ກອງປະຊຸມ ໄດ້ທົບທວນຄືນ ຄວາມຄືບຫນ້າ ໃນການຈັດຕັ້ງປະຕິບັດການຄົມມະນາຄົມຂົນສົ່ງ, ການອຳນວຍຄວາມສະດວກທາງດ້ານການຄ້າ ແລະ ການສະໜັບສະໜູນການບໍລິຫານຂົນສົ່ງ, ການລົງທຶນ ແລະ ທ່ອງທ່ຽວຕາມການພັດທະນາແລວທາງເສດຖະກິດ ຕາເວັນອອກ-ຕາເວັນຕົກ ແລະ ບັນດາສິ່ງທ້າທາຍ ແລະ ຂໍ້ຫຍຸ້ງຍາກ ຕ່າງໆ ນັບແຕ່ກອງປະຊຸມຄັ້ງທີໜຶ່ງ ທີ່ ແຂວງກວາງຈິ, ສສ ຫວຽດນາມ ໃນເດືອນ ພຶດສະພາ 2012 ເປັນຕົ້ນມາ ແລະ ໄດ້ປຶກສາຫາລືກ່ຽວກັບທິດທາງການຮ່ວມມື ກັນໃນອະນາຄົດລວມທັງ ການພັດທະນາພື້ນຖານໂຄງລ່າງ, ຈັດຕັ້ງປະຕິບັດສັນຍາການຂົນສົ່ງຂ້າມແດນ, ລະບົບພາສີສິນຄ້າຜ່ານແດນ ແລະ ຂະບວນການຂັ້ນຕອນຢູ່ຕາມຊາຍແດນ.
ກອງປະຊຸມ ໄດ້ຕີລາຄາສູງຕໍ່ບົດບາດແລະຄວາມສຳຄັນຂອງການພັດທະນາແລວທາງເສດຖະກິດ ຕາເວັນອອກ-ຕາເວັນຕົກ ທີ່ມີຕໍ່ການພັດທະນາຂອງບັນດາແຂວງ ທີ່ຢູ່ຕາມແລວທາງເສດຖະກິດ, ໂດຍສະເພາະການປັບປຸງ ແລະ ຍົກລະດັບພື້ນຖານໂຄງລ່າງ, ການກໍ່ສ້າງສິ່ງອໍານວຍຄວາມສະດວກ ແລະ ການບໍລິການ ຢູ່ຕາມແລວທາງເສດຖະກິດດັ່ງກ່າວ ລວມທັງ ການຊຸກຍູ້ການລົງທຶນຈາກພາກລັດ ແລະ ພາກເອກະຊົນ ເຂົ້າໃນການພັດທະນາສິ່ງອຳນວຍຄວາມສະດວກ. ກອງປະຊຸມ ໄດ້ສະແດງຄວາມຂອບໃຈຕໍ່ການຊ່ວຍເຫລືອ ຂອງ ບັນດາຄູ່ຮ່ວມພັດທະນາ ໂດຍສະເພາະ ລັດຖະບານຍີ່ປຸ່ນ ແລະ ທະນາຄານພັດທະນາອາຊີ ໃນການພັດທະນາແລວທາງເສດຖະກິດ ຕາເວັນອອກ-ຕາເວັນຕົກ.
