ດໍາລັດ ວ່າດ້ວຍການຄຸ້ມຄອງທຸລະກິດຍານພາຫະນະທາງບົກ ເລກທີ 470/ລບ, ລົງວັນທີ 27 ທັນວາ 2019 ມີຈຸດປະສົງ ເພື່ອກໍານົດຫລັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງ, ຕິດຕາມ ແລະ ກວດກາ ການດໍາເນີນທຸລະກິດຍານພາຫະນະທາງບົກ ຢູ່ ສປປ ລາວ ໃຫ້ເປັນລະບົບ ສາມາດຄອບຄຸມໄດ້ ໂດຍກໍານົດບັນດາຫຼັກການ ແລະ ມາດຕະການ ທີ່ຮັບປະກັບຜົນປະໂຫຍດ ຂອງພາກທຸລະກິດ, ພາກລັດ ແລະ ຜູ້ຊົມໃຊ້.
ການແຈ້ງຂື້ນທະບຽນວິສາຫະກິດຂອງທຸລະກິດການນໍາເຂົ້າ, ສົ່ງອອກ, ຜະລິດ, ແລະ ປະກອບພາຫະນະທາງບົກ ແມ່ນສໍາລັບ ບຸກຄົນ, ນິຕິບຸກຄົນ ທັງພາຍໃນ ແລະ ຕ່າງປະເທດ ທີ່ມີຈຸດປະສົງດໍາເນີນທຸລະກິດດັ່ງກ່າວ ຕ້ອງແຈ້ງຂື້ນທະບຽນວິສາຫະກິດ ຕາມກົດໝາຍວ່າດ້ວຍວິສາຫະກິດ ແລະ ລະບຽບການອື່ນທີ່ກ່ຽວຂ້ອງ.
ປະເພດທຸລະກິດຍານພາຫະນະທາງບົກ ແມ່ນມີ 3 ປະເພດ ຄື:
1. ທຸລະກິດການນໍາເຂົ້າ ແລະ ສົ່ງອອກຍານພາຫະນະທາງບົກ ແມ່ນ ການດໍາເນີນທຸລະກິດກ່ຽວກັບການນໍາເຂົ້າຍານພາຫະນະທາງບົກ ເພື່ອຂາຍຍົກໃຫ້ຜູ້ດໍາເນີນທຸລະກິດການຈໍາໜ່າຍຍານພາຫະນະທາງບົກ, ສົ່ງອອກຕໍ່, ເປັນຕົວແທນ ຫລື ຊື້ຍານພາຫະນະທາງບົກຈາກ ຜູ້ຜະລິດ, ປະກອບຍານພາຫະນະທາງບົກ ຢູ່ ສປປ ລາວ ເພື່ອຈໍາໜ່າຍ ຢູ່ ພາຍໃນ ຫລື ສົ່ງອອກໄປຕ່າງປະເທດ.
ການປະກອບເອກະສານ ຂໍອະນຸຍາດດໍາເນີນທຸລະກິດການນໍາເຂົ້າ ແລະ ສົ່ງອອກຍານພາຫະນະທາງບົກ ແມ່ນຕ້ອງປະຕິບັດຕາມລະບຽບທີ່ ກະຊວງອຸດສາຫະກໍາ ແລະ ການຄ້າ ດັ່ງນີ້:
1) ໃບຄໍາຮ້ອງຂໍອະນຸຍາດດໍາເນີນທຸລະກິດ;
2) ເອກະສານການມອບສິດໃຫ້ເປັນຜູ້ນໍາເຂົ້າຍານພາຫະນະ ຈາກບໍລິສັດແມ່ ຫລື ສາຂາທີ່ໄດ້ຮັບມອບສິດຈາກບໍລິສັດແມ່;
3) ໃບທະບຽນວິສາຫະກິດ;
4) ໜັງສືແນະນໍາການຂໍອະນຸຍາດດໍາເນີນທຸລະກິດ ທີ່ອອກໂດຍ ພາກສ່ວນອອກໃບທະບຽນວິສາຫະກິດ.
ທຶນຈົດທະບຽນຂອງວິສາຫະກິດດັ່ງກ່າວມານີ້ ແມ່ນມີ ສີ່ຕື້ ກີບ ຂື້ນໄປ ສໍາລັບຍານພາຫະນະທາງບົກ ທີ່ມີສອງ ຫລື ສາມລໍ້ ແລະ ຫ້າສິບຕື້ ກີບ ຂື້ນໄປ ສໍາລັບຍານພາຫະນະທາງບົກ ທີ່ມີສີ່ລໍ້ຂື້ນໄປ.
2. ທຸລະກິດການຈໍາໜ່າຍຍານພາຫະນະທາງບົກ ແມ່ນ ການດໍາເນີນທຸລະກິດກ່ຽວກັບ ການຂາຍຍົກ, ຂາຍຍ່ອຍຍານພາຫະນະທາງບົກໃໝ່ ແລະ/ຫລື ຍານພາຫະນະທາງບົກທີ່ໃຊ້ແລ້ວ ທີ່ສາມາດຂາຍ ຫລື ເປັນຕົວແທນຈໍາໜ່າຍຍານພາຫະນະທາງບົກ ຍີ່ຫໍ້ໃດໜຶ່ງ ຫລື ຫລາຍຍີ່ຫໍ້ ຊຶ່ງບໍ່ສາມາດນໍາເຂົ້າ ແລະ ສົ່ງອອກໄດ້.
ການປະກອບເອກະສານ ຂໍອະນຸຍາດດໍາເນີນກິດຈະການການຈໍາໜ່າຍພາຫະນະທາງບົກ ແມ່ນຕ້ອງປະຕິບັດຕາມລະບຽບທີ່ ກະຊວງອຸດສາຫະກໍາ ແລະ ການຄ້າ ດັ່ງນີ້:
1) ໃບຄໍາຮ້ອງຂໍອະນຸຍາດດໍາເນີນທຸລະກິດ;
2) ໃບອະນຸຍາດປຸກສ້າງສະຖານທີ່ວ່າງຈໍາໜ່າຍຍານພາຫະນະທາງບົກ;
3) ໃບທະບຽນວິສາຫະກິດ;
4) ໜັງສືແນະນໍາການຂໍອະນຸຍາດດໍາເນີນທຸລະກິດ ທີ່ອອກໂດຍ ພາກສ່ວນອອກໃບທະບຽນວິສາຫະກິດ.
3. ທຸລະກິດການຜະລິດ ແລະ/ຫລື ການປະກອບຍານພະທາງບົກ ແມ່ນ ການດໍາເນີນທຸລະກິດກ່ຽວກັບການຜະລິດ ຫລື ປະກອບ ຫລື ທັງຜະລິດ ແລະ ປະກອບຍານພາຫະນະທາງບົກ ໂດຍຜະລິດ, ນໍາເຂົ້າ ຫລື ຊື້ຊີ້ນສ່ວນ ຈາກຜູ້ຜະລິດຢູ່ພາຍໃນ ຈໍານວນຫນຶ່ງ ຫລື ທັງໝົດ ເພື່ອປະກອບເປັນຍານພາຫະນະທາງບົກສົມບູນ ແລ້ວຈໍາໜ່າຍຢູ່ພາຍໃນ ຫລື ສົ່ງອອກຕ່າງປະເທດ.
ຜູ້ຜະລິດ ແລະ/ຫລື ຜູ້ປະກອບຍານພາຫະນະທາງບົກ ຕ້ອງມີແຜນການເຄື່ອນໄຫວປະຈໍາປີ ໂດຍມີການຢັ້ງຢືນຈາກຂະແໜງການອຸດສາຫະກໍາ ແລະ ການຄ້າ, ກະຊວງອຸດສາຫະກໍາ ແລະ ການຄ້າ.
ລາຍລະອຽດເພີ່ມເຕີບຂອງ ດໍາລັດ ວ່າດ້ວຍການຄຸ້ມຄອງທຸລະກິດຍານພາຫະນະທາງບົກ ເລກທີ 470/ລບ ວັນທີ 27 ທັນວາ 2019.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.