ລາຍລະອຽດເພີ່ມເຕີບກະລຸນາກົດ: http://www.ned.moic.gov.la/ ຫຼື ດາວໂຫຼດຟາຍ
ຂັ້ນຕອນການເລີ່ມຕົ້ນທຸລະກິດ ຢູ່ ສປປ ລາວ
1. ກິດຈະການ ບໍ່ຢູ່ໃນບັນຊີຄວບຄຸມ
ຂັ້ນຕອນທີ 1: ການຂື້ນທະບຽນ ແມ່ນຈະໃຊ້ເວລາທັງໝົດບໍ່ກາຍ 10 ວັນລັດຖະການ ສໍາລັບການໄດ້ຮັບ ໃບທະບຽນວິສາຫະກິດ ພ້ອມກັບ ເລກປະຈໍາຕົວຜູ້ເສຍອາກອນ ຂອງຜູ້ລົງທຶນ ນັບຈາກມື້ຮັບເອກະສານທີ່ຖືກຕ້ອງຄົບຖ້ວນແລ້ວ. ຜູ້ລົງທຶນ ທີ່ມີຈຸດປະສົງແຈ້ງຂື້ນທະບຽນວິສາຫະກິດ ໃນກິດຈະການ ບໍ່ຢູ່ໃນບັນຊີຄວບຄຸມ ສາມາດຍື່ນຄໍາຮ້ອງຕໍ່ເຈົ້າໜ້າທີ່ທະບຽນວະສາຫະກິດ ຂອງ ຂະແໜງອຸດສາຫະກໍາ ແລະ ການຄ້າ ຕາມການແບ່ງຂັ້ນພິຈາລະນາ ການແຈ້ງຂື້ນທະບຽນວິສາຫະກິດ ລະຫວ່າງ ຂັ້ນສູນກາງ ແລະ ທ້ອງຖີ່ນ ທີ່ມີທີ່ຕັ້ງສໍານັກງານຂອງຕົນຕັ້ງຢູ່.
ຂັ້ນຕອນທີ 2: ການຮັບຕາປະທັບ ພ້ອມກັບ ໃບອະນຸຍາດນໍາໃຊ້ຕາປະທັບ ແມ່ນຈະໃຊ້ເວລາທັງໝົດບໍ່ກາຍ 5 ວັນລັດຖະການ ໂດຍຜູ້ລົງທຶນ ນໍາເອົາໃບທະບຽນວິສາຫະກິດ ໄປຍື່ນຂໍຄວັດຕາປະທັບນໍາຂະແໜງ ປ້ອງກັນຄວາມສະຫງົບ.
ຂັ້ນຕອນທີ 3: ການຂື້ນທະບຽນປະກັນສັງຄົມ ແມ່ນຈະໃຊ້ເວລາທັງໝົດພາຍໃນ 2 ວັນລັດຖະການ. ຜູ້ລົງທຶນ ຂໍຂື້ນທະບຽນປະກັນສັງຄົມນໍາຂະແໜງການແຮງງານ ແລະ ສະຫວັດດີການສັງຄົມ.
ຂັ້ນຕອນສຸດທ້າຍກ່ອນ ຜູ້ລົງທຶນ ສາມາດດໍາເນີນການຈັດຕັ້ງປະຕິບັດກິດຈະການຂອງຕົນໄດ້ນັ້ນ ແມ່ນຕ້ອງໄດ້ແບ່ງອອກເປັນ 2 ກໍລະນີຫຼັກຄື:
ກໍລະນີ 1: ກິດຈະການ ທີ່ບໍ່ຈໍາເປັນຂໍອະນຸຍາດດໍາເນີນທຸລະກິດ ແມ່ນຜູ້ລົງທືນ ສາມາດດໍາເນີນທຸລະກິດໄດ້ເລີຍ ຕາມທີ່ກໍານົດໄວ້ ໃນດ້ານຫຼັງໃບທະບຽນວິສາຫະກິດ.
ກໍລະນີ 2: ກິດຈະການ ທີ່ຕ້ອງຂໍອະນຸຍາດດໍາເນີນທຸລະກິດ ແມ່ນຜູ້ລົງທືນ ຕ້ອງຂໍອະນຸຍາດດໍາເນີນທຸລະກິດ ຕາມທີ່ກໍານົດໄວ້ໃນກົດໝາຍ ແລະ ລະບຽບການທີ່ກ່ຽວຂ້ອງ.
2. ກິດຈະການ ໃນບັນຊີຄວບຄຸມ ແລະ ກິດຈະການ ການລົງທຶນສໍາປະທານ
ກິດຈະການດັ່ງກ່າວ ແມ່ນໃຫ້ປະຕິບັດຕາມທີ່ໄດ້ກໍານົດໄວ້ໃນ ກົດໝາຍ ວ່າດ້ວຍ ການສົ່ງເສີມການລົງທຶນ ໂດນຍື່ນຄໍາຮ້ອງນໍາຂະແໜງການ ແລະ ການລົງທຶນ ໄດ້ທີ່ www.investlaos.gov.la ຫຼື ຕິດຕໍ່ສອບຖາມເພີ່ມເຕີບທີ່ ກົມສົ່ງເສີມການລົງທຶນ, ກະຊວງແຜນການ ແລະ ການລົງທຶນ, ໂທ: 021-217012, ແຟ໋ກ: 021-215491 ຫຼື ສາຍດ່ວນ ກະຊວງ ຜທ: 1503
ບັນດາບັນຊີກິດຈະການຄວບຄຸມ ແລະ ກິດຈະການສໍາປະທານ ຂອງ ສປປ ລາວ ແມ່ນອີງໃສ່ ດຳລັດ ວ່າດ້ວຍການຮັບຮອງເອົາບັນຊີກິດຈະການຄວບຄຸມ ແລະ ກິດຈະການສຳປະທານ ຂອງ ສປປ ລາວ ສະບັບເລກທີ 03/ນຍ, ລົງວັນທີ 10 ມັງກອນ 2019.
