ແຜນວາດຂັ້ນຕອນການຂໍອະນຸຍາດ ສົ່ງອອກ ແຮ່ທາດ ແລະ ຜະລິດຕະພັນແຮ່ທາດ 2021
ອີງຕາມ ແຈ້ງການ ກ່ຽວກັບ ຂັ້ນຕອນການສະເໜີແຜນການຈຳໜ່າຍ ແລະ ການຈຳໜ່າຍຜະລິດຕະພັນແຮ່ທາດ ເລກທີ 0011/ກຄຮ3, ລົງວັນທີ 04 ມັງກອນ 2019 ແມ່ນມີຂັ້ນຕອນການຂໍອະນຸຍາດ ສົ່ງອອກ ແຮ່ທາດ ແລະ ຜະລິດຕະພັນແຮ່ທາດ ດັ່ງລຸ່ມນີ້:
ຂັ້ນຕອນ 1 ກະກຽມເອກະສານ ເພື່ອຂໍອະນຸຍາດສົ່ງອອກແຮ່ທາດ ແລະ ຜະລິດຕະພັນແຮ່ທາດ
ບໍລິສັດ ຫຼື ຫົວໜ່ວຍທຸລະກິດ ທີ່ສາມາດສະເໜີແຜນຈຳໜ່າຍຜະລິດຕະພັນແຮ່ທາດຕ້ອງແມ່ນຜູ້ທີ່ໄດ້ຮັບອະນຸຍາດດຳເນີນທຸລະກິດກ່ຽວກັບບໍ່ແຮ່ຖືກຕ້ອງຕາມລະບຽບກົດໝາຍ ແລະ ປະຕິບັດພັນທະທາງດ້ານການເງິນຕາມສັນຍາສຳປະທານ ແລະ ລະບຽບກົດໝາຍທີ່ກ່ຽວຂ້ອງຄົບຖ້ວນ, ຊຶ່ງຕ້ອງໄດ້ປະກອບເອກະສານດັ່ງນີ້:
- ການປະກອບເອກະສານແຜນຈຳໜ່າຍ
- ໜັງສືສະເໜີ (ຕາມແບບຟອມ)
- ແຜນການຈຳໜ່າຍ (ຕາມແບບຟອມ)
- ບົດສະຫຼຸບການປະຕິບັດວຽກງານໃນໄລຍະຜ່ານມາ ເປັນຕົ້ນ: ການຜະລິດ, ຈຳໜ່າຍ, ມູນຄ່າຈຳໜ່າຍ, ການປະຕິບັດພັນທະທາງດ້ານການເງິນຕໍ່ລັດຖະບານ (ພ້ອມເອກະສານຢັ້ງຢືນ) ແລະ ຂໍ້ສະດວກ-ຫຍຸ້ງຍາກ (ຕາມແບບຟອມ).
- ການປະກອບເອກະສານສະເໜີການຈຳໜ່າຍແຕ່ລະຄັ້ງ.
ເອກະສານທີ່ບໍລິສັດ ຫຼື ຫົວໜ່ວຍທຸລະກິດ ຕ້ອງໄດ້ປະກອບ:
1) ໜັງສືສະເໜີ (ຕາມແບບຟອມ)
2) ເອກະສານຢັ້ງຢືນການປະຕິບັດພັນທະທາງດ້ານການເງິນຄັ້ງຈຳໜ່າຍຜ່ານມາ ເຊັ່ນ: ຄ່າຊັບພະຍາກອນແຮ່ທາດ, ພາສີ, ອາກອນ ແລະ ຄ່າທຳນຽມອື່ນໆ (ກໍລະນີເຄີຍຈຳໜ່າຍຜ່ານມາ);
3) ສັນຍາຊື້-ຂາຍກັບລູກຄ້າ ແລະ ຜົນວິໄຈແຮ່ທາດ.
ຂັ້ນຕອນ 2 ຮັບ ແລະ ກວດກາ ເອກະສານ
- ການຈໍລະຈອນເອກະສານແຜນການຈຳໜ່າຍ: ຢື່ນເອກະສານຫາຂາເຂົ້າ --> ຄະນະກົມ/ຄະນະພະແນກພະລັງງານ ແລະ ບໍ່ແຮ່ ປະຈຳແຂວງ/ນະຄອນຫຼວງ --> ພະແນກ/ຫ້ອງການກ່ຽວຂ້ອງ --> ຄະນະກົມ/ຄະນະພະແນກພະລັງງານ ແລະ ບໍ່ແຮ່ ປະຈຳແຂວງ/ນະຄອນຫຼວງ ເຊັນອະນຸມັດ --> ຂາອອກ.
