ກອງປະຊຸມດັ່ງກ່າວໄດ້ດຳເນີນໄປຕາມວາລະ, ພາຍຫຼັງທີ່ທ່ານລັດຖະມົນຕີວ່າການ ກະຊວງສາທາລະນະສຸກ ໄດ້ກ່າວຕ້ອນຮັບ ແລະ ມີຄຳເຫັນໃນກອງປະຊຸມຢ່າງເປັນທາງການ ຊຶ່ງໄດ້ເນັ້ນໜັກ ແລະ ໃຫ້ຄວາມສຳຄັນຂອງຊັບພະຍາກອນທຳມະຊາດທີ່ເປັນຢາ ເພື່ອເຮັດໃຫ້ນຳໃຊ້ຢ່າງຖືກຕ້ອງ, ຖືກວິທີ ແລະ ມີຄຸນນະພາບ. ນອກນີ້ ຍັງໄດ້ເນັ້ນໜັກວຽກງານການອອກອະນຸຍາດຂຸດຄົ້ນ, ການປະສານງານຄຸ້ມຄອງລະຫວ່າງ ຂະແໜງການທີ່ກ່ຽວຂ້ອງດ້ານຊັບພະຍາກອນທຳມະຊາດທີ່ເປັນຢາ, ເພື່ອເຮັດໃຫ້ການຂຸດຄົ້ນໃຫ້ຖືກວິທີ, ຮັກສາຄວາມຍືນຍົງທາງທຳມະຊາດ ໂດຍຮຽກຮ້ອງໃຫ້ມີຄວາມຮັບຜິດຊອບຮ່ວມກັນທຸກໆພາກສ່ວນກັບຂະແໜງການທີ່ກ່ຽວຂ້ອງ. ກອງປະຊຸມຄັ້ງນີ້ ແມ່ນກອງປະຊຸມສືບຕໍ່ຈາກ 2 ກອງປະຊຸມ ທີ່ກະຊວງສາທາລະນະສຸກ ໄດ້ຈັດຂື້ນ ຄື: ກອງປະຊຸມຢາພື້ນເມືອງທົ່ວປະເທດຄັ້ງທີ 3, ແລະ ກອງປະຊຸມສືບຕໍ່ທົບທວນຄືນກາງສະໄໝຂອງການຈັດຕັ້ງປະຕິບັດແຜນການພັດທະນາຢາພື້ນເມືອງ ຈັດຂື້ນເມື່ອເດືອນກັນຍາ 2014 ເຊິ່ງຜົນກອງປະຊຸມ ໄດ້ຍົກໃຫ້ເຫັນສະພາບຫຍຸ້ງຍາກ ໃນການຈັດຕັ້ງປະຕິບັດຄຸ້ມຄອງຊັບພະຍາກອນທຳມະຊາດທີ່ເປັນຢາຢູ່ຂັ້ນທ້ອງຖິ່ນ ແມ່ນຍັງບໍ່ທັນມິລະບົບການຄຸ້ມຄອງທີ່ເປັນເອກະພາບ ເຮັດໃຫ້ມີການຂຸດຄົ້ນແບບຊະຊາຍ, ບໍ່ຖືກຫຼັກວິຊາການ ແລະ ກໍຍັງມີຊ່ອງວ່າງຫຼາຍ ເຮັດໃຫ້ຜົນຕອບແທນດ້ານເສດຖະກິດ ບໍ່ຄຸ້ມຄ່າເທົ່າທີ່ຄວນ. ນອກນີ້, ການປະສານງານລະຫວ່າງຂະແໜງການກ່ຽວຂ້ອງກໍຍັງເຮັດບໍ່ໄດ້ດີ.
ທ່ານ ຫົວໜ້າກົມອາຫານ ແລະ ຢາ ໄດ້ຂຶ້ນລາຍງານການຈັດຕັ້ງປະຕິບັດການເຜີຍແຜ່ບັນດາກົດໝາຍ, ດຳລັດ, ແຈ້ງການຕ່າງໆ ໂດຍເນັ້ນໃສ່ໃຫ້ຜູ້ເຂົ້າຮ່ວມເຂົ້າໃຈ ດຳລັດ 155/ນຍ ກ່ຽວກັບ ຊັບພະຍາກອນທີ່ເປັນຢາ ຊຶ່ງຜ່ານມາໃນປີ 2007 ມີບັນຊີຊັບພະຍາກອນທຳມະຊາດທີ່ເປັນຢາ 30 ລາຍການ ແລະ ປີ 2013 ໄດ້ມີເພິ່ມອີກ 20 ລາຍການ ລວມເປັນ 50 ລາຍການ. ນອກນີ້, ທ່ານ ຍັງໄດ້ລາຍງານຕຶ່ມກ່ຽວກັບການຈັດຕັ້ງປະຕິບັດແຈ້ງການ. ການອອກອະນຸຍາດຕ່າງໆ ທີ່ເປັນໜັງສືລັດຖະການ ເພື່ອໃຫ້ບໍລິສັດດຳເນີນກິດຈະການສະກັດ, ປຸງແຕ່ງຊັບພະຍາກອນທຳມະຊາດທີ່ເປັນຢາ ໂດຍສະເພາະ ໂຮງງານສະກັດຝຸ່ນເຄືອແຮມ ທີ່ບໍ່ໄດ້ມາດຕະຖານ ທີ່ໄດ້ສ້າງຕັ້ງຂຶ້ນຢູ່ບາງແຂວງ ແມ່ນໄດ້ສະເໜີໃຫ້ຍຸດຕິການອະນຸມັດ ຫຼື ອອກອະນຸຍາດ. ພ້ອມນີ້, ທາງລັດຖະບານເອງ ກໍໄດ້ອອກໜັງມືແຈ້ງການ ເພື່ອໃຫ້ຂະແໜງການທີ່ກ່ຽວຂ້ອງເອົາໃຈໃສ່, ກຳນົດລະອຽດມາດຕະການ, ເງື່ອນໄຂຂອງບັນດາໂຮງງານສະກັດຝຸ່ນຈາກຊັບພະຍາກອນທຳມະຊາດ.