2.1. ຂັ້ນຕອນການອະນຸຍາດລົງທຶນ ສຳລັບກິດຈະການຄວບຄຸມ
ຜູ້ລົງທຶນ ໄດ້ຮັບໃບອະນຸຍາດລົງທຶນ ພາຍໃນ 25 ວັນ ລັດຖະການ ນັບແຕ່ ຫລປ ໄດ້ຮັບຄຳຮ້ອງຄົບຖ້ວນ ເປັນຕົ້ນໄປ. ຜູ້ລົງທຶນ (ບຸກຄົນ ຫຼື ນິຕິບຸກຄົນ) ຜູ້ລົງທຶນ ຍື່ນຄຳຮ້ອງຂໍລົງທຶນຕໍ່ ຫລປ.ສ ຫຼື ຫລປ.ຂ ຕາມການແບ່ງຂັ້ນອະນຸມັດ ທີ່ກຳນົດໃນເອກະສານຊ້ອນທ້າຍ (ກ) ຂອງດຳລັດ ເລກທີ 03/ນຍ,ລົງວັນທີ 10 ມັງກອນ 2019 (ບັນຊີ 01: ກິດຈະການຄວບຄຸມ). ມີລາຍລະອຽດຂອງຂັ້ນຕອນການຍື່ນເອກະສານຕາມລໍາດັບດັ່ງນີ້:
1. ຍື່ນເອກະສານທີ່ ຫ້ອງການບໍລິການ ການລົງທຶນປະຕູດຽວ (ຫລປ);
2. ຫລປ ສົ່ງຂໍຄຳເຫັນນໍາຂະແໜງການ (ພາຍໃນ 2 ວັນລັດຖະການ);
3. ຂະແໜງການ ຄົ້ນຄວ້າ ແລະ ມີຄຳເຫັນແຈ້ງຕອບ (ພາຍໃນ 8 ວັນລັດຖະການ);
4. ຫລປ ນຳສະເໜີ ຄະນະ ຄລທ ພິຈາລະນາ (ພາຍໃນ 10 ວັນລັດຖະການ);
5. ອອກໃບອະນຸຍາດລົງທຶນ (ພາຍໃນ 5 ວັນ ລັດຖະການ) ຫຼື ແຈ້ງຕອບປະຕິເສດ ຜູ້ລົງທຶນ (ພາຍໃນ 3 ວັນ ລັດຖະການ).
2.2. ຂັ້ນຕອນການອະນຸຍາດລົງທຶນ ສຳລັບກິດຈະການສຳປະທານ
ຜູ້ລົງທຶນ (ນິຕິບຸກຄົນ ພາຍໃນ ຫຼື ຕ່າງປະເທດ) ລົງທຶນ ໄດ້ຮັບໃບອະນຸຍາດລົງທຶນ ພາຍໃນ 65 ວັນ ລັດຖະການ ນັບແຕ່ ຫລປ ໄດ້ຮັບຄຳຮ້ອງຄົບຖ້ວນ ເປັນຕົ້ນໄປ. ຜູ້ລົງທຶນ ຍື່ນຄຳຮ້ອງຂໍລົງທຶນຕໍ່ ຫລປ.ສ ຫຼື ຫລປ.ຂ ຕາມການແບ່ງຂັ້ນອະນຸມັດ ທີ່ກຳນົດໃນເອກະສານຊ້ອນທ້າຍ (ກ) ຂອງດຳລັດ ເລກທີ 03/ນຍ, ລົງວັນທີ 10 ມັງກອນ 2019 (ບັນຊີ 02: ກິດຈະການສໍາປະທານ). ມີລາຍລະອຽດຂອງຂັ້ນຕອນການຍື່ນເອກະສານຕາມລໍາດັບດັ່ງນີ້:
1. ຍື່ນເອກະສານທີ່ ຫ້ອງການບໍລິການ ການລົງທຶນປະຕູດຽວ (ຫລປ);
2. ຫລປ ສົ່ງຂໍຄຳເຫັນນໍາຂະແໜງການ (ພາຍໃນ 2 ວັນລັດຖະການ);
3. ຂະແໜງການ ຄົ້ນຄວ້າ ແລະ ມີຄຳເຫັນຕອບຄືນ (ພາຍໃນ 30 ວັນລັດຖະການ);
4. ຫລປ ນຳສະເໜີ ຄະນະ ຄລທ ພິຈາລະນາຕົກລົງ ດ້ານຫຼັກການ (ພາຍໃນ 30 ວັນລັດຖະການ). ໃນກໍລະນີບໍ່ເຫັນດີ, ແຈ້ງຕອບຜູ້ລົງທຶນ (ພາຍໃນ 3 ວັນ ລັດຖະການ)
5. ກໍລະນີເຫັນດີ, ເຈລະຈາເຊັນບົດບັນທຶກຄວາມເຂົ້າໃຈ ຫຼື ສັນຍາ;
6. ອອກໃບອະນຸຍາດລົງທຶນ (ພາຍໃນ 3 ວັນ ລັດຖະການ)
| # | ຫົວຂໍ້ | ລາຍລະອຽດ | ອອກໂດຍ | ໄຟລ໌ |
|---|
| # | ຊື່ | ລາຍລະອຽດ | ປະເພດ ມາດຕະການ | ອົງກອນ | ຄຳເຫັນ | ນິຕິກໍາ | ສິ້ນສຸດ | ໝວດມາດຕະການ |
|---|
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.