- ການຈໍລະຈອນເອກະສານການຈຳໜ່າຍ: ຢື່ນເອກະສານຫາຂາເຂົ້າ --> ພະແນກ/ຫ້ອງການກ່ຽວຂ້ອງ --> ຄະນະກົມ/ຄະນະພະແນກພະລັງງານ ແລະ ບໍ່ແຮ່ ປະຈຳແຂວງ/ນະຄອນຫຼວງ ເຊັນອະນຸມັດ --> ຂາອອກ.
ເອກະສານຈະຖືກຮັບເພື່ອພິຈາລະນາໃນຂັ້ນຕອນຕໍ່ໄປ ຫາກວ່າ ເອກະສານຄັດຕິດຄົບຖ້ວນ ແລະ ເງື່ອນໄຂຖືກຕ້ອງຕາມທີ່ໄດ້ລະບຸໃວ້ ໃນຂັ້ນຕອນທີ 1 ຂ້າງເທິ່ງນັ້ນ.
ຂັ້ນຕອນ 3 ຄົ້ນຄ້ວາ ແລະ ການພິຈາລະນາເອກະສານ
ກົມຄຸ້ມຄອງບໍ່ແຮ່/ພະແນກພະລັງງານ ແລະ ບໍ່ແຮ່ ປະຈຳແຂວງ/ນະຄອນຫຼວງ ຈະພິຈາລະນາເຊັນອະນຸມັດແຜນການຈໍາໜ່າຍ ດັ່ງກ່າວພາຍໃນ 1 ວັນ ລັດຖະການ. ດັ່ງລາຍລະອຽດລຸ່ມນີ້:
- ການຮັບເອກະສານຢູ່ ປ່ອງຂາເຂົ້າ-ຂາອອກ ຂອງກົມກ່ຽວຂ້ອງ ຖ້າເອກະສານຄົບຖ້ວນຕາມຂັ້ນຕອນ 1 ແມ່ນຈະເອົາເຂົ້າເລກທີຂາເຂົ້າ ແລ້ວສົ່ງໃຫ້ພະແນກກ່ຽວຂ້ອງຄົ້ນຄ້ວາໃນຂັ້ນຕອນຕໍ່ໄປ. ໃນກໍລະນີເອກະສານບໍ່ຖືກຕ້ອງ ຫຼື ບໍ່ຄົບຖ້ວນ ແມ່ນຜູ້ຮັບເອກະສານຢູ່ຂາເຂົ້າຈະແຈ້ງໃນທັນທີ;
- ວິຊາການ ຂອງພະແນກກ່ຽວຂ້ອງຈະຮັບເອກະສານເພື່ອຄົ້ນຄ້ວາຕື່ມ ຖ້າເອກະສານບໍ່ຖືກຕ້ອງກໍ່ຈະແຈ້ງໃຫ້ຜູ້ຍືນເອກະສານຮັບຊາບເພື່ອປັບປຸງ. ຖ້າເອກະສານຖືກຕ້ອງ ແລະ ການພິຈາລະນາສໍາເລັດ ແມ່ນວິຊາການຈະຮ່າງໜັງສືແຈ້ງການຈຳໜ່າຍ ເຖິງຄະນະກົມ ເພື່ອຂໍການພິຈາລະນາເປັນຂັ້ນຕອນສຸດທ້າຍ;
- ຄະນະກົມ ຈະພິຈາລະນາອະນຸມັດໜັງສືແຈ້ງຈຳໜ່າຍຜະລິດຕະພັນແຮ່ທາດ.
ຂັ້ນຕອນ 4 ປະທັບກາໜັງສືແຈ້ງການຈຳໜ່າຍຜະລິດຕະພັນແຮ່ທາດ
ພາຍຫຼັງທີ່ ຄະນະກົມ ເຊັນອະນຸມັດໜັງສືແຈ້ງຈຳໜ່າຍຜະລິດຕະພັນແຮ່ທາດ ພະນັກງານ ປະຈຳຢູ່ຫ້ອງຂາເຂົ້າຈໍ້າກາໜັງສືແຈ້ງຈຳໜ່າຍຜະລິດຕະພັນ ໃຫ້ແກ່ຜູ້ປະກອບການມາຮັບເອົາ.
