ແຂວງບໍ່ແກ້ວ ອອກແຈ້ງການໂຈະຊົ່ວຄາວ ການນໍາເຂົ້າໝູຊີ້ນ, ໝູພໍ່ແມ່ພັນ, ໝູນ້ອຍ ແລະ ຜະລິດຕະພັນຊີ້ນໝູ ທຸກຊະນິດຈາກ ແຂວງຫຼວງນໍ້າທາ ຫຼື ຈາກບັນດາແຂວງພາຍໃນ ແລະ ຕ່າງປະເທດ ( ສປ ຈີນ, ສສ ຫວຽດນາມ) ຜ່ານແຂວງຫຼວງນໍ້າທາ ແລະ ຈາກປະເທດໄທ ເຂົ້າມາ ແຂວງບໍ່ແກ້ວ ເນື່ອງຈາກວ່າ ປະຈຸບັນ ນີ້ມີການແຜ່ລະບາດຮ້າຍແຮງຂອງພະຍາດອະຫິວາໝູອາຟຣິກາ ທີ່ ສປ ຈີນ, ສສ ຫວຽດນາມ, ປະເທດໄທ, ພະມ້າ ແລະ ໃນປະຈຸບັນກໍາລັງມີການລະບາດຢູ່ແຂວງ ຫຼວງນໍ້າທາ.
ໃຫ້ເຈົ້າໜ້າທີ່ກ່ຽວຂ້ອງຈັດຕັ້ງປະຕິບັດ ໃຫ້ເຂັ້ມງວດກວດກາບໍ່ໃຫ້ມີການລັກລອບນໍາເຂົ້າໝູຊີ້ນ, ໝູນ້ອຍ ແລະ ຜະລິດຕະພັນຊີ້ນໝູທຸກຊະນິດຈາກບັນດາແຂວງ, ປະເທດໃກ້ຄຽງ ທີ່ໄດ້ກ່າວມາຂ້າງເທິ່ງນັ້ນຢ່າງເຂັ້ມງວດ, ຫາກເຈົ້າໜ້າທີ່ກວດພົບເຫັນເປັນລົດຕ່າງໝູມີຊີວິດ ແມ່ນ ຕ້ອງສົ່ງກັບຄືນຕົ້ນທາງ, ຫາກແມ່ນຜະລິດຕະພັນກ່ຽວກັບໝູ ແມ່ນໃຫ້ຍຶດ ແລະ ທໍາລາຍກັບທີ່ ພ້ອມປັບໄໝ ແລະ ສຶກສາອົບຮົມຕາມລະບຽບການ.
ຖ້າຜູ້ປະກອບການຈະນໍາເຂົ້າໝູພໍ່ແມ່ພັນ, ໝູຊີ້ນ, ໝູນ້ອຍ ແລະ ຜະລິດຕະພັນໝູ ແມ່ນຕ້ອງໄດ້ຮັບອະນຸຍາດຈາກ ກົມລ້ຽງສັດ ແລະ ການປະມົງ ແລະ ຕ້ອງມີໃບຢັ້ງຢືນທີ່ມາຂອງໝູຈາກເຂດທີ່ປອດພະຍາດໝູອອກໃຫ້ໂດຍ ກົມລ້ຽງສັດ ແລະ ການປະມົງ, ຕ້ອງມີໃບຢັ້ງຢືນມາດຕະຖານຟາມຕົ້ນທາງ, ມີໃບຢັ້ງຢືນສຸຂະພາບຜົນກວດບໍ່ພົບເຊື້ອຂອງພະຍາດ FMD, ASF ແລະ PRRS ຈາກຫ້ອງວິໄຈຂອງພາກລັດເທົ່ານັ້ນ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.