ເພື່ອເປັນການຜັນຂະຫຍາຍ ແຈ້ງການ ກ່ຽວກັບ ຂັ້ນຕອນການຢັ້ງຢືນຜະລິດຕະພັນໄມ້ (ຂື້ນລົດ) ເພື່ອສົ່ງອອກໄປຕ່າງປະເທດ ສະບັບເລກທີ 1818/ຫສນຍ.ກສສ, ລົງວັນທີ 18 ພະຈິກ 2016, ກະຊວງອຸດສາຫະກຳ ແລະ ການຄ້າ ອອກ ຄຳສັ່ງແນະນຳ ກ່ຽວກັບ ຂັ້ນຕອນການຢັ້ງຢືນຜະລິດຕະພັນໄມ້ຂື້ນລົດ ເພື່ອສົ່ງອອກໄປຕ່າງປະເທດ ສະບັບເລກທີ 2143/ອຄ.ກຂອ, ລົງວັນທີ 25 ພະຈິກ 2016 ເຊິ່ງໄດ້ລະບຸຂັ້ນຕອນ ແລະ ໜ້າທີ່ຂອງຂະແໜງການຕ່າງໆ ໃນການຢັ້ງຢຶນຜະລິດຕະພັນໄມ້ ເພື່ອສົ່ງອອກໄປຕ່າງເທດ.
ຄະນະທີ່ຖືກແຕ່ງຕັ້ງເພື່ອລົງກວດກາ ແລະ ຢັ້ງຢືນຜະລິດຕະພັນໄມ້ ຈະປະກອບມີ 02 ຫຼື 03 ຂະແໜງການຄື: ຂະແໜງອຸດສາຫະກຳ ແລະ ການຄ້າ ເປັນຫຼັກ, ຂະແໜງກະສິກຳ ແລະ ປ່າໄມ້, ແລະ ຫ້ອງການຄຸ້ມຄອງຊັບສິນຂອງລັດ ເປັນຄະນະໂດຍອີງຕາມແຫຼ່ງທີ່ມາຂອງໄມ້. ຄະນະດັ່ງກ່າວນີ້ ມີໜ້າທີ່ໃນການລົງກວດກາຄວາມຖືກຕ້ອງຂອງຜະລິດຕະພັນໄມ້ຕາມ ລາຍການ (ບັນຊີ) ຜະລິດຕະພັນໄມ້ເພື່ອສົ່ງອອກ ແລະ ຫ້າມສົ່ງອອກ ເລກທີ 1833/ອຄ, ວັນທີ 03 ຕຸລາ 2016 ແລ້ວເຊັນຮັບຮອງໃສ່ໃບຢັ້ງຢືນດັ່ງກ່າວ ຕາມການສະເໜີຂອງບໍລິສັດ ຫຼື ໂຮງງານແຕ່ລະຄັ້ງ. ຫຼັງຈາກນັ້ນ, ມອບໃຫ້ພະແນກອຸດສາຫະກຳ ແລະ ການຄ້າແຂວງ/ນະຄອນຫຼວງວຽງຈັນ ເປັນຜູ້ເຊັນຮັບຮອງໃສ່ໃບຢັ້ງຢືນຜະລິດຕະພັນໄມ້ຂື້ນລົດເພື່ອສົ່ງອອກ ທີ່ໄດ້ຮັບການຢັ້ງຢືນຄວາມຖືກຕ້ອງຈາກຄະນະກວດກາ ແລະ ຖືເອົາໃບຢັ້ງຢືນດັ່ງກ່າວພຽງຢ່າງດຽວເປັນເອກະສານປະກອບໃນການແຈ້ງພາສີສົ່ງຜະລິດຕະພັນໄມ້ອອກຕ່າງປະເທດ.
ຄຳສັ່ງແນະນຳສະບັບນີ້ ນຳໃຊ້ປ່ຽນແທນ ແລະ ລົບລ້າງຄຳສັ່ງແນະນຳ ເລກທີ 1153/ອຄ.ກຂອ, ລົງວັນທີ 30 ມິຖຸນາ 2016.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.