືຢ່າງເຕັມສ່ວນໃນການຈັດຕັ້ງປະຕິບັດວຽກງານຂອງຄະນະຮັບຜິດຊອບການຄຸ້ມຄອງຄວາມສ່ຽງ, ຖ້າຫາກມີຂໍ້ຫຍຸ້ງຍາກປະການໃດ ໃຫ້ຮ່ວມກັນຄົ້ນຄວ້າແກ້ໄຂ ແລະ ລາຍງານຂໍຄໍາເຫັນຄະນະນໍາກົມພາສີເປັນແຕ່ລະໄລຍະ.
4. ຄໍາແນະນໍາສະບັບນີ້ມີຜົນສັກສິດນັບແຕ່ມື້ລົງລາຍເຊັນເປັນຕົ້ນໄປ.
ຮັກສາການຫົວໜ້າກົມພາສີ
ບຸນປະເສີດ ສີກຸນລະບຸດ
| # | ຫົວຂໍ້ | ດາວໂຫຼດ |
|---|---|---|
| 1 | ຄໍາແນະນໍາ ກ່ຽວກັບ ການຄຸ້ມຄອງ ວຽກງານບໍລິຫານຄວາມສ່ຽງ ຂອງກົມພາສີ, ເລກທີ 09045/ກພສ, ລົງວັນທີ 13 ພະຈິກ 2019 |  PDF |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.