ຂົວມິດຕະພາບລາວ-ມຽນມາ ຕັ້ງຢູ່ບ້ານຫ້ວຍກຸ່ມ ຫ່າງຈາກບ້ານຊຽງກົກໄປທາງທິດເໜືອປະມານ 13 ກິໂລແມັດ ຂຶ້ນກັບເມືອງລອງ ແຂວງຫຼວງນ້ຳທາ ສປປ ລາວ ແລະ ປະມານ 500 ແມັດ ທາງໃຕ້ຂອງບ້ານຊຽງລາບ ເມືອງທ່າຂີ້ເຫຼັກ ລັດສານ ສສ ມຽນມາ, ເປັນການເຊື່ອມທາງຫຼວງເລກທີ 17 ຂອງລາວ ກັບ ທາງຫຼວງເລກທີ 4 ຂອງມຽນມາ.
ຂົວແຫ່ງນີ້ ໄດ້ລົງມືກໍ່ສ້າງໃນວັນທີ 16 ກຸມພາ 2013 ລວມໄລຍະເວລາກໍ່ສ້າງຕາມສັນຍາ 30 ເດືອນ ແຕ່ການກໍ່ສ້າງສຳເລັດກ່ອນແຜນການ 5 ເດືອນ, ມີຄວາມຍາວ 691,6 ແມັດ ກວ້າງ 10,9 ແມັດ, ມີທາງລົດແລ່ນ 2 ຊ່ອງຈາລະຈອນ ກວ້າງ 8,5 ແມັດ ແລະ ທາງຍ່າງສອງເບຶ້ອງໆ ລະ 1,2 ແມັດ, ເປັນຂົວທີ່ມີຂາງປະສົມເຊິ່ງມີຂາງເຫຼັກຍາວ 360 ແມັດ ສູງ 12 ແມັດຢູ່ທາງກາງ ແລະ ຂາງເບຕົງຍາວ 331,6 ແມັດຢູ່ສອງຝັ່ງ. ທາງເຂົ້າແຕ່ດ່ານຫາຂວາເບື້ອງລາວຍາວ 758 ແມັດ ແລະ ແຕ່ດ່ານຫາຂົວເບື້ອງມຽນມາຍາວ 610 ແມັດ. ຕົວຂົວມີມູນຄ່າການກໍ່ສ້າງ 26 ລ້ານໂດລາສະຫະລັດ ເມື່ອລວມກັບດ່ານມີມູນຄ່າທັງໝົດ 32 ລ້ານໂດລາສະຫະລັດ ເຊິ່ງໃຊ້ງົບປະມານພາຍໃນຂອງລັດຖະບານລາວ ແລະ ມຽນມາ. ຂົວແຫ່ງນີ້ອອກແບບໃຫ້ຮັບນ້ຳໜັກລົດບັນທຸກ 10 ລໍ້ໄດ້ 75 ໂຕນ, ຮັບແຮງສັ່ນຂອງແຜ່ນດິນໄຫວໃນລະດັບ 7,0 ຣິກເຕີ ແລະ ກຳປັ່ນລະດັບ 500 ໂຕນສາມາດແລ່ນຜ່ານໄດ້.
ທ່ານ ດຣ. ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດກ່າວວ່າ: ການກໍ່ສ້າງຂົວມິດຕະພາບລະຫວ່າງລາວ-ມຽນມາແຫ່ງທຳອິດ ໄດ້ເປັນການຕອບສະໜອງຄວາມມຸ່ງມາດປາດຖະໜາອັນແຮງກ້າຂອງລັດຖະບານ ກໍ່ຄືປະຊາຊົນສອງຊາດລາວ-ມຽນມາ ທັງສອດຄ່ອງກັບທ່າແຮງແຫ່ງການຮ່ວມມືເພື່ອພັດທະນາລະຫວ່າງບັນດາປະເທດໃນພາກພື້ນ ໃນການເຊື່ອມໂຍງເຂົ້າກັບບັນດາປະເທດໃນອະນຸພາກພື້ນອ່າງແມ່ນ້ຳຂອງ ຕາມແລວເສດຖະກິດຕາເວັນອອກ-ຕາເວັນຕົກ, ທັງເປັນການກະກຽມເຂົ້າເປັນປະຊາຄົມເສດຖະກິດອາຊຽນ ຫຼື ເອອີຊີ ໃນປີ 2015.
ສປປ ລາວ ຈະຮ່ວມກັບຝ່າຍມຽນມາ ນໍາໃຊ້ຂົວແຫ່ງນີ້ ເພື່ອນຳເອົາຜົນປະໂຫຍດສູງສຸດມາສູ່ປະຊາຊົນລາວ ແລະ ມຽນມາ ກໍ່ຄືໃນເສີມຂະຫຍາຍການຮ່ວມມືທາງດ້ານການຄ້າ, ການລົງທຶນ ແລະ ການທ່ອງທ່ຽວຂອງສອງປະເທດລາວ-ມຽນມາ ແລະ ຂອງອະນຸພາກພື້ນຂອງເຮົາອີກດ້ວຍ.
ແຫຼ່ງທີ່ມາ: ໜັງສືພິມ ເສດຖະກິດການຄ້າ
ກະລຸນາປະກອບຄວາມຄິດເຫັນຂອງທ່ານຂ້າງລຸ່ມນີ້ ແລະຊ່ວຍພວກເຮົາປັບປຸງເນື້ອຫາຂອງພວກເຮົາ.