ສາທາລະນະລັດ ປະຊາທິປະໄຕ ປະຊາຊົນລາວ
ສັນຕິພາບ ເອກະລາດ ປະຊາທິປະໄຕ ເອກະພາບ ວັດທະນະຖາວອນ
ກະຊວງການເງິນ ເລກທີ 2040/ກພສ
ກົມພາສີ ນະຄອນຫລວງວຽງຈັນ, ວັນທີ 05 ມິຖຸນາ 2011
ແຈ້ງການ
ເຖິງ: ບັນດາອົງການຈັດຕັ້ງລັດ, ອົງການຈັດຕັ້ງສາກົນ, ລັດວິສະຫະກິດ, ບຸກຄົນ, ນິຕິບຸກຄົນ
ຫົວໜ່ວຍທຸລະກິດຂາອອກ-ຂາເຂົ້າພາຍໃນ ແລະ ຕ່າງປະເທດ.
ເລື່ອງ: ການກໍານົດມູນຄ່າແຈ້ງພາສີຕາມລາຄາຊື້-ຂາຍຕົວຈິງ ສໍາລັບນໍາເຂົ້າສິນຄ້າ, ເຄື່ອງໃຊ້ສອຍທົ່ວໄປ
- ອີງໃສ່ກົດໝາຍພາສີ ສະບັບເລກທີ 05/ສພຊ ລົງວັນທີ 25 ພຶດສະພາ 2005
- ອີງໃສ່ ດໍາລັດ 362/ນຍ ລົງວັນທີ 19ຕຸລາ 2007 ວ່າດ້ວຍການຈັດຕັ້ງປະຕິບັດກົດໝາຍວ່າດ້ວຍພາສີ
- ອີງໃສ່ ບົດແນະນໍາຂອງລັດຖະມົນຕີວ່າການກະຊວງການເງິນ ສະບັບເລກທີ 1398 ລົງວັນທີ 16/06/2010 ວ່າດ້ວຍການກໍານົດມູນຄ່າແຈ້ງພາສີຂາເຂົ້າ
ເພື່ອເຮັດໃຫ້ການຄຸ້ມຄອງ ແລະ ການຈັດຕັ້ງປະຕິບັດມູນຄ່າແຈ້ງພາສີ ໃຫ້ສອດຄ່ອງກັບລະບຽບກົດໝາຍວ່າດ້ວຍພາສີ ແລະ ລະບຽບການອົງການການຄ້າໂລກກໍານົດໄວ້
ກົມພາສີອອກແຈ້ງການ
- ເຫັນດີໃຫ້ຈັດຕັ້ງປະຕິບັດການກໍານົດມູນຄ່າແຈ້ງພາສີ ຕາມລາຄາຊື້-ຂາຍຕົວຈິງ ສໍາລັບການນໍາເຂົ້າສິນຄ້າ, ເຄື່ອງຂອງໃຊ້ສອຍທົ່ວໄປ ຕາມທີ່ກໍານົດໃນມາດຕາ 13 ຂອງກົດໝາຍພາສີ ສະບັບເລກທີ 05/ສພຊ ລົງວັນທີ 20/05/2005 ຢ່າງເຂັ້ມງວດ
- ເຫັນດີລົບລ້າງ ແລະ ຢຸດຕິການນໍາໃຊ້ບັນດານິຕິກໍາ ທີ່ກ່ຽວຂ້ອງກັບການກໍານົດລາຄາ ຕ່ໍາສຸດສໍາລັບການແຈ້ງພາສີນໍາເຂົ້າສິນຄ້າ, ເຄື່ອງຂອງໃຊ້ສອຍທົ່ວໄປທີ່ອະນຸຍາດຈາກ ກົມພາສີໃນໄລຍະຜ່ານມາທຸກສະບັບ ແລະ ໃຫ້ປະຕິບັດຕາມມູນຄ່າແຈ້ງພາສີ ຕາມມູນຄ່າຊື້-ຂາຍຕົວຈິງ
- ມອບໃຫ້ບັນດາພະແນກການອ້ອມຂ້າງກົມພາສີ, ພາສີປະຈໍາເຂດ, ດ່ານພາສີຊາຍແດນໃນຂອບເຂດທົ່ວປະເທດ, ຈັດຕັ້ງປະຕິບັດເຜີຍແຜ່ແຈ້ງການສະບັບນີ້ ໃຫ້ບັນດາອົງການຈັດຕັ້ງຂອງລັດ, ອົງການຈັດຕັ້ງສາກົນ, ລັດວິສະຫະກິດ, ບຸກຄົນ, ນິຕິບຸກຄົນ, ຫົວໜ່ວຍທຸລະກິດຂາອອກ-ຂາເຂົ້າພາຍໃນ ແລະ ຕ່າງປະເທດ ທຸກພາກສ່ວນທີ່ນໍາເຂົ້າສິນຄ້າ, ເຄື່ອງໃຊ້ສອຍທົ່ວໄປໄດ້ຮັບຊາບ ແລະ ເຂົ້າໃຈຕໍ່ລະບຽບດັ່ງກ່າວ ເພື່ອຮ່ວມມືໃນທາງປະຕິບັດຢ່າງຮັດກຸມ
- ແຈ້ງການສະບັບນີ້ມີຜົນສັກສິດ ແລະ ໃຫ້ເລີ່ມຈັດຕັ້ງປະຕິບັດນັບແຕ່ວັນທີ 01 ສິງຫາ 2001 ເປັນຕົ້ນໄປຢ່າງເອກະພາບ.
ດັ່ງນັ້ນ ຈຶ່ງແຈ້ງມາຍັງບັນດາທ່ານເພື່ອຮັບຊາບ ແລະ ຮ່ວມໃນທາງປະຕິບັດ ຢ່າງເຂັ້ມງວດ
ຫົວໜ້າກົມພາສີ
ບ່ອນສົ່ງ: ລັດຖະມົນຕີວ່າການກະຊວງການເງີນ
- ກົມນະໂຍບາຍການຄ້າຕ່າງປະເທດ
- ກົມນໍາເຂົ້າ-ສົ່ງອອກ
- ກົມສ່ວຍສາອາກອນ
PDF
PDFກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.