ສຳລັບດ້ານການຈັດສົ່ງຂະບວນລົດຂອງຜູ້ປະກອບການຕົວແບບການຜະລິດເປັນສິນຄ້າໃນຄັ້ງນີ້ ແມ່ນເປັນເຫດການໜຶ່ງທີ່ສຳຄັນຄັ້ງປະຫວັດສາດຂອງແຂວງຫຼວງນ້ຳທາ ເພື່ອແນໃສ່ການພັດທະນາ ແລະ ການສົ່ງເສີມວຽກງານກະສິກຳໃຫ້ເຕີບໃຫຍ່ຂະຫຍາຍໂຕ ເປັນການເຊື່ອມໂຍງດ້ານເສດຖະກິດກັບພາກພື້ນ ແລະ ສາກົນ.
ທ່ານ ດຣ. ພວງປະຣິສັກ ປະວົງວຽງຄຳ ລັດຖະມົນຕີຊ່ວຍວ່າການກະຊວງກະສິກຳ ແລະ ປ່າໄມ້ ກ່າວວ່າ: ການສົ່ງສິນຄ້າຂອງ ສປປ ລາວ ໄປ ສປ ຈີນ ແມ່ນເປົ້າໝາຍໜຶ່ງຂອງປະເທດເຮົາ ດັ່ງນັ້ນ ຈິ່ງຮຽກຮ້ອງໃຫ້ຜູ້ປູກພືດເປັນສິນຄ້າ ບັນດານັກທຸລະກິດພາກ ສ່ວນທີ່ກ້ຽວຂ້ອງຈົ່ງພ້ອມກັນສົ່ງເສີມ ແລະ ສ້າງຄວາມເຂັ້ມແຂງ ໃຫ້ແກ່ການຜະລິດກາຍເປັນສິນຄ້າຮັບປະກັນໄດ້ທັງປະລິມານ ແລະ ຄຸນນະພາບຂອງສິນຄ້າ ຕາມມາດຖານຂອງອົງການການຄ້າໂລກ
ດ້ານທ່ານ ນາງ ຈັນທອນ ໂດຍປະເສີດ ຮອງຫົວໜ້າຂະແໜງປູກຝັງໃຫ້ຮູ້ວ່າ: ການສົ່ງອອກຜະລິດຕະພັນຄັ້ງນີ້ມີໝາກໂມ ຈຳນວນ 360 ໂຕນ, ໂຕນ 1 ມູນຄ່າ 375 ໂດລາສະຫະລັດ ລວມມູນຄ່າທັງໝົດ 135.000 ໂດລາສະຫະລັດ ຫຼື ປະມານ 1,08 ຕື້ກວ່າກີບ ມີເນື້ອທີ່ປູກໝາກໂມ 1.192 ເຮັກຕາ ຄາດຄະເນຜົນໄດ້ຮັບ 23.175 ໂຕນ ປະຈຸບັນເກັບກູ້ໄດ້ 1%, ອ້ອຍ 3.317 ເຮັກຕາ ເກັບກູ້ແລ້ວ 79,62%, ມັນຕົ້ນ 1.322 ເຮັກຕາ ເກັບກູ້ໄດ້ 70%, ກ້ວຍ 1.737 ເຮັກຕາ ເກັບກູ້ຜົນຜະລິດໄດ້ 25%, ໝາກອຶ 259 ເຮັກຕາ ເກັບກູ້ຜົນຜະລິດໄດ້ 3%, ການປູກສາລີ 1.435 ເຮັກຕາ, ໝາກເຜັດ ແລະ ພືດຜັກໃຫ້ໃບ ແລະ ໃຫ້ທົ່ວເນື້ອທີ່ 777 ເຮັກຕາ.
ຢ່າງໃດກໍຕາມ ໃນໄລຍະຜ່ານມາແຂວງຫຼວງນ້ຳທາ ໄດ້ມີຄວາມເອົາໃຈໃສ່ຕໍ່ວຽກງານການສົ່ງອອກ ແລະ ນຳເຂົ້າສິນຄ້າ ໂດຍໃນສົກປີ 2012-2013 ມີສິນຄ້ານຳເຂົ້າທັງໝົດ 410 ລ້ານກວ່າໂດລາສະຫະລັດ, ໃນນັ້ນສະບຽງອາຫານ 2,88 ລ້ານກວ່າໂດລາ, ເຄື່ອງໃຊ້ຫ້ອງການກີລາ ແລະ ວັດທະນະທຳ 4 ລ້ານກວ່າໂດລາ, ອຸປະກອນເຄື່ອງກໍ່ສ້າງ 270 ລ້ານກວ່າໂດລາ, ອຸປະກອນໄຟຟ້າ ແລະ ເຄື່ອງໃຊ້ໄຟຟ້າ 76 ລ້ານກວ່າໂດລາ, ເຄື່ອງນຸ່ງຫົ່ມ ແລະ ເຄື່ອງໃຊ້ສອຍປະຈຳວັນ 12,8 ລ້ານກວ່າໂດລາ, ສິນຄ້າຮັບໃຊ້ການຜະລິດກະສິກຳ 7,79 ລ້ານກວ່າໂດລາ, ອາໄຫຼ່ທຸກຊະນິດ 5,3 ລ້ານກວ່າໂດລາ, ພາຫະນະ ແລະ ຊິ້ນສ່ວນ 11,6 ລ້ານກວ່າໂດລາ, ສິນຄ້າຊົມໃຊ້ຟຸມເຟືອຍ 2 ແສນກວ່າໂດລາ, ສິນຄ້າຮັບໃຊ້ການຜະລິດອຸດສາຫະກຳ 15 ລ້ານກວ່າໂດລາ, ນ້ຳມັນເຊື້ອໄຟ ແລະ ອາຍແກັສ 1,4 ລ້ານກວ່າໂດລາ. ຊຶ່ງສົມທຽບສິນຄ້ານຳເຂົ້າທັງໝົດໃສ່ປີກ່ອນເຫັນວ່າເພີ່ມຂຶ້ນ 731,01% ແລະ ທຽບໃສ່ແຜນການສົກປີ ປະຕິບັດໄດ້ 960,93% ສາເຫດຍ້ອນວ່າສິນຄ້ານຳເຂົ້າຮັບໃຊ້ໂຄງການລົງທຶນເພີ່ມຂຶ້ນ.
ສ່ວນວ່າສິນຄ້ານຳເຂົ້າພາຍໃນແຂວງປະຕິບັດໄດ້ 7 ລ້ານກວ່າໂດລາສະຫະລັດ ໃນນີ້ ປະກອບມີສະບຽງອາຫານ 5 ແສນກວ່າໂດລາ, ເຄື່ອງໃຊ້ຫ້ອງການກີລາ ແລະ ວັດທະນະທຳ 3 ແສນກວ່າໂດລາ, ອຸປະກອນເຄື່ອງກໍ່ສ້າງ 1,9 ລ້ານກວ່າໂດລາ, ອຸປະກອນໄຟຟ້າ ແລະ ເຄື່ອງໄຟຟ້າ 1,2 ລ້ານກວ່າໂດລາ ເຄື່ອງນຸ່ງຫົ່ມ ແລະ ເຄື່ອງໃຊ້ສອຍປະຈຳວັນ 1,5 ລ້ານໂດລາ ສິນຄ້າຮັບໃຊ້ການຜະລິດກະສິກຳ 1 ແສນກວ່າໂດລາ ແລະ ອາໄຫຼ່ທຸກຊະນິດ 1,1 ລ້ານກວ່າໂດລາສະຫະລັດ.
ຂະນະທີ່ສິນຄ້າສົ່ງອອກພາຍໃນແຂວງໃນສົກປີດຽວກັນ ລວມມີ 38,49 ລ້ານກວ່າໂດລາສະຫະລັດ, ໃນນີ້ ຜະລິດຕະພັນໄມ້ມີມູນຄ່າ 4 ພັນກວ່າໂດລາ, ກະສິກຳລ້ຽງສັດ 20,77 ລ້ານກວ່າໂດລາ, ເຄື່ອງປ່າຂອງດົງ 3 ແສນກວ່າໂດລາ ແລະ ອີກ 17,33 ລ້ານກວ່າໂດລາແມ່ນແຮ່ທາດຕ່າງໆ ທີ່ສົ່ງອອກໄປ ສປ ຈີນ, ມຽນມາ, ຟີລິບປິນ, ໄທ ແລະ ຫວຽດນາມ.
ແຫລ່ງຂໍ້ມູນ: ໜັງສືພິມເສດຖະກິດການຄ້າ, ສະບັບວັນທີ 28 ມີນາ 2014
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.