ອີງຕາມ ຂໍ້ຕົກລົງ ວ່າດ້ວຍ ການນຳເຂົ້າ ແລະ ຈຳໜ່າຍ ອຸປະກອນໄອຊີທີ ສະບັບເລກທີ 3201/ປທສ, ລົງວັນທີ 16 ພະຈິກ 2016 ນິຕິບຸກຄົນ ທີ່ຕ້ອງການດຳເນີນທຸລະກິດນຳເຂົ້າ ຫຼື ຈຳໜ່າຍ ອຸປະກອນໄອຊີທີຕ້ອງໄດ້ຮັບອະນຸຍາດຈາກ ຂະແໜງການໄປສະນີ, ໂທລະຄົມມະນາຄົມ ແລະ ການສື່ສານ. ໂດຍບັນດາລາຍການດ່ັງກ່າວແມ່ນໄດ້ລະບຸຢູ່ໃນ ບັນຊີລາຍການອຸປະກອນໄອຊີທີ ເລກທີ 1504/ຫກຊ, ລົງວັນທີ 20 ມິຖຸນາ 2018.
ນິຕິບຸກຄົນ ທີ່ມີຈຸດປະສົງຂໍອະນຸຍາດດໍາເນີນທຸລະກິດ ນຳເຂົ້າ ຫຼື ຈໍາໜ່າຍ ອຸປະກອນໄອຊີທີ ຕ້ອງມີເງື່ອນໄຂ ດັ່ງນີ້:
- ມີທຶນພຽງພໍ ຕາມທີ່ກຳນົດໃນກົດໝາຍວິສະຫະກິດ ແລະ ກົດໝາຍທີ່ກ່ຽວຂ້ອງ;
- ມີບຸກຄະລາກອນທີ່ມີຄວາມຮູ້ລະດັບຊັ້ນກາງຂຶ້ນໄປ ແລະ ມີປະສົບການດ້ານໄອຊີທີ ຢ່າງໜ້ອຍ ໜຶ່ງ ປີ;
- ມີສະຖານທີ່, ບ່ອນເກັບມ້ຽນ, ພາຫະນະຂົນສົ່ງ ແລະ ອຸປະກອນຮັບໃຊ້ ໃນການປະຕິບັດວຽກງານດ້ານຕ່າງໆຢ່າງພຽງພໍ ແລະ ເໜາະສົມກັບຂະໜາດຂອງກິດຈະການ;
- ມີແຜນດຳເນີນທຸລະກິດຢ່າງຈະແຈ້ງ ແລະ ສາມາດປະຕິບັດໄດ້;
- ປະກອບເອກະສານ ຕາມທີ່ກໍານົດໃນເອກະສານຊ້ອນທ້າຍ ໃນຂໍ້ຕົກລົງສະບັບເລກທີ 3201/ປທສ, ລົງວັນທີ 16 ພະຈິກ 2016 ຢ່າງຄົບຖ້ວນ ແລະ ຖືກຕ້ອງ. ຫຼັງຈາກນັ້ນ, ອົງການຄຸ້ມຄອງ ແລະ ກວດກາ ຈະພິຈາລະນາອອກອະນຸຍາດ ດຳເນີນທຸລະກິດ ນຳເຂົ້າ ຫຼື ຈຳໜ່າຍ ອຸປະກອນໄອຊີທີ ໃນໄລຍະເວລາ ສິບຫ້າ ວັນລັດຖະການ ນັບແຕ່ວັນທີ່ໄດ້ຮັບເອກະສານຄົບຖ້ວນສົມບູນ.
