ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ອອກ ຂໍ້ຕົກລົງ ວ່າດ້ວຍ ການນຳເຂົ້າ ແລະ ຈຳໜ່າຍ ອຸປະກອນໄອຊີທີ ສະບັບເລກທີ 3201/ປທສ, ລົງວັນທີ 16 ພະຈິກ 2016 ເຊິ່ງໄດ້ກຳນົດຫຼັກການ, ລະບຽບການ ແລະ ມາດຕະການ ໃນການຄຸ້ມຄອງການນຳເຂົ້າ ແລະ ການຈຳໜ່າຍ ອຸປະກອນໄອຊີທີ ເພື່ອຮັບປະກັນຄຸນນະພາບ ແລະ ມາດຕະຖານອຸປະກອນໄອຊີທີ ແນໃສ່ຄວາມເປັນລະບຽບ, ປອດໄພ ແລະ ຍຸຕິທຳ ຕໍ່ຜູ້ຊົມໃຊ້ ແລະ ສັງຄົມ.
ຂໍ້ຕົກລົງດັ່ງກ່າວ ກຳນົດໃຫ້ ຜູ້ທີ່ມີຈຸດປະສົງໃນການດໍາເນີນທຸລະກິດ ນໍາເຂົ້າ ຫຼື ຈໍາໜ່າຍ ອຸປະກອນ ໄອຊີທີຕ້ອງມີເງື່ອນໄຂຄື:
- ມີທຶນພຽງພໍ ຕາມທີ່ກຳນົດໃນກົດໝາຍວິສະຫະກິດ ແລະ ກົດໝາຍທີ່ກ່ຽວຂ້ອງ;
- ມີບຸກຄະລາກອນທີ່ມີຄວາມຮູ້ລະດັບຊັ້ນກາງຂຶ້ນໄປ ແລະ ມີປະສົບການດ້ານໄອຊີທີ ຢ່າງໜ້ອຍ ໜຶ່ງປີ;
- ມີສະຖານທີ່, ບ່ອນເກັບມ້ຽນ, ພາຫະນະຂົນສົ່ງ ແລະ ອຸປະກອນຮັບໃຊ້ ໃນການປະຕິບັດວຽກງານດ້ານຕ່າງໆຢ່າງພຽງພໍ ແລະ ເໜາະສົມກັບຂະໜາດຂອງກິດຈະການ;
- ມີແຜນດຳເນີນທຸລະກິດຢ່າງຈະແຈ້ງ ແລະ ສາມາດປະຕິບັດໄດ້;
- ປະກອບເອກະສານ ຕາມທີ່ກໍານົດໃນເອກະສານຊ້ອນທ້າຍ ຢ່າງຄົບຖ້ວນ ແລະ ຖືກຕ້ອງ.
ການນຳເຂົ້າອຸປະກອນໄອຊີທີທຸກຄັ້ງ ຜູ້ດຳເນີນການ ຕ້ອງຂໍໃບຢັ້ງຢືນການນຳເຂົ້າອຸປະກອນ ຈາກ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ເພື່ອກວດກາ ແລະ/ຫຼື ຢັ້ງຢືນ ມາດຕະຖານເຕັກນິກ ແລະ ຄວາມປອດໄພ ເປັນຕົ້ນ ມາດຕະຖານຂອງອົງການສະຫະພາບໂທລະຄົມມະນາຄົມສາກົນ, ສະມາຄົມວິສະວະກໍາໄຟຟ້າ-ເອເລັກໂຕຣນິກ, ສະມາຄົມຜູ້ໃຫ້ບໍລິການດ້ານອຸດສາຫະກໍາເຄື່ອຂ່າຍໂທລະສັບມືຖື ຫຼື ມາດຕະຖານແຫ່ງຊາດ. ສຳລັບອຸປະກອນທີ່ຕ້ອງກວດກາທາງດ້ານເຕັກນິກ ຕ້ອງໄດ້ສົ່ງຕົວຢ່າງອຸປະກອນ ແລະ ລາຍລະອຽດຕ່າງໆ ກ່ອນການນຳເຂົ້າ ຢ່າງໜ້ອຍ ສິບຫ້າວັນລັດຖະການ, ເມື່ອຜ່ານການຢັ້ງຢືນການນຳເຂົ້າແລ້ວ ຈຶ່ງຈະໄດ້ຮັບການຕິດກາໝາຍຢັ້ງຢືນ.
ຂໍ້ຕົກລົງສະບັບນີ້ ໄດ້ຮັບການເຜີຍແຜ່ລົງຈົດໝາຍເຫດທາງລັດຖະການ ໃນວັນທີ 3 ກຸມພາ 2017, ມີຜົນສັກສິດ ນັບແຕ່ມື້ລົງລາຍເຊັນ ແລະ ພາຍຫຼັງທີ່ໄດ້ລົງໃນຈົດໝາຍເຫດທາງລັດຖະການ 15 ວັນ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.