ກະຊວງ ກະສິກໍາ ແລະ ປ່າໄມ້ ໄດ້ອອກແຈ້ງການແນະນໍາ ສະບັບເລກທີ 1503/ຫກ, ລົງວັນທີ 16 ກໍລະກົດ 2013 ກ່ຽວກັບ ການນໍາເຂົ້າ ແລະ ສົ່ງອອກພຶດ, ຜະລິດຕະພັນພຶດ ແລະ ຜະລິດຕະພັນອາຫານທີ່ມີຕົ້ນກໍາເນີດມາຈາກພຶດ ໄປບັນດາປະເທດສະຫະພາບ ເອີຣົບ ຫຼື ອີຢູ (EU). ແຈ້ງການດັ່ງກ່າວ ໄດ້ຮຽກຮ້ອງໃຫ້ ບັນດາພະແນກກະສິກໍາ ແລະ ປ່າໄມ້ ແຂວງ, ນະຄອນຫຼວງ ແລະ ທຸກພາກສ່ວນເສດຖະກິດ ທີ່ກ່ຽວຂ້ອງໃນ ການນໍາເຂົ້າ ແລະ ສົ່ງອອກ ຜະລິດຕະພັນພຶດ ປະຕິບັດຕາມຂໍ້ກໍານົດໃນກົດໝາຍ ວ່າດ້ວຍການປ້ອງກັນພືດຢ່າງເຄັ່ງຄັດ ເພື່ອສະກັດກັ້ນ ແລະ ຈໍາກັດການນໍາເຂົ້າຜະລິດຕະພັນພຶດ ຈາກຕ່າງປະເທດ ແລະ ແອບອ້າງວ່າມີແຫຼ່ງກໍາເນີດຢູ່ ສ ປປ ລາວ ເພື່ອສົ່ງອອກໄປປະເທດທີ ສາມ. ເພາະປະຈຸບັນຜົນຜະລິດພຶດຜັກ ໃນ ສ ປປ ລາວ ມີທ່າອ່ຽງດີ ແລະ ເປັນທີ່ຍອມຮັບຂອງຜູ້ບໍລິໂພກທັງພາຍໃນ ແລະ ຕ່າງປະເທດ ທີ່ຄໍານຶງເຖິງຄວາມປອດໄພດ້ານສຸຂະພາບ.
ກະຊວງ ກະສິກໍາ ແລະ ປ່າໄມ້ຂອງລາວ ໄດ້ຮັບການແຈ້ງເຕືອນ ຈາກກຸ່ມປະເທດ ອີຢູ ກ່ຽວກັບການຕິດເຊື້ອພະຍາດ ແລະ ສານພິດຕົກຄ້າງຂອງສານເຄມີປາບສັດຕູພຶດ ໃນຜະລິດຕະພັນພຶດສົ່ງອອກຈາກ ສ ປປ ລາວ, ຊຶ່ງສົ່ງຜົນກະທົບອັນບໍ່ດີຕໍ່ພຶດຜັກ ຈາກ ສ ປປ ລາວ. ທຸກໆສິ້ນສ່ວນຂອງພຶດ ແລະ ຜະລິດຕະພັນພຶດ ທີ່ຢູ່ໃນສະພາບສົດ ຫຼື ແຫ້ງ ເຊັ່ນ : ແກ່ນ, ເມັດ, ໃບ, ກ້ານໃບ, ຫົວ, ຮາກພຶດ ແລະ ອຶ່ນໆ ໃນເວລາສົ່ງອອກ ແລະ ນໍາເຂົ້າ ແມ່ນມີຄວາມສ່ຽງສູງຕໍ່ການຕິດເຊື້ອພະຍາດພຶດ, ແມງໄມ້ສັດຕູພຶດ ແລະ ມີສານຕົກຄ້າງຂອງສານເຄມີປາບສັດຕູພຶດ ໂດຍສະເພາະ ຜັກບົວລະພາ (basil), ໝາກກ້ວຍ (banana), ໝາກຖົ່ວຝັກຍາວ (yard long bean) ແລະ ອື່ນໆ.
ທ່ານສາມາດດາວໂຫລດລະອຽດເພີ່ມເຕີມໄດ້ຂ້າງລຸ່ມນີ້
PDFກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.