ນອກຈາກນັ້ນ, ໃນທຸກໆຄັ້ງທີ່ຈະນຳເຂົ້າອຸປະກອນໄອຊີທີ ຜູ້ດຳເນີນທຸລະກິດນຳເຂົ້າອຸປະກອນໄອຊີທີ ຕ້ອງຂໍໃບຢັ້ງຢືນການນຳເຂົ້າອຸປະກອນ ຈາກຂະແໜງການໄປສະນີ, ໂທລະຄົມມະນາຄົມ ແລະ ການສື່ສານ ເພື່ອກວດກາ ແລະ/ຫຼື ຢັ້ງຢືນ ມາດຕະຖານເຕັກນິກ ແລະ ຄວາມປອດໄພ (ລາຍລະອຽດມາດຕະຖານ ແມ່ນກຳນົດໄວ້ໃນເອກະສານຊ້ອນທ້າຍໃນຂໍ້ຕົກລົງສະບັບເລກທີ 3201/ປທສ, ລົງວັນທີ 16 ພະຈິກ 2016). ອຸປະກອນທີ່ຕ້ອງກວດກາທາງດ້ານເຕັກນິກ ຕ້ອງໄດ້ສົ່ງຕົວຢ່າງອຸປະກອນ ຫຼື ລາຍລະອຽດຕ່າງໆ ໃຫ້ອົງການຄຸ້ມຄອງ ນຳໄປກວດກາ ແລະ ຢັ້ງຢືນ ກ່ອນການນໍາເຂົ້າ ຢ່າງໜ້ອຍ ສິບຫ້າ ວັນລັດຖະການ. ອຸປະກອນໄອຊີທີທີ່ຜ່ານການຢັ້ງຢືນການນຳເຂົ້າ ຈະໄດ້ຮັບການຕິດກາໝາຍຢັ້ງຢືນ ທີ່ອອກໃຫ້ໂດຍ ຂະແໜງການໄປສະນີ, ໂທລະຄົມມະນາຄົມ ແລະ ການສື່ສານ.
ຜູ້ດຳເນີນທຸລະກິດນຳເຂົ້າ ທີ່ຕ້ອງການ ຂໍໃບຢັ້ງຢືນການນຳເຂົ້າອຸປະກອນໄອຊີທີ ຕ້ອງປະກອບເອກະສານ ດັ່ງນີ້:
- ມີລາຍລະອຽດກ່ຽວກັບອຸປະກອນຢ່າງຊັດເຈນ;
- ມີແຜນການນຳເຂົ້າ, ໃບແຈ້ງລາຄາ, ໃບຫຸ້ມຫໍ່ສິນຄ້າ, ຈໍານວນ, ລາຄາ, ໃບຢັ້ງຢືນແຫຼ່ງກຳເນີດສິນຄ້າ, ໃບຢັ້ງຢືນມາດຕະຖານຈາກໂຮງງານ, ສະຖານທີ່ປາຍທາງ ແລະ ວັນທີ ຢ່າງຊັດເຈນ;
- ກໍລະນີເປັນອຸປະກອນທີ່ຕ້ອງກວດກາທາງດ້ານເຕັກນິກ ຕ້ອງມີລາຍລະອຽດຈະແຈ້ງ ແລະ/ຫຼື ອຸປະກອນຕົວຈິງ ເພື່ອນຳມາກວດກາມາດຕະຖານອຸປະກອນ;
- ປະກອບເອກະສານ ຕາມທີ່ກໍານົດໃນເອກະສານຊ້ອນທ້າຍ ໃນຂໍ້ຕົກລົງສະບັບເລກທີ 3201/ປທສ, ລົງວັນທີ 16 ພະຈິກ 2016 ຢ່າງຄົບຖ້ວນ ແລະ ຖືກຕ້ອງ. ຫຼັງຈາກນັ້ນ, ອົງການຄຸ້ມຄອງ ແລະ ກວດກາ ຈະພິຈາລະນາອອກໃບຢັ້ງຢືນການນຳເຂົ້າອຸປະກອນໄອຊີທີ ໃນໄລຍະເວລາ ສິບ ວັນລັດຖະການ ນັບແຕ່ວັນທີ່ໄດ້ຮັບເອກະສານຄົບຖ້ວນສົມບູນ, ຍົກເວັ້ນອຸປະກອນໄອຊີທີ ທີ່ບໍ່ເຄີຍໄດ້ຮັບການຢັ້ງຢືນມາກ່ອນ ແລະ ມີລັກສະນະເຕັກນິກສູງ.
ຄລິກທີ່ນີ້ເພື່ອລາຍລະອຽດຂອງການນຳເຂົ້າ ແລະ ຈຳໜ່າຍ ອຸປະກອນໄອຊີທີ
ຄລິກທີ່ນີ້ເພື່ອລາຍລະອຽດຂອງບັນຊີລາຍການອຸປະກອນໄອຊີທີ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.