ຂັ້ນຕອນ 5 ການຮັບ ໜັງສືແຈ້ງການຈຳໜ່າຍຜະລິດຕະພັນແຮ່ທາດ
ຜູ້ປະກອບການ ສາມາດຮັບໜັງສືແຈ້ງຈຳໜ່າຍຜະລິດຕະພັນແຮ່ທາດ ທີ່ ກົມຄຸ້ມຄອງບໍ່ແຮ່, ກະຊວງພະລັງງານ ແລະ ບໍ່ແຮ່.
ໝາຍເຫດ: ສຳລັບເອກະສານການແຈ້ງການຈຳໜ່າຍຜະລິດຕະພັນແຮ່ທາດແມ່ນບໍ່ໄດ້ຈ່າຍຄ່າທຳນຽມ ແລະ ຄ່າບໍລິການ
- ການຊຳລະຄ່າຊັບພະຍາກອນແຮ່ທາດ
ຜູ້ປະກອບການຕ້ອງຢືນເອກະສານແຈ້ງການຈຳໜ່າຍຜະລິດຕະພັນ ຫາ ກະຊວງການເງິນ ເພື່ອຄິດໄລ່ຄ່າຊັບພະຍາກອນ ແລະ ແຈ້ງຊຳລະຄ່າຊັບພະຍາກອນໃຫ້ສຳເລັດ (ຕາມບົດບັນທຶກແບ່ງຄວາມຮັບຜິດຊອບ ລະຫວ່າງ ກະຊວງພະລັງງານ ແລະ ບໍ່ແຮ່ ແລະ ກະຊວງການເງິນ ສະບັບຄັ້ງວັນທີ 12 ສິງຫາ 2021.
- ການກວດກາ ຕິດຕາມຜະລິດຕະພັນແຮ່ທາດ
ຜູ້ປະກອບການຕ້ອງຢື່ນເອກະສານ ທີ່ໄດ້ຮັບອະນຸຍາດ ແລະ ເອກະສານກ່ຽວຂ້ອງ ຫາ ພະແນກພະລັງງານ ແລະ ບໍ່ແຮ່ ແຂວງ/ນະຄອນຫຼວງ ພາກສ່ວນທີ່ກ່ຽວຂ້ອງເພື່ອແຕ່ງຕັ້ງຄະນະກຳມະການ ລົງກວດກາ ຕິດຕາມ ປະລິມານຜະລິດຕະພັນແຮ່ທາດ ໂດຍການຕິດຊັງນ້ຳໜັກ ແລະ ນຳໃຊ້ໃບຢັ້ງຢືນການເຄື່ອນຍ້າຍ ກ່ອນສົ່ງຜະລິດຕະພັນແຮ່ທາດອອກຈາກເຂດໂຄງການຂຸດຄົ້ນ ແລະ ປຸງແຕ່ງແຮ່ທາດ (ປາກບໍ).
- ການປະຕິບັດຢູ່ດ່ານສາກົນ
- ປະກອບການສາມາດຢື່ນເອກະສານໃບອະນຸຍາດ ແລະ ເອກະສານທີ່ກ່ຽວຂ້ອງ ເພື່ອແຈ້ງພາສີ ຕາມຂັ້ນຕອນ ແລະ ລະບຽບການຕ່າງໆ.
ສອບຖາມລາຍລະອຽດເພີ່ມເຕີບ ທີ່ ກົມຄຸ້ມຄອງບໍ່ແຮ່, ກະຊວງ ພະລັງງານ ແລະ ບໍ່ແຮ່ ທີ່ເບີຕິດຕໍ່ +856 21 415123
| # | ຫົວຂໍ້ | ລາຍລະອຽດ | ອອກໂດຍ | ໄຟລ໌ |
|---|---|---|---|---|
| 1 | ໃບອະນຸຍາດ ນໍາເຂົ້າ/ສົ່ງອອກ ແຮ່ທາດ ແລະ ຜະລິດຕະພັນແຮ່ທາດ | ໃບອະນຸຍາດ ນໍາເຂົ້າ/ສົ່ງອອກ ແຮ່ທາດ ແລະ ຜະລິດຕະພັນແຮ່ທາດ | ກະຊວງ ພະລັງງານ ແລະ ບໍ່ແຮ່ | DOCX |
| # | ຊື່ | ລາຍລະອຽດ | ປະເພດ ມາດຕະການ | ອົງກອນ | ຄຳເຫັນ | ນິຕິກໍາ | ສິ້ນສຸດ | ໝວດມາດຕະການ |
|---|---|---|---|---|---|---|---|---|
| 1 | ຮຽກຮ້ອງໃຫ້ ຂໍອະນຸຍາດນຳເຂົ້າ: ແຮ່ທາດ ແລະ ຜະລິດຕະພັນແຮ່ທາດ | ແຮ່ທາດ ແລະ ຜະລິດຕະພັນ ແຮ່ທາດ ຕ້ອງໄດ້ຮັບອະນຸຍາດນຳເຂົ້າ ຈາກກົມບໍ່ແຮ່, ກະຊວງພະລັງງານ ແລະ ບໍ່ແຮ່ | ຕ້ອງມີໃບອະນຸຍາດ | ກະຊວງ ພະລັງງານ ແລະ ບໍ່ແຮ່ | ເພື່ອເກັບກໍາສະຖິຕິ. ແລະ ເພື່ອຄຸ້ມຄອງ ການນຳເຂົ້າແຮ່ທາດ ແລະ ຜະລິດຕະພັນແຮ່ທາດ ເພື່ອໃຫ້ເກີດຜົນປະໂຫຍດສູງສຸດ ຕໍ່ເສດຖະກິດຂອງຊາດ | ຂໍ້ຕົກລົງ ວ່າດ້ວຍ ລະບຽບການຂໍອະນຸຍາດ ນຳເຂົ້າ ແລະ ສົ່ງອອກ ແຮ່ທາດ ແລະ ຜະລິດຕະພັນແຮ່ທາດ, ເລກທີ 0352/ພບ | 9999-12-31 | ສິນຄ້າ |
| 2 | ຮຽກຮ້ອງໃຫ້ຂໍອະນຸຍາດສົ່ງອອກ: ຜະລິດຕະພັນແຮ່ທາດ | ການສົ່ງອອກ ຜະລິດຕະພັນ ແຮ່ທາດ ຕ້ອງໄດ້ຮັບອະນຸຍາດສົ່ງອອກ ຈາກ ກົມຄຸ້ມຄອງບໍ່ແຮ່, ກະຊວງພະລັງງານ ແລະ ບໍ່ແຮ່ | ຕ້ອງມີໃບອະນຸຍາດ | ກະຊວງ ພະລັງງານ ແລະ ບໍ່ແຮ່ | ເພື່ອຄຸ້ມຄອງ ການສົ່ງອອກແຮ່ທາດ ແລະ ພະລິດຕະພັນແຮ່ທາດ ໃຫ້ເກີດຜົນປະໂຫຍດສູງສຸດ ຕໍ່ເສດຖະກິດຂອງຊາດ | ຂໍ້ຕົກລົງ ວ່າດ້ວຍ ລະບຽບການຂໍອະນຸຍາດ ນຳເຂົ້າ ແລະ ສົ່ງອອກ ແຮ່ທາດ ແລະ ຜະລິດຕະພັນແຮ່ທາດ, ເລກທີ 0352/ພບ | 9999-12-31 | ສິນຄ້າ |
| 3 | ຕ້ອງກວດກາການສົ່ງອອກຜະລິດຕະພັນແຮ່ທາດ | ຜະລິດຕະພັນແຮ່ທາດ ຕ້ອງຖືກກວດກາຢູ່ສະຖານທີ່ປຸງແຕ່ງ ຫຼື ຜະລິດ ໂດຍຂະແໜງພະລັງງານ ແລະ ບໍ່ແຮ່ ເປັນເຈົ້າການສົມທົບກັບພາກສ່ວນທີ່ກ່ຽວຂ້ອງ (ຂະແໜງຄຸ້ມຄອງຊັບສິນຂອງລັດ) ກ່ອນການສົ່ງອອກ | ຮຽກຮ້ອງໃຫ້ມີການກວດກາ | ກະຊວງ ພະລັງງານ ແລະ ບໍ່ແຮ່ | ເພື່ອຄຸ້ມຄອງ, ກວດກາ ແລະ ປະເມີນມູນຄ່າ ກ່ອນການສົ່ງອອກ | ດຳລັດ ວ່າດ້ວຍ ການສົ່ງອອກ ຜະລິດຕະພັນແຮ່ທາດ, ສະບັບເລກທີ 90/ນຍ, ລົງວັນທີ 09 ມິຖຸນາ 2008 | 9999-12-31 | ສິນຄ້າ |
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.