ຜົນຂອງກອງປະຊຸມໃນຄັ້ງນີ້ ແມ່ນສາມາດສະຫຼຸບໄດ້ວ່າ: ຈະສືບຕໍ່ເຜີຍແຜ່ ແລະ ຈັດຕັ້ງປະຕິບັດ ດຳລັດວ່າດ້ວຍຊັບພະຍາກອນທຳມະຊາດທີ່ເປັນຢາ ສະບັບເລກທີ 155/ນຍ, ລົງວັນທີ 30 ມີນາ 2003; ສືບຕໍ່ເພີ່ມທະວີຂອດການປະສານງານຮ່ວມມືລະຫວ່າງຂະແໜງການທີ່ກ່ຽວຂ້ອງ ເຊັ່ນ: ຂັ້ນສູນກາງ, ຂັ້ນແຂວງ ແລະ ເມືອງ ຮອດກຸ່ມບ້ານ ເພື່ອກຳນົດການແບ່ງຄວາມຮັບຜິດຊອບແບບຈະແຈ້ງ; ສືບຕໍ່ສ້າງກຳນົດມາດຕະການ, ມາດຖານຂອງໂຮງງານ ໂດຍຮ່ວມມືກັບກົມການນຳເຂົ້າ ແລະ ສົ່ງອອກ, ກົມອຸດສະຫະກຳ ແລະ ຫັດຖະກຳ, ກົມອາຫານ ແລະ ຢາ ເພື່ອກຳນົດແຜນການຄຸ້ມຄອງກວດກາ, ການຂຸດຄົ້ນ ລວມເຖິງການອອກໜັງສືອະນຸມັດນຳເຂົ້າ-ສົ່ງອອກ ເພື່ອຮັບປະກັນທາງດ້ານຫຼັກການ; ສືບຕໍ່ເຜີຍແຜ່ຂໍ້ມູນຜ່ານສື່ຕ່າງໆ ເຊັ່ນ: ໂທລະພາບ, ວິທະຍຸ, ແຜ່ນພັບ ແລະ ໂປສເຕີ້ເພື່ອຄວາມເຂົ້າໃຈໃຫ້ປະຊາຊົນ ແລະ ພາກທຸລະກິດຮັບຊາບ; ສືບຕໍ່ປັບປຸງຂັ້ນຕອນການອອກອະນຸຍາດນຳເຂົ້າ ແລະ ສົ່ງອອກສິນຄ້າປະເພດຢາ ໃຫ້ມີຄວາມກະທັດຮັດ, ວ່ອງໄວຂື້ນ ເນື່ອງຈາກວ່າໄລຍະຜ່ານມາໃຊ້ເວລາພິຈາລະນາດົນເກີນໄປ; ສະເໜີໃຫ້ ກະຊວງອຸດສະຫະກຳ ແລະ ການຄ້າ ຊ່ວຍເປັນຜູ້ປະສານງານຂະແໜງການທີ່ກ່ຽວຂ້ອງ ເຊັ່ນ: ກະຊວງກະສິກຳ ແລະ ປ່າໄມ້, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ກະຊວງສາທາລະນະສຸກ ໃນການກໍານົດສິນຄ້າຄຸ້ມຄອງຢ່າງຈະແຈ້ງ ແລະ ໃຫ້ການຊ່ວຍເຫຼືອເຜີຍແຜ່ຂໍ້ມູນຂ່າວສານໃຫ້ທັນສະພາບການ. ເພື່ອຮັບປະກັນການມີສ່ວນຮ່ວມຂອງສັງຄົມ, ຫຼີກລ້ຽງຜົນກະທົບຕໍ່ສິ່ງແວດລ້ອມ ແລະ ຊັບພະຍາກອນທຳມະຊາດ.
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.