ກອງປະຊຸມ ໄດ້ຍົກໃຫ້ເຫັນຄວາມສຳຄັນ ຂອງການຕົກລົງຂະຫຍາຍແລວທາງເສດຖະກິດ ຕາເວັນອອກ-ຕາເວັນຕົກ ໂດຍກວມເອົາເສັ້ນທາງໄປເຖິງ ແຫລມສະບັງ, ບາງກອກ, ປະເທດໄທ; ເຖິງ ວຽງຈັນ, ສປປ ລາວ; ແລະ ເຖິງ ຮ່າໂນຍ ແລະ ຮາຍຟອງ, ສສ ຫວຽດນາມ; ການນຳເອົາເສັ້ນທາງເລກທີ 8 ແລະ 12 ເຂົ້າມາຢູ່ໃນແລວທາງເສດຖະກິດ ຕາເວັນອອກ-ຕາເວັນຕົກ; ການຍົກລະດັບເສັ້ນທາງເລກທີ 9; ການຕົກລົງຮ່ວມກັນ ລະຫວ່າງ ສປປ ລາວ ແລະ ໄທ ທີ່ຈະເລີ່ມທົດລອງຈັດຕັ້ງປະຕິບັດ ການກວດກາຢູ່ຈຸດດຽວ ແລະ ປ່ອງດຽວ ຢູ່ດ່ານສາກົນ ສະຫວັນນະເຂດ-ມຸກດາຫານ ກ່ອນທ້າຍປີ 2013; ການຕົກລົງຮ່ວມກັນ ຂອງ ສປປ ລາວ ແລະ ສສ ຫວຽດນາມ ທີ່ຈະລົງນາມໃນບົດບັນທຶກຄວາມເຂົ້າໃຈ ເພື່ອຈັດຕັ້ງປະຕິບັດ ຂັ້ນຕອນສຸດທ້າຍ ໃນການກວດກາຢູ່ຈຸດດຽວ ແລະ ປ່ອງດຽວ ຢູ່ດ່ານສາກົນ ແດນສະຫວັນ-ລາວບາວ ກ່ອນກອງປະຊຸມ ລັດຖະມົນຕີຊ່ວຍວ່າການ ກະຊວງການຕ່າງປະເທດ ວ່າດ້ວຍການພັດທະນາແລວທາງເສດຖະກິດ ຕາເວັນອອກ-ຕາເວັນຕົກ ຄັ້ງທີສາມ ໃນປີ 2014; ແລະ ການສ້າງຕັ້ງສະມາຄົມຂົນສົ່ງ ຂອງອະນຸພາກພື້ນແມ່ນ້ຳຂອງ ຊຶ່ງມີຫ້ອງການປະຈຳຢູ່ ນະຄອນຫຼວງວຽງຈັນ.
ຄຽງຄູ່ກັບຜົນສຳເລັດດັ່ງກ່າວ, ກອງປະຊຸມຍັງຮັບຊາບວ່າ ບັນດາປະເທດຕາມແລວທາງເສດຖະກິດ ຍັງຈະຕ້ອງໄດ້ຮ່ວມມືກັນ ເພື່ອແກ້ໄຂບັນດາຂໍ້ຫຍຸ້ງຍາກ ແລະ ອຸປະສັກຕ່າງໆ ລວມທັງ ການປັບປຸງຖະຫນົນ ຫົນທາງ ທີ່ເປ່ເພ, ການປັບປຸງບັນດາເອກະສານ, ລະບຽບການ ແລະ ຂັ້ນຕອນຕ່າງໆ ໃນການກວດກາສິນຄ້າ, ການສ້າງສິ່ງອຳນວຍຄວາມສະດວກຕ່າງໆໃຫ້ຫລາຍຂຶ້ນ, ເອົາໃຈໃສ່ເພື່ອໃຫ້ ບັນດາປະເທດສະມາຊິກ ໃນອະນຸພາກພື້ນແມ່ນໍ້າຂອງ ລົງນາມ ແລະ ໃຫ້ສັດຕະຍາບັນໃນເອກະສານກ່ຽວຂ້ອງຕ່າງໆ ຂອງສັນຍາວ່າດ້ວຍການຂົນສົ່ງຂ້າມແດນ ໃນອະນຸພາກພື້ນແມ່ນ້ຳຂອງ (GMS CBTA) ໂດຍໄວ, ເພື່ອເລັ່ງລັດໃຫ້ມີການຈັດຕັ້ງປະຕິບັດຢ່າງເຕັມສ່ວນ ແລະ ມີປະສິດທິຜົນ.
ກອງປະຊຸມ ໄດ້ຮັບຮອງເອົາເອກະສານສຳຄັນ 2 ສະບັບ ຄື: (1) ຖະແຫລງການສະຫວັນນະເຂດ ກ່ຽວ ກັບ ຄວາມຄືບຫນ້າໃນການພັດທະນາແລວທາງເສດຖະກິດ ຕາເວັນອອກ-ຕາເວັນຕົກ; ແລະ (2) ຖະແຫລງການຮ່ວມ ຂອງກອງປະຊຸມລັດຖະມົນຕີຊ່ວຍວ່າການກະຊວງການຕ່າງປະເທດ ກ່ຽວກັບ ການພັດທະນາແລວທາງເສດຖະກິດ ຕາເວັນອອກ-ຕາເວັນຕົກ ຄັ້ງທີ